2 Timoteo 4:1-22
4 E fakatonu atu au ki a koe i mua o te Atua mo Keliso Iesu, telā ka fakamasino ne ia a tino ola mo tino ‵mate, e auala i tena fakaasi mai e pelā foki mo tena Malo,
2 ke folafola atu te muna, ke fai fakavave i taimi ‵lei mo taimi faiga‵ta, ke polopoloki atu, ke fakatonutonu atu, ke fakamalosi atu mo te kufaki katoatoa kae ke apo foki i te faiga o akoakoga.
3 Me ka oko mai te taimi ka se faka‵logo ei a tino ki akoakoga ‵tonu, kae ka akoako atu latou e ‵tusa loa mo olotou manakoga totino. Ka tokouke olotou faiakoga kolā e akoako atu ne latou a mea e logo‵tonu ki olotou taliga.*
4 Ka faka‵tuli ne latou olotou taliga ki te munatonu, me ka ‵saga atu fua ki tala ‵fatu sē ‵tonu.
5 Kae ko koe, tausi tou mafaufau ke ‵lei i mea katoa, kufaki i mea faiga‵ta, fai te galuega a te tino talai,* kae fakataunu katoatoa tau galuega.
6 Me ko oti ne ‵ligi atu au ki tua e pelā me se taulaga uaina, kae ko pili mai te taimi ka fakasaoloto ei au.
7 Ko oti au ne taua atu i te taua ‵lei. Ko oti au ne tele i te fakatautelega ki te fakaotiga. Ko oti ne tausi ne au te fakatuanaki.
8 Ko oti ne tausi mō oku te foualiki o te amiotonu mai te taimi tenei o fano ki mua, telā ka tuku mai ki a au e pelā me se taui ne te Aliki, ko te famasino amiotonu i te aso tenā, kae e se ko au fua, kae e pelā foki mo latou katoa kolā e olioli ki te taimi e fakaasi mai ei a ia.
9 Taumafai malosi ke oko fakavave mai koe ki a au.
10 Me ko oti au ne tiaki ne Tema ona ko tena fiafai malosi ki te olaga tenei, kae ko oti ne fanatu ki Tesalonia; a ko Kelesene ki Kalatia, a ko Tito ki Talamatia.
11 Ko Luka fua tenei e ‵nofo māua. Puke mai a Maleko ke o‵mai mo koe me e mafai o fesoasoani mai ki a au i te faiga o te galuega.
12 Kae ko oti ne uga atu ne au a Tukasi ke fano ki Efeso.
13 Kafai e vau koe, puke mai toku gatu telā ne tiaki i Teloa i a Kapasi, mo pelugā tusi, maise loa a pelugā tusi i pakili o manu.
14 E uke oku logo‵maega mai i a Alesana, te tino faite mea ki kopa—ka taui atu eiloa ne Ieova e ‵tusa mo ana mea ne fai.
15 E ‵tau foki o fakaeteete koe i a ia, me e ‵teke malosi atu a ia ki ‵tou fekau.
16 I te kamataga o aku fakamatalaga o ‵pulu au i te fono, e seai se tino ne kau mai ki a au kae ne tiakina au ne latou katoa—talosia ke se agasala latou i te mea tenei.
17 Kae ne tu te Aliki i oku tafa kae faulu mai ne ia te ‵mana ki loto i a au, ko te mea ke fakataunu katoatoa te galuega talai e auala i a au, ke lagona ne fenua katoa; kae ne sao eiloa au mai te gutu o te leona.
18 Ka fakasao au ne te Aliki mai so se mea masei, kae ka fakasao ne ia au mō tena Malo i te lagi. Ke i luga i a ia te ‵malu ki te se-gata-mai, ki te se-gata-mai eiloa, Amene.
19 ‵Moli atu oku alofaga ki a Pisila mo Akuila mo tino i te kaufale o Onesefolo.
20 Ne nofo a Elata i Kolinito, kae ne tuku ne au a Tolofimo i Mileto me e masaki.
21 Taumafai malosi ke oko mai koe mai mua o te ‵tau ‵moko.
Ko ‵moli atu alofaga o Eupele ki a koe, e pelā foki mo Paute mo Lino mo Kalaotia mo taina katoa.
22 Ke fakatasi atu te Aliki ki te agaga telā e fakaasi mai ne koe. Ke i luga i a koutou katoa tena alofa tauanoa.
