Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Timoteo 3:1-17

3  Kae ke iloa ne koe te mea tenei, me ka oko mai eiloa a toe taimi faiga‵ta i aso fakaoti.  Me ka a‵lofa fua a tino ki a latou eiloa, ka va‵lea ki tupe, ka fakamata‵mata, ka fia ‵sili, ka muna ma‵sei, ka se faka‵logo ki olotou mātua, ka se loto fakafetai, ka se a‵lofa fakamaoni,  ka galo te alofa masani i a latou, ka se lotoma‵lie ki so se feagaiga, ka gutu fatu‵fatu, e seai se loto pulea, e amio fakasaua, e se ma‵nako ki mea ‵lei.  e fai togafiti, e ma‵keke olotou ulu, e ‵fonu i te fakamatamata, e va‵lea ki fakafiafiaga i lō te a‵lofa ki te Atua,  e foliga mai me e fakamaoni latou ki te Atua kae e fakafiti ne latou tena ‵mana. ‵Kalo keatea mai tino konei.  Me e ‵sae mai i a latou konei a tāgata fai togafiti kolā e ulu lēmū atu ki fale o tino kae e takitaki ‵se ne latou a fāfine vāi‵vai kolā e ‵fonu i te agasala, kae e pulea ne olotou manakoga kese‵kese.  E tauloto faeloa latou kae se maua ne latou a te iloa tonu e uiga ki te munatonu.  E pelā eiloa mo te ‵teke atu o Ianea mo Iameli ki a Mose, e penā foki te ‵teke atu o latou konei ki te munatonu. A tāgata penā ko ma‵sei katoatoa olotou mafaufau, e se talia latou ne te Atua me e se sa‵sale latou e ‵tusa mo te fakatuanaki.  E tiga te feitu tenā, ka se toe ga‵solo atu latou ki mua, me ko matea faka‵lei ne tino te lotou va‵lea, e pelā eiloa mo te va‵lea o tāgata e tokolua konā. 10  Kae ko oti ne tautali faka‵lei atu koe i aku akoakoga, ki te auala e ola ei au, ki toku fakamoemoega, ki toku fakatuanaki, ki toku kufaki, ki toku alofa, ki toku lotomau, 11  ki fakasauaga mo logo‵maega, e pelā eiloa mo mea ne ‵tupu ki a au i Anitioka, i Ikonio, i Lusa. Ne kufaki au i fakasauaga konei, kae ne fakasao eiloa au ne te Aliki mai mea katoa konā. 12  Se mea tonu me ka fakasauagina eiloa a tino katoa kolā e ma‵nako ke ola latou i te tavini fakamaoni atu ki te Atua i te ‵kau fakatasi mo Keliso Iesu. 13  Kae ko tino amio ma‵sei kae fakaloi‵loi tino ka gasolo aka mai te masei o na ma‵sei atu eiloa. E faka‵se ne latou a nisi tino kae e faka‵segina foki latou. 14  Kae ko koe, ke tumau i mea kolā ne tauloto ne koe kae talitonu foki ki ei, me e iloa ne koe a tino kolā ne akoako ne lāua a koe 15  me ne iloa ne koe a tusitusiga tapu mai tau folikiga, kolā e fai ei ke poto koe e uiga ki te fakaolataga e auala i te fakatuanaki ki a Keliso Iesu. 16  A Tusitusiga Tapu katoa ne māfua mai i te Atua, kae e aoga ki te akoako atu, ki te faiga o polopolokiga, ki te fakatonutonuga o mea ‵se, mo te faiga o polopolokiga i te amiotonu, 17  ko te mea ke poto ‵lei te tagata o te Atua, kae ke toka ‵lei a ia mō te faiga o galuega ‵lei katoa.

Fakamatalaga mai lalo