2 Timoteo 2:1-26
2 Tela la, e taku tama, fai ke maua faeloa ne koe te ‵mana e auala i te alofa tauanoa telā e maua mai te ‵kau fakatasi mo Keliso Iesu,
2 mo mea kolā ne lagona ne koe mai i a au kae ‵lago atu ki ei a molimau e tokouke, ko mea konei ke tuku atu ki tāgata fakamaoni kolā e toka ‵lei o akoako atu a mea konei ki nisi tino.
3 E pelā me se sotia ‵lei a Keliso Iesu, ke toka koe o talia a logo‵maega.
4 E seai se tagata e fai mo fai se sotia e aofia i mea fakapisinisi o te olaga nei, ko te mea ke talia a ia ne te tino telā ne ‵tofi ne ia a ia mo fai se sotia.
5 E pelā foki i tafaoga, so se tino e fakatau‵fai i ei, e se mafai o maua sena failoga* vagana ke tafao a ia e ‵tusa eiloa mo tulafono o te tafaoga.
6 A te tino fai fatoaga telā e galue malosi e ‵tau o kai muamua ki fuataga o ana lakau.
7 Mafaufau faeloa ki aku pati konei; kae ka fai ne te Aliki a koe ke malamalama i mea katoa.
8 Ke masaua i a Iesu Keliso ne toe fakatu aka mai te mate kae ne vau mai te gafa* o Tavita, e ‵tusa mo te tala ‵lei tenei e talai atu ne au.
9 Ko te pogai eiloa tenā e logo‵mae ei au kae ‵pei foki ki te falepuipui e pelā me se tino amio masei. E tiga te feitu tenā, a te muna a te Atua e se mafai eiloa o pikifao.
10 Ona ko te mea tenei, e fa‵ki faeloa au i mea katoa konei mō tino filifilia, ko te mea ke maua foki ne latou te fakaolataga e auala i a Keliso Iesu i te ‵malu se-gata-mai.
11 E mautinoa eiloa a pati konei: Kafai e ‵mate fakatasi tatou, ka ola fakatasi foki tatou.
12 Kafai e tumau tatou i te kufaki, ka pule fakatasi foki tatou e pelā me ne tupu. Kafai e fakafiti ne tatou a ia, ka fakafiti foki ne ia tatou.
13 Kafai foki loa e se fakamaoni tatou a ko ia e tumau eiloa i te fakamaoni, me e se mafai o fakafiti ne ia a ia eiloa.
14 Ke fakamasaua atu faeloa ki a latou a mea konei, kae akoako atu latou* i mua o te Atua ke mo a e kinau latou ki uiga o pati, se mea telā e seai lele eiloa sena aoga me e fakama‵sei* atu fua ki tino fakalogo‵logo.
15 Fakaoti ou mafi ke tuku atu koe e pelā me se tino ko talia ne te Atua, se tino galue e aunoa mo te mā i so se mea, kae e akoako ‵tonu eiloa ne koe te munatonu.
16 Kae ‵kalo keatea mai pati sē aoga kolā e fakamasei atu ki mea tapu; me ka iku atu fua a mea konā ki te faiga o amioga sē amioatua ke uke atu,
17 kae ka salalau atu olotou pati konā e pelā mo te masaki ko te ‵pala. A Humenio mo Fileto e aofia i a latou
18 kolā ko oti ne ‵seke keatea mo te munatonu, kae fai mai me i te toetu ko oti ne kamata; kae ko fakamasei foki ne latou te fakatuanaki o nisi tino.
19 E tiga te feitu tenā, e tu ‵mautakitaki eiloa te fakavae o te Atua, kae tenei tena fakamailoga: “E iloa ne Ieova ana tino,” kae “Ko latou kolā e ka‵laga ki te igoa o Ieova ka tiakina ne latou a amioga ma‵sei.”
20 E tuku i loto i se fale lasi e tasi, a ipu aulo mo ipu siliva e pelā foki mo ipu lakau mo ipu kele. E faite a nisi ipu mō se pogai aoga a ko nisi ipu mō se pogai sē aoga.
21 Tela la, kafai e ‵kalo keatea se tino mai i ipu sē aoga, ka fai ei a ia mo fai se ipu aoga, e fakatapugina, e aoga ki tena matai, kae e fakatoka mo fai a galuega ‵lei katoa.
22 Tela la, tele keatea mai manakoga masani o talavou, kae kausaki atu ki te amiotonu, te fakatuanaki, te alofa, te filemu, fakatasi mo latou kolā e ka‵laga atu ki te Aliki mo te loto ‵ma.
23 E se gata i ei, sa saga ki kinauga va‵lea kae se aoga, me iloa ne koe me e ‵tupu fua i ei a taua.
24 Me i pologa a te Aliki e se ‵tau o kinau, kae e ‵tau o uiga filemu ki tino katoa, ke apo i te akoako atu, kae fakaasi atu te kufaki i mea ‵se e fai atu ki a latou,
25 e akoako atu mo te atafai a tino kolā e se fia‵fia; me kāti e mafai o ‵fuli olotou loto* ne te Atua, ke iloa tonu ne latou te munatonu,
26 kae e mafai o toe maua ne latou te mafaufau ‵lei kae ‵tele keatea mai te malei a te Tiapolo, me ne ‵po eiloa ne ia latou ke fai ne latou tena loto.
