2 Timoteo 1:1-18
1 Au ko Paulo, se apositolo a Keliso Iesu e auala i te loto o te Atua e ‵tusa mo te folafolaga e uiga ki te ola telā e auala mai i a Keliso Iesu,
2 ki a Timoteo, taku tama pele:
Ke i luga i a koe te alofa tauanoa, te alofa fakamagalo, mo te filemu mai te Atua te Tamana mo Keliso Iesu te ‵tou Aliki.
3 E fakafetai au ki te Atua, telā e avatu ne au ki ei te taviniga tapu mo te loto lagona ‵ma, e pelā eiloa mo oku tupuga, me e masaua faeloa ne au a koe i aku talosaga i po mo ao.
4 Ko oko eiloa i te fia lavea ne au a koe, me e masaua ne au ou loimata, ko te mea ke ‵fonu toku loto i te fiafia.
5 Me e masaua ne au tou fakamaoni i tou fakatuanaki, telā ne maua muamua ne tou tupuna fafine ko Loise mo tou mātua ko Eunike, kae e talitonu au me tenā foki e maua ne koe.
6 Ko te pogai eiloa tenei e fakamasaua atu ei au ke fa‵ka ne koe e pelā me se afi, te meaalofa a te Atua tenā i a koe e auala i te fakaekeatuga o oku lima ki luga i a koe.
7 Me ne seki tuku mai ne te Atua ki a tatou te agaga o te mata mataku, kae ko te ‵mana mo te alofa mo te mafaufau ‵lei.
8 Tela la, ke mo a koe e mā i te molimau atu e uiga ki te ‵tou Aliki, io me ki a au, te pagota ona ko ia, kae ke fai eiloa tou tusaga i te logo‵mae i mea faiga‵ta mō te tala ‵lei mai te fakalagolago ki te ‵mana o te Atua.
9 Ne faka‵sao kae kalaga foki ne ia tatou ki te kalagaga tapu, e se ona ko ‵tou galuega, kae ona ko tena fuafuaga mo tena alofa tauanoa. Ko leva ne tuku mai ki a tatou te mea tenei e uiga ki a Keliso Iesu,
10 kae nei la, ko oti ne fakamaina faka‵lei mai te mea tenā e auala i te fakaasimaiga o te ‵tou Fakaola, ko Keliso Iesu, telā ne fakaseai ne ia te mate kae fakamaina atu te mainaga ki luga i te foitino ola e aunoa mo te pala, e auala i te tala ‵lei,
11 telā ne fakaeke ei au ke fai mo fai se tino talai, se apositolo, mo se faiakoga.
12 Ko te pogai foki eiloa tenei e logo‵mae ei au i mea konei, a ko au e se mā i ei. Me e iloa ne au te tino telā e talitonu au ki ei, kae e talitonu eiloa au me e mafai o puipui ne ia te mea telā ne tuku atu ne au ki a ia ke oko eiloa ki te aso tenā.
13 Tausi faeloa ki pati aoga* masani* kolā ne lagona ne koe mai i a au mo te fakatuanaki mo te alofa kolā ne māfua mai i te ‵kau fakatasi mo Keliso Iesu.
14 Ke puipui te mea tāua tenei e auala i te agaga tapu telā e nofo i loto i a tatou.
15 E iloa ne koe me ko oti ne tiakina au ne tāgata katoa i kogā fenua o Asia, e aofia i ei a Fogelu mo Hemokene.
16 Ke i luga i te kaufale o Onesefolo te alofa atafai o te Aliki, me ne fakamalosi mai faeloa a ia ki a au, kae e se mā tou tagata i oku pikifao i te falepuipui.
17 I lō te mā i a au, ne ‵sala mai faeloa ki a au i taimi katoa ne vau ei a ia ki Loma, kae ne maua eiloa ne ia au.
18 Ke talia ne te Aliki ke maua ne ia te alofa atafai o Ieova i te aso tenā. Kae e iloa ‵lei ne koe ana galuega ‵lei katoa kolā ne fai i Efeso.