Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Petelu 3:1-18

3  Aku fagasele, tenei te lua o aku tusi ki a koutou. E pelā eiloa mo taku tusi muamua, e fakaala ne au otou mafaufau e auala i se fakamasauaga,  ko te mea ke masaua ne koutou a pati kolā ne fai atu muamua ne pelofeta tapu mo te fakatonuga a te ‵tou Aliki mo te ‵tou Fakaola e auala i otou apositolo.  A te mea muamua, ke iloa ne koutou me i aso fakaoti ka o‵mai a tino fakatauemu mo olotou pati fakatauemu, e ‵tusa eiloa mo olotou manakoga  kae fai mai: “Ne folafola mai i a ia ka toe fakatasi mai, tefea nei la a ia? Mai te taimi ne ‵moe ei a ‵tou tupuga i te mate, e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.”  Me ne seki ma‵nako ke iloa ne latou te manatu tonu tenei, me ne iai te lagi mai i aso mua eiloa mo te laukele telā ne sae aka i te vai kae ne sikomia foki ne te vai e ‵tusa mo te muna a te Atua.  Kae e auala i mea foki eiloa konā ne fakamaseigina ei te lalolagi i te taimi ne lofia ei i te vai.  Kae e auala i te muna foki eiloa tenā, a te lagi mo te lalolagi konei e iai nei e tausi eiloa penā mō te afi i te aso o te fakamasinoga kae ka fakaseai atu ei a tino sē amioatua.  E tiga te feitu tenā, ke mo a e puli i a koutou a te mea tenei, me i te aso e tasi e ‵pau fua mo te afe tausaga ki a Ieova kae ko te afe tausaga e ‵pau mo te aso e tasi.  E se tuai a Ieova e uiga ki ana folafolaga, e pelā mo te kilokiloga a nisi tino me e tuai, kae ko ia e kufaki ona ko koutou me e se manako a ia ke fakaseai atu se tino e tokotasi kae e manako ke sala‵mo a tino katoa. 10  Kae ko te aso o Ieova ka oko mai e pelā me se tino kaisoa, kae ka fakaseai atu a te lagi mo tena ‵gulu fakamataku, kae ko mea kolā e faite ki ei te lagi ka liu suavai ona ko te lasi o te ‵vela kae ka tuku faka‵sau atu ei te lalolagi mo ana galuega. 11  Ona ko mea katoa konei ka fakaseai atu i te auala tenei, e ‵tau o fai otou amioga ke ‵ma kae fakamaoni ki te Atua, 12  a koi fakatali‵tali kae olioli faeloa koutou ki te oko mai o te aso o Ieova. I te aso tenā ka fakaseai atu ei a te lagi telā ka ‵ka i te afi kae ka liu suavai a mea katoa i ei ona ko te lasi o te ‵vela! 13  Kae e isi eiloa se lagi fou mo se lalolagi fou kolā e fakatali‵tali tatou ki ei e ‵tusa mo tena folafolaga, kae e maua i ei te amiotonu. 14  Tela la, e aku fagasele, a koi fakatali‵tali koutou ki mea konei, fai te toe mea e mafai o fai ke maua atu koutou ne ia e seai ne otou pona io me ne lailaiga kae ko te filemu fua. 15  E se gata i ei, ke mafaufau ki te kufaki o te ‵tou Aliki e pelā me ko te fakaolataga, e pelā eiloa mo te tusi a te ‵tou taina pele ko Paulo telā ne tusi atu foki ki a koutou e ‵tusa mo te poto telā ne tuku atu ki a ia, 16  e uiga ki mea konei e pelā eiloa mo ana pati i ana tusi katoa. Kae e isi ne mea e faigata o malamalama i ei, kae konei la a mea e ‵fuli fakakotua ne tino va‵lea kae vāi‵vai, e pelā eiloa mo olotou faiga ki nisi mea i Tusitusiga Tapu, kae ka iku atu eiloa ki te lotou fakaseaiga. 17  Tela la, e aku fagasele, ona ko te mea ko iloa ne koutou a te mea tenei, ke fakaeteete la ke mo a e takitaki‵segina koutou fakatasi mo latou ona ko mea ‵se a tino solitulafono kae galo atu ei te otou tulaga ‵mautakitaki. 18  Ikai, kae ke ola faeloa koutou i te alofa tauanoa mo te poto e uiga ki te ‵tou Aliki mo te ‵tou Fakaola ko Iesu Keliso. Ke i luga i a ia te ‵malu i te taimi nei ke oko atu eiloa ki te se-gata-mai.

Fakamatalaga mai lalo