Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Petelu 2:1-22

2  E tiga te feitu tenā, ne ‵nofo atu foki a pelofeta ‵loi i loto i tino o te Atua, e pelā eiloa mo faiakoga ‵loi ka ‵nofo atu foki i loto i a koutou. Ka aumai lēmū ne tino konei a mavae‵vaega kolā e fakamasei atu ki otou fakatuanaki kae fakafiti ne latou te lotou pule telā ne ‵togi ne ia latou, kae ka fakaseai fakavave atu eiloa latou.  E se gata i ei, ka tau‵tali atu a tino e tokouke i olotou amioga matafatu mo te sē āva, kae ona ko mea konei, ka taku fakamaseigina ei te munatonu.  Ka fakamasei fakavave ne latou a koutou ki olotou pati ‵loi. Kae e se tuai te lotou fakamasinoga telā ko leva ne fakaiku aka, a ko te lotou fakaseaiga e oko mai eiloa.  Se mea tonu me ne seki taofi aka ne te Atua te fakasalaga o agelu kolā ne agasala, kae mai te lotou ‵peiatuga ki loto i Tatalusi, ne tuku atu ei latou ki lua o te pouli ‵tagataga ke oko ki te aso e fakamasino ei latou.  Ne seki taofi foki ne ia te fakasalaga o te lalolagi mua, kae ne fakasao ne ia a Noa, te tino talai o te amiotonu, fakatasi mo nisi tino e tokofitu i te avatuga o te lolo ki luga i te lalolagi o tino amio ma‵sei.  Mai te fakamaseiga o fa‵kai ko Sotoma mo Komolo ke liu lefu, ne taku fakamasei ei ne ia, ke fai mo fai se ata o te mea telā ka tupu ki tino sē fakamaoni i aso mai mua.  Ne fakasao ne ia te tino amiotonu ko Lota, telā ne logo‵mae malosi i amioga matafatu mo te sē āva a tino solitulafono konā—  me ne logo‵mae malosi a te tino amiotonu tenā i aso takitasi i amioga solitulafono kolā ne lavea kae lagona ne ia a koi nofo atu a ia i a latou.  Tela la, e iloa ne Ieova o faka‵sao a tino kolā e fakamaoni ki te Atua mai i olotou tofotofoga, kae ke tausi foki a tino amio ma‵sei ke fakaseai atu i te aso o te fakamasinoga, 10  maise eiloa a latou kolā e taumafai ke fakalai‵lai aka a foitino o nisi tino kae takalia‵lia ki pulega.* E se ‵poi latou kae loto ‵fika, e se ma‵taku o faifai muna atu ki tino tapu, 11  kae e tiga eiloa e ‵mana kae e ‵mafi atu a agelu, e se fakamasei atu latou ki a latou i pati faka‵mae loto, ona ko te lotou āva ki a Ieova. 12  Kae ko tino konei, e fai atu ne latou a pati faka‵mae loto e uiga ki mea kolā e se iloa ne latou, e pelā eiloa mo manu kolā e seai ne olotou mafaufau, e gasue‵sue fua e ‵tusa mo olotou lagonaga, kae ne fa‵nau mai ke ‵po aka latou, ko tamate atu ei. Ka fakaseai atu latou i olotou auala ma‵sei, 13  kae ka logo‵mae latou e pelā me se taui mō olotou auala ma‵sei. E maua ne latou te fiafia i te lotou ola i se olaga fakafiafia i te feitu faka-te-foitino i te ao malamalama. A latou ne pona mo lailaiga kae e fia‵fia* i olotou akoakoga faitogafiti i taimi e fai i ei otou fakaala. 14  E ma‵nako malosi latou o mulilua* kae e se mafai o taofi aka te lotou fai agasala, kae e fakalata ne latou a tino sē ma‵losi. Ne fakamasanigina olotou loto ke kaima‵nako. A latou ne tama‵liki o te malaia. 15  Ne tiaki ne latou te auala tonu, kae ne takitaki‵segina. Ne tau‵tali atu latou i te auala o Palaamo, te tama tagata a Posala telā ne fiafai ki te taui o te fai mea ‵se, 16  kae ne polopoloki ‵mafa a ia ona ko te sē fai ne ia o te mea tonu. Ne faipati atu te asini telā e seai sena leo e pelā me se leo o se tagata, kae ne taofi aka ei te malaga a te pelofeta valea tenā. 17  A mea konei ko vaipuna kolā ko ‵masa pakupaku, mo te ‵sau telā e agi ne se kaumatagi, kae ko oti ne fakatoka mō latou te ‵toe koga pouli tagataga. 18  Me e fai ne latou a pati fia ‵sili kolā e seai ne olotou aoga. Kae mai te fakatāua ne latou o manakoga o te foitino mo te amio matafatu mo te sē āva, ne fakalata ei ne latou a tino fatoā ‵sao aka eiloa mai i tino kolā e ola i se olaga fai mea ‵se. 19  E folafola atu ne latou te saolotoga ki tino konā, kae e ‵nofo eiloa latou e pelā me ne pologa ki amioga ma‵sei. Me ko so se tino e takavale i se isi tino ko fai ei a ia mo fai se pologa a te tino tenā. 20  Se mea tonu, me kafai ko oti ne fakasaoloto latou mai lailaiga o te lalolagi e auala i te iloa tonu o te Aliki mo te Fakaola ko Iesu Keliso, kae e toe aofia latou i mea eiloa konā kae taka‵vale i ei, ka sili atu te masei o te lotou ikuga fakaoti i lō te taimi muamua. 21  Me e ‵lei atu moi ne se iloa ne latou te auala o te amiotonu i lō te iloa ne latou kae toe ‵fuli keatea mai te fakatonuga tapu telā ne maua ne latou. 22  Ko oti ne fakataunu ki a latou te tugapati tenei: “Ko toe foki te kuli o kai ana luaga, a ko te puaka telā ko oti ne fakakoukou ko toe foki o takafilifili i te pela.”

Fakamatalaga mai lalo

 Io me “fakaseaoga ne latou a pulega.”
 Io me “aofia i fakafiafiaga sē pulea.”
 Io me “e ‵fonu olotou mata i te mulilua.”