Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

2 Petelu 1:1-21

1  Au ko Simona Petelu, se pologa kae se apositolo foki a Iesu Keliso, ki tino kolā ko oti ne maua ne latou te fakatuanaki, telā e ‵pau tena tāua mo te mea telā ko maua ne tatou,* e auala i te amiotonu o te ‵tou Atua mo te ‵tou Fakaola ko Iesu Keliso.  Ke gasolo aka faeloa o lasi atu te alofa tauanoa mo te filemu i luga i a koutou e auala i te iloa tonu o te Atua mo Iesu te ‵tou Aliki.  Me e auala i te ‵mana o te Atua ne tuku mai* ei ki a tatou a mea katoa kolā e maua ei te ola mo te fakamaoni ki te Atua, e auala i te iloa tonu o ia telā ne kalagagina ne ia tatou i te ‵malu mo te ‵lei.  E auala i mea konei ko oti ne tuku mai ne ia ki a tatou a folafolaga tāua kae ‵gali, ko te mea ke maua ei ne koutou a uiga o te Atua e auala i mea konei, me ko oti ne fakasaoloto koutou mai te masei o te lalolagi telā e tuku mai ne manakoga sē pulea.*  Ko te pogai eiloa tenei e ‵tau ei o fakapalele otou mafi o tuku atu ki te otou fakatuanaki te ‵lei, ki te otou ‵lei te poto,  ki te otou poto te loto pulea, ki te otou loto pulea te lotomau, ki te otou lotomau te fakamaoni ki te Atua,  ki te otou fakamaoni ki te Atua te alofa fakataina, ki te otou a‵lofa fakataina te alofa.  Me kafai e maua a mea konei i loto i a koutou kae e ‵fonu maligiligi koutou i ei, ka fai ei ne mea konei ke se paie koutou kae ke ‵fua mai koutou e uiga ki te iloa tonu o te ‵tou Aliki ko Iesu Keliso.  Me kafai e se maua a mea konei i so se tino, a ia e ‵kivi kae e ‵moe ana mata* ki te mainaga, kae ko puli i a ia tena faka‵maga mai i ana agasala i se taimi ko leva. 10  Ko te pogai eiloa tenei, e oku taina, ko sili atu ei te tāua ke fakamautinoa faka‵lei aka ne koutou te otou kalagaga mo te otou filifiliga; me kafai e fai faeloa ne koutou a mea konei ka se mafai eiloa o taka‵vale koutou. 11  E tonu, ka tuku atu eiloa te tauliaga lasi ke ulu atu koutou ki loto i te Malo se-gata-mai o te ‵tou Aliki mo te ‵tou Fakaola ko Iesu Keliso. 12  Tenei te pogai ka fakamasaua atu faeloa ne au a mea konei ki a koutou, e tiga eiloa e iloa ne koutou a mea konā kae ‵mautakitaki foki koutou i te munatonu tenā i loto i a koutou. 13  Kae e mafaufau au me se mea ‵tau, ke ‵fagu aka faeloa koutou e auala i fakamasauaga a koi nofo atu au i te faleie tapu* tenei, 14  ona ko toku iloa me ko pili o ave keatea toku faleie tapu tenei, e pelā eiloa mo te mea ko oti ne fakaasi manino mai ne te ‵tou Aliki ko Iesu Keliso ki a au. 15  Tela la, ka fai ne au te ‵toe mea e mafai o fai, ko te mea kafai ko fano au, ka masaua faeloa ne koutou a mea konei. 16  Ikai, ne seki fakaasi atu ne matou ki a koutou a tala ‵loi ne ‵fatu fakagali‵gali e uiga ki te ‵mana mo te fakatasi mai o te ‵tou Aliki ko Iesu Keliso, kae ona ko te mea ne molimau omotou mata ki tena ‵malu sili. 17  Me ne maua ne ia mai te Atua te Tamana te fakaaloalo mo te ‵malu, i te faiatuga o pati konei ki a ia mai tena ‵malu sili: “Tenei eiloa taku tama, ko taku fagasele telā ko oti ne talia ne au.” 18  E tonu, ne lagona ne matou a pati konei mai te lagi a koi ‵nofo matou mo ia i te mauga tapu. 19  Tela la, ne fakapa‵tonu mai i ei ki a matou te muna fakavaloaga, kae ka ‵lei koutou māfai e ‵saga ‵tonu atu koutou ki ei e pelā me se moli e maina atu i se koga pouli, (ke oko ki te mafāga o te ata mo te fanakaga o te fetu ao) i otou loto. 20  Me ne iloa muamua ne koutou te mea tenei, me e seai se valoaga i Tusitusiga Tapu ne maua mai i mafaufauga o tino. 21  Me ne seki tuku mai a valoaga i so se taimi i te loto eiloa o te tagata, kae ne fai‵pati mai a tāgata mai te Atua e auala i te takitakiga a te agaga tapu.

Fakamatalaga mai lalo

 Io me “e ‵pau tena tāua mo te mea telā i a tatou.”
 Io me “tuku mai e aunoa mo se ‵togi.”
 Io me “ko te fina ki ei.”
 Io me “toetoe tena kilo.”
 Telā ko tena “foitino a koi nofo a ia i te lalolagi.”