Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Kolinito 8:1-24

8  Nei la, e ma‵nako matou ke iloa ne koutou, e taina, e uiga ki te alofa tauanoa o te Atua telā ko oti ne tuku atu ki fakapotopotoga i Maketonia,  me mai lalo i tofotofoga ‵lasi i puapuaga e uke ne fia‵fia malosi latou, kae faitalia te lotou ma‵tiva malosi ne mau‵mea eiloa latou i te lasi o te lotou kaima‵lie.  E fakatalitonu atu ne au me e sili atu olotou mea ne fai i lō olotou mea ne ‵tau o fai,  me ne fakatagi mai faeloa latou ke maua ne latou se tauliaga ke ofo atu olotou meaalofa kae fai foki te lotou tusaga i te galuega mō te kau tapu.  E se gata fua i mea ne fakamoe‵moe matou ki ei, ne tuku muamua atu eiloa latou ki te Aliki kae fakamuli ifo ki a matou foki e ‵tusa mo te loto o te Atua.  Tela la, ne fakamalosi atu ei matou ki a Tito, me e pelā eiloa mo te taimi ne kamata ei ne ia a te galuega tenei i a koutou, e ‵tau foki o fakaoti faka‵lei ne ia te galuega alofa tenei mō koutou.  E ui i ei, e pelā eiloa mo te ‵fonu o koutou i mea katoa, i te fakatuanaki mo muna mo te iloa mo te loto naunau mo te motou a‵lofa ki a koutou, ke ‵fonu foki koutou i te faiga o te galuega alofa tenei.  E se fai atu ne au a te mea tenei e pelā me se fakatonuga, kae ke iloa ne koutou a te loto nau‵nau o nisi tino kae ke tofotofo aka foki te ‵tonu o te otou a‵lofa.  Me e iloa ne koutou a te alofa tauanoa o te ‵tou Aliki ko Iesu Keliso, me e tiga eiloa a ia se tino maumea, ne fai a ia mo fai se tino mativa mō koutou, ko te mea ke mau‵mea koutou e auala i tena mativa. 10  E fakaasi atu ne au toku manatu i te mea tenei: e fai te mea tenei mō te otou ‵lei, me i te tausaga ko teka ne seki kamata fua ne koutou a te galuega tenei kae ne fakaasi mai foki ne koutou a te otou loto fia‵fia o fai te galuega. 11  Nei la, ke fakaoti faka‵lei aka te mea telā ne kamata ne koutou, ko te mea ke fakaoti ne koutou a te mea telā ne toka koutou o fai e ‵tusa mo mea kolā e maua ne koutou. 12  Kafai e toka se tino o tuku atu ana mea, e faigofie ke talia te mea tenā e ‵tusa eiloa mo mea e maua ne te tino, kae e se ‵tusa mo mea kolā e se maua ne se tino. 13  Me e se manako au ke faigofie ki nisi tino, kae ke faigata ki a koutou; 14  kae e auala i se faifaiga paleni, e fakapaleni aka ei te sē lava o olotou mea ki mea a koutou kolā e ‵toe nei, ko te mea ke mafai foki o fakapaleni aka te sē lava o otou mea ki olotou mea e ‵toe, ko maua ei se tulaga paleni ‵lei. 15  E pelā eiloa mo pati i te tusi: “A te tino telā e uke ana mea e se tō uke ana mea, a ko te tino telā e mu‵tana ana mea e se tō mu‵tana foki ana mea.” 16  Ke fakafetai ki te Atua me ne tuku atu foki ne ia te loto naunau tenā mō koutou ki te loto o Tito, 17  me ko oti eiloa ne saga faka‵lei mai a ia ki te fakamalosiga tenā, kae ona ko tena loto naunau tenā, ko fanatu ei a ia i a ia eiloa ki a koutou. 18  Kae ko uga atu ne matou a ia fakatasi mo te taina telā e lauiloa i fakapotopotoga katoa ona ko te tala ‵lei. 19  E se gata i ei, kae ne fakasopo aka foki a ia ne fakapotopotoga ke fai mo fai te motou taugasoa faimalaga ke tuku atu a te meaalofa kaimalie tenei mō te vikiga o te Aliki kae ke fakatalitonu aka foki ei te motou toka o fesoasoani atu. 20  Tela la, e se ma‵nako matou ke fameo se tino ki a matou e uiga ki te tufaatuga o te meaalofa telā ne tuku mai ki a matou ke tufa atu. 21  Me “e tausi ne matou a mea katoa mo te fakamaoni, e se gata fua i mua o Ieova, kae e pelā foki i mua o tino katoa.” 22  E se gata i ei, e uga atu ne matou fakatasi mo latou a te motou taina telā ko oti ne fakatalitonu aka ne matou me e loto naunau i mea e uke, kae nei la ko lasi atu tena loto naunau ona ko te lasi o tena loto talitonu ki a koutou. 23  Kae kafai e isi se fakalotolotolua e uiga ki a Tito, a ia ko toku taugasoa telā e ga‵lue fakatasi māua mō otou manakoga; io me kafai e isi ne mea e fakafesiligina i ei a omotou taina, a latou ko apositolo ki fakapotopotoga mō te vikiga o Keliso. 24  Tela la, ke fakaasi atu a te otou a‵lofa ko te mea ke iloa ne latou te pogai ne tavae ei ne matou a koutou ki fakapotopotoga katoa.

Fakamatalaga mai lalo