Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Kolinito 7:1-16

7  Tela la, ona ko te mea ko maua ne tatou a folafolaga konei, e aku fagasele, ke faka‵ma la tatou mai i so se mea e fakalailai ei te foitino mo te agaga, ke katoatoa ei te ‵tou tulaga tapu i te ma‵taku ki te Atua.  Fakaavanoa se koga mō matou i otou loto. E seai se motou mea ‵se ne fai ki se tino. Ne seki fakamasei ne matou se tino, kae e seki fakaloiloi foki ne matou se tino.  E se fai atu ne au te mea tenei ke fakamasei atu ei ki a koutou. Ko oti ne fai muamua atu au me e ‵nofo koutou i omotou loto ko te mea ke ola fakatasi tatou kae ke ‵mate fakatasi foki tatou.  E lasi toku saolotoga o faipati atu ki a koutou. E lasi toku fakamatamata ona ko koutou. E ‵fonu toku loto i fakamafanafanaga, e ‵fonu maligiligi toku loto i te fiafia i omotou puapuaga katoa.  E tonu, i te motou okoatuga ki Maketonia, e seai eiloa se motou fakatapūga ne maua i ei, kae ne logo‵mae faeloa matou i feitu katoa—ko taua mai tino i tua, kae ne ma‵taku foki matou.  E tiga te feitu tenā, ne fakamafanafana matou ne te Atua telā e fakamafanafana ne ia a tino loto vāi‵vai e auala i te fakatasi mai o Tito.  E se gata fua i tena fakatasi mai, kae e auala foki i fakamafanafanaga ne maua ne ia ona ko koutou. Ne fakailoa mai ne ia a te otou loto naunau ke lavea ne koutou au, te lasi o te otou loto fanoa‵noa, mo te otou manava‵se e uiga ki a au; telā ko silia atu ei toku fiafia.  Tela la, kafai ne fakafanoanoa atu au ki a koutou i taku tusi, e se salamō au i ei. Kafai foki loa ne salamō au i ei i te taimi muamua, (ne lavea ne au me ne fakafanoanoa atu ki a koutou te tusi tenā, kae mō se taimi toetoe fua,)  kae nei la, ko fiafia au, e se ona fua ko te otou fanoa‵noa, kae ona ko te otou fanoa‵noa me i a koutou ko sala‵mo. Me i a koutou ne fanoa‵noa i te auala telā e fetaui ‵lei mo te loto o te Atua, ko te mea ke se logo‵mae koutou i se mea mai i a matou. 10  Me i te fanoanoa i te auala e fetaui mo te loto o te Atua e iku atu ki te salamō mo te fakaolataga telā e se fakafanoanoa. Kae ko te fanoanoa o te lalolagi e iku atu eiloa ki te mate. 11  Onoono la ki te lasi o te ‵lei telā ne maua ne koutou ona ko te otou fanoa‵noa i te auala telā e fetaui ‵lei mo te loto o te Atua, ke taku ‵lei koutou; ko te ita; ko te mataku; ko te olioli malosi; ko te loto finafinau; ko te fakatonuga o te mea ‵se! E fakaasi mai ne koutou i a koutou ko ‵ma i feitu katoa konei. 12  E tiga eiloa ne tusi atu au ki a koutou, ne seki fai fua ne au mō te tino telā ne fai ne ia te mea ‵se, io me ko te tino ne fai ki ei a te mea ‵se, kae ke fakaasi mai ei a te lasi o te otou taumafai o faka‵logo ki omotou pati i mua o te Atua. 13  Tenā te pogai ko fakamafanafanagina ei omotou loto. Kae i tafa o omotou fakamafanafanaga, ko lasi atu foki a te motou fia‵fia ona ko te fiafia o Tito, me ko oti ne fakafou aka ne koutou tena agaga. 14  Me kafai ko oti ne tavae ne au koutou ki a ia, e se mā au i ei. E pelā eiloa mo te ‵tonu o mea katoa kolā ne fakailoa atu ne matou ki a koutou, e penā foki te ‵tonu o omotou tavaega ne fai ki a Tito. 15  E se gata i ei, ko lasi atu tena alofa atafai ki a koutou, me e masaua ne ia te faka‵logo o koutou katoa, mo te auala ne fakafeiloai ei koutou ki a ia mo te fakaaloalo lasi. 16  E fiafia au me ko mafai o fakamalosi aka toku loto i feitu katoa ona ko koutou.

Fakamatalaga mai lalo