Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Kolinito 5:1-21

5  E iloa ne tatou me kafai e fakaseai atu te ‵tou fale i te lalolagi nei, telā ko te faleie tenei, ka maua ei ne tatou se fale mai te Atua, se fale telā ne seki faite ki lima, kae se fale i te lagi telā ka tumau ki te se-gata-mai.  Me e manava fi‵ta eiloa tatou i te fale tenei, kae e olioli faeloa tatou ke na ‵nofo atu tatou i te ‵tou koga ‵nofo i te lagi,  ko te mea kafai ko ‵pei tatou ki ei, ko se ‵nofo fuafua ei tatou.  E tonu, e manava fi‵ta kae loto mafatia tatou i loto i te faleie tenei; me e se ma‵nako tatou o tapale keatea te mea tenei, kae ke ‵pei ki te suā mea, ko te mea ke mafai o sui te mea telā e mafai o mate ki te ola.  Kae ko te tino telā ne fakatoka ne ia a te mea tenei mō tatou ko te Atua eiloa, telā ne tuku mai ne ia ki a tatou a te agaga mo fai se fakatalitonuga o te mea telā ka oko mai, telā ko tena agaga.  Tela la, e loto ma‵losi faeloa tatou kae e iloa atu foki me i te taimi koi ‵nofo ei tatou i te ‵tou fale faka-te-foitino tenei, e se ‵nofo fakatasi tatou mo te Aliki,  me i a tatou e sa‵sale eiloa i te fakatuanaki kae e se i mea e lavea ki mata.  E loto ma‵losi tatou kae e fia‵fia foki ke ‵nofo fakatasi mo te Aliki, i lō te ‵nofo i te foitino tenei.  Tela la, faitalia me e ‵nofo fakatasi tatou mo ia io me e ‵galo tatou mai i a ia, a te ‵tou fakamoemoega, ko te taumafai ke talia tatou ne ia. 10  Me e ‵tau o ‵tu atu tatou katoa i mua o te nofoga fakamasino o Keliso, ko te mea ke ‵togi atu ki tino taki tokotasi e ‵tusa mo olotou faifaiga a koi ‵nofo atu latou i te foitino, faitalia me ne mea ‵lei io me ne mea ma‵sei. 11  Tela la, ona ko te mea e iloa ne tatou o ma‵taku ki te Aliki, e tumau faeloa tatou i te fakamalosi atu ki tino, kae ko lavea mai tatou ne te Atua. Kae e fakamoemoe foki au me ko iloa ne koutou a matou i otou loto lagona. 12  E se toe fakaasi atu ne matou ki a koutou me ko oi matou, kae e tuku atu fua ne matou se fakamalosiga ke fakamata‵mata ei koutou i a matou, ko te mea ke mafai o isi se otou tali e fai atu ki a latou kolā e fakamata‵mata i foliga i tua kae e se ko mea i te loto. 13  Me kafai e ma‵sei omotou mafaufau, e fai eiloa penā mō te Atua; kafai e ‵lei omotou mafaufau, e fai eiloa penā mō koutou. 14  Me ne fakamalosi mai te alofa o Keliso ki a matou, ona ko te fakaikuga tenei ko oti ne fai ne matou, me ne mate te tagata e tokotasi mō tino katoa; ona ko te mea ko ‵mate a tino katoa; 15  kae ne mate a ia mō tino katoa ko te mea ko tino kolā e ola ke se toe ola mō latou eiloa, kae mō ia telā ne mate mō latou kae toe fakatu aka. 16  Tela la, mai te taimi tenei o fano ki mua ko se toe iloa ne tatou se tino mai te kilokiloga faka-te-foitino. Kafai foki eiloa ne iloa ne tatou a Keliso e pelā me se tino, ko se mafai nei o iloa ne tatou a ia i te auala tenei. 17  Tela la, kafai e isi se tino e ‵kau fakatasi mo Keliso, ko fai ei a ia mo fai se mea fou ne faite; ko palele atu a mea mua. Kiloke! ko oti ne oko mai a mea ‵fou. 18  Kae ko mea katoa ne maua mai i te Atua telā ne faka‵lei ne ia te ‵tou fesokotakiga mo ia e auala i a Keliso kae tuku mai ne ia ki a matou te galuega o te faka‵leiga tenā. 19  Ko te faka‵leiga ne te Atua a te lalolagi ki a ia e auala i a Keliso. E se fakamau ne ia olotou agasala, kae ne tuku mai ne ia ki a matou a te galuega o te faka‵leiga tenā. 20  Tela la, a matou ko sui kolā e sui ei ne matou a Keliso, e pelā eiloa me e fakatagi atu te Atua e auala i a matou. E pelā me ne sui o Keliso e fakatagi atu matou penei: “Ke faka‵lei aka koutou mo te Atua.” 21  A te tino telā ne seki iloa ne ia te agasala, ne fai ne te Atua ke fai e pelā me se taulaga mō ‵tou agasala, ko te mea ke maua ei ne matou se tulaga amiotonu i mua o te Atua, e auala i a ia.

Fakamatalaga mai lalo