Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Kolinito 12:1-21

12  E ‵tau mo au o fakamatamata. E se aoga te mea tenei; kae ka saga atu au ki fakaasiga fakavavega a te Aliki.  E iloa ne au se tagata telā se soko o Keliso, i te sefulufa tausaga ko ‵teka ne avaka ki luga i te lagi tuatolu. E se iloa ne au me ne avaka i te foitino io me ikai, ko te Atua e iloa ne ia.  E tonu, e iloa ne au se vaegā tagata penā—me ne avaka i te foitino io me ikai, e se iloa ne au, ko te Atua e iloa ne ia—  telā ne avaka ki loto i te palataiso kae ne lagona ne ia a pati kolā e se mafai o faipatigina, kae e se ‵tau o faipati ki ei se tino.  Ka fakamatamata au e uiga ki te tagata tenei, kae ka se fakamatamata au e uiga ki a au eiloa, kae vagana fua ko oku vāivāiga.  Me kafai foki loa e manako au o fakamatamata, e se ko tena uiga i a au se tino valea, me e faipati atu ne au te mea tonu. Kae ka se fai eiloa au penā, ko te mea ke seai se tino e tavae ne ia au kae na ko mea fua kolā ne lavea kae lagona tonu ne ia mai i a au,  ona fua ko te mauaga o fakaasiga fakaofoofogia penā. Tela la, ko te mea ke mo a ma tō silia toku fakamatamata, ne tuku mai ei ki a au se mea makaikai ki toku foitino, se agelu a Satani, ke laupāpā faeloa ne ia au, ko te mea ke se tō silia toku fakamatamata.  Tela la, ne fakatagi atu ei au ki te Aliki fakatolu taimi e uiga ki te mea tenei, ko te mea ke ave keatea mai i a au.  Kae ne fai mai a ia ki a au: “A toku alofa tauanoa ko lava loa mō koe; me i toku ‵mana e katoatoa ‵lei i taimi e vāivāi ei koe.” Tela la, ka fakamatamata au mo te fiafia i oku vāivāiga, ko te mea ke tumau te ‵mana o Keliso i luga i a au e pelā me se faleie. 10  Tela la, ka fiafia au i oku vāivāiga, i pati faka‵mae loto, i taimi e se lava ei aku mea, i fakasauaga mo mea faiga‵ta mō Keliso. Me ko te taimi e vāivāi ei au, ko te taimi foki tenā e malosi ‵ki ei au. 11  Ko oti ne fai au pelā me se tino valea. Ne fakamalosi ne koutou au ke fai penā, me ne ‵tau o taku ‵lei ne koutou au. Me i a au e sē se tino fatauva, i se mea e tasi, māfai e faka‵tusa au ki otou apositolo fia ‵sili, e tiga eiloa e seai soku aoga. 12  Se mea tonu me ne fakaasi atu ki a koutou a fakailoga o te apositolo e auala i te lasi o te kufaki, e pelā foki mo fakailoga mo mea fakaofoofogia, mo galuega ‵mana. 13  I te feitu fea ne fai ei koutou e pelā me ne tino fatauva māfai e fakatusa ki nisi fakapotopotoga? Me i a au ne seki fai mo fai se amoga ‵mafa ki a koutou. A koutou ke a‵lofa kae ke fakamagalo mai foki taku mea ‵se tenei. 14  Kiloke! Tenei te tolu o taimi ko toka ei au o fanatu ki a koutou, kae ka se fai au mo fai se amoga ‵mafa ki a koutou. Me i a au e se ‵sala atu ki otou mea, kae ki a koutou; me e se ‵tau o fakamoe‵moe a tama‵liki ke fakaputu aka a mea mō olotou mātua, ka ko mātua mō olotou tama‵liki. 15  Kae e pelā mo au, e fiafia malosi au o fakaaoga aku mea katoa mo toku malosi kātoa mō koutou. Kafai e lasi toku alofa mō koutou, e a, e ‵tau fua o foliki te otou a‵lofa mai ki a au? 16  E ui i ei, e seki fai au mo amoga ‵mafa ki a koutou. Kae e fai mai koutou i a au e “faitogafiti” kae ne ‵po ne au koutou i se “auala faitogafiti.” 17  E a, ne faka‵se ne au koutou e auala i a latou kolā ne uga atu ne au ki a koutou? 18  Ne fakamalosi ne au a Tito kae ne uga atu ne au se isi taina ke olo atu mo ia. E a, ne takolekole koutou ne Tito? E a, e seki sa‵sale katoa matou i te agaga e tasi tenā? Mo te auala e tasi tenā? 19  E mata, ne mafau‵fau faeloa koutou me ko taumafai matou o ‵pulu matou ki a koutou? E fai‵pati atu matou i mua o te Atua i te ‵kau fakatasi mo Keliso. Taina fagasele, e fai atu ne matou a mea katoa konei ke fakama‵losi aka ei koutou. 20  Me e tai mataku loa au, me kafai e oko atu au, kāti ka se maua atu ne au koutou e pelā mo te mea e fakamoemoe au ki ei kae ka se maua ne koutou au e pelā mo te mea e fakamoe‵moe koutou ki ei, kae kāti ka maua mai i ei a kinauga, te loto masei, te loto ita, finauga, te fatufatu, ko pati musu‵musu, ko tino e ‵fonu i te fakamata‵mata, mo mavae‵vaega. 21  Kafai e toe foki atu au, kāti ka fakamasiasi au ne te Atua i mua o koutou, kae kāti ka mafatia toku loto i te fanoanoa i luga i tino e tokouke kolā ne agasala kae ne seki sala‵mo i olotou amioga lai‵lai, amioga fakatauavaga sē ‵tau mo amioga matafatu kolā ne fai ne latou.

Fakamatalaga mai lalo