Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

2 Kolinito 1:1-24

1  Au ko Paulo, se apositolo a Keliso Iesu e ‵tusa eiloa mo te loto o te Atua, fakatasi mo Timoteo te ‵tou taina. Au e tusi atu ki te fakapotopotoga a te Atua i Kolinito, e pelā foki mo tino tapu katoa i Akaia kātoa.  Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.  Ke vikia te Atua telā ko te Tamana o te ‵tou Aliki ko Iesu Keliso, te Tamana o te alofa fakamagalo. Ko ia foki ko te Atua o fakamafanafanaga katoa,  kae e fakamafanafana mai a ia ki a tatou i ‵tou puapuaga katoa, ko te mea ke mafai o fakamafanafana atu tatou ki nisi tino kolā e pokotia i so se puapuaga e auala i fakamafanafanaga kolā e maua ne tatou mai te Atua.  Me e pelā eiloa mo te uke o logo‵maega e maua ne tatou mō Keliso, e penā foki te uke o fakamafanafanaga e maua ne tatou e auala i a Keliso.  Tela la, kafai e puapuagatia matou, e fai te mea tenā mo fai te otou fakamafanafanaga mo te otou fakaolataga. Kafai e fakamafanafanagina matou, e fai te mea tenā mo fai te otou fakamafanafanaga telā e galue o fesoasoani atu ke maua ne koutou te loto kufaki i logo‵maega kolā e pokotia foki ei matou.  Tela la, e ‵mautakitaki eiloa te motou fakamoemoega mō koutou, me e iloa ne matou te otou ‵kau fakatasi i logo‵maega, ka penā foki te otou ‵kau fakatasi i fakamafanafanaga.  Me e se ma‵nako matou ke se iloa ne koutou, e oku taina, a puapuaga kolā ne fe‵paki mo matou i te atufenua o Asia, me ne silia atu a te fakamataku o te motou tulaga i lō te motou malosi o kufaki i ei, kae ne fakalotolotolua malosi matou e uiga ki omotou ola.  E tonu, ne oko ifo ki a matou a te lagonaga me ko maua ne matou te fakasalaga ki te mate. Ne tupu te mea tenei ko te mea ke se tali‵tonu matou ki a matou eiloa, kae ke tali‵tonu matou ki te Atua telā ka faka‵tu aka ne ia a tino ‵mate. 10  Ne faka‵sao eiloa ne ia matou mai te tulaga fakamataku o te mate, kae e tali‵tonu matou me ka faka‵sao faeloa ne ia matou. 11  E mafai foki o fesoasoani mai koutou e auala i otou ‵talo mō matou, ko te mea ke tokouke a tino e fakafetai atu mō matou ke maua ei ne matou te taui ona ko ‵talo a tino e tokouke. 12  A te mea telā e fakamata‵mata kae e molimau foki ki ei omotou loto lagona, ko te auala ne ola ei matou i te lalolagi, kae maise eiloa mō koutou i te ‵malu mo te fakamaoni, e se i poto o tāgata kae mai i te alofa tauanoa o te Atua. 13  Me e se tusi atu ne matou ki a koutou e uiga ki se isi mea kae na ko mea kolā ko leva ne iloa ‵lei kae talia foki ne koutou. Kae e fakamoemoe au ke talia faeloa ne koutou a mea konei ke oko eiloa ki te gataga, 14  e pelā eiloa mo nai mea kolā ko oti ne talia ne koutou, me ko fai matou mo pogai e fakamata‵mata ei koutou, e pelā eiloa mo te fakamata‵mata o matou e uiga ki a koutou i te aso o te ‵tou Aliki ko Iesu. 15  Tela la, ne manako au o fanatu ki a koutou mo te loto malosi i te taimi muamua, ko te mea ke toe maua se taimi e fia‵fia ei koutou. 16  Kae ke ‵nofo malie aka tatou ko fano ei au ki Maketonia, kae toe foki mai ki a koutou mai Maketonia, ko olo fakatasi ei tatou mō se taimi toetoe ko faka‵soko atu ei taku malaga ki Iuta. 17  Tela la, i te faiga o taku fakaikuga tenā, e a, ne manatu māmā au ki ei? E a, e se fai ne au a fuafuaga e pelā me se tagata, ko te mea ke fai atu au “Ao, Ao” kae fakamuli ko fai atu “Ikai, Ikai”? 18  A te Atua e fakamaoni ko te mea ke se fai te motou Ao mo fai te motou Ikai. 19  Me i te Tama a te Atua, ko Keliso Iesu, telā ne talai atu ki a koutou, e auala i a matou, ko tena uiga ko matou mo Suliano* mo Timoteo, ne seki fai mo fai te Ao kae fakamuli ifo ko te Ikai i te feitu tenei. 20  Me faitalia te uke o folafolaga a te Atua ne fai mai, ne fai katoa eiloa mo fai te Ao e auala i a ia. E auala foki i a ia ne fai atu ei matou penei “Amene” ki te Atua, e avatu ei ki a ia a te ‵malu e auala i a matou. 21  Kae ko te tino telā ne fakamautinoa aka ne ia koutou mo matou ke fai mo tino o Keliso, ko te tino foki telā ne fakaeke ne ia tatou, ko te Atua eiloa. 22  Ko oti foki ne avatu ne ia tena fakamailoga ki luga i a tatou kae fakatalitonu mai ki a tatou e uiga ki te mea telā ka oko mai, ko te agaga i loto i ‵tou loto. 23  Nei la, e molimau atu au ki a koutou i mua o te Atua me ka se fanatu au ki Kolinito ko te mea ke se fanoa‵noa koutou. 24  E se fakauiga i ei i a matou e fia pule atu ki te otou fakatuanaki, kae ko matou ne tino e ga‵lue fakatasi mo koutou mō te otou fia‵fia, me ko te otou fakatuanaki eiloa tenā e ‵tu ei koutou.

Fakamatalaga mai lalo

 Io me ko “Sila.”