Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Timoteo 6:1-21

6  E ‵tau o tumau a pologa i te āva katoatoa ki olotou matai, ko te mea ke mo a ma taku fakamaseigina te igoa o te Atua mo ana akoakoga.  E se gata i ei, ke mo a ma se āva a pologa ki olotou matai kolā ne tino tali‵tonu, ona ko latou ne taina. I lō te fai penā, e ‵tau ke toka latou o ga‵lue malosi me i tino kolā e maua ne latou a fua o olotou galuega ‵lei, ne tino tali‵tonu kae fagasele. Tumau i te akoako atu o mea konei kae tuku atu a fakamalosiga.  Kafai e akoako atu ne se tino se isi akoakoga kae se tautali i akoakoga ‵tonu mai te ‵tou Aliki ko Iesu Keliso, io me ko akoakoga e ‵tusa mo te taviniga ki te Atua,  a te tino tenā ko ‵fete i te fakamatamata, kae e seai sena mea e tasi e iloa. E valea te tino tenā ki kinauga mo te fia poto ki uiga o pati. E iku atu a mea konei ki te loto masei, taua, pati faka‵mae loto, mo masalosaloga ma‵sei,  ko kinauga e uke e uiga ki tamā mea fua mai tino kolā ko ma‵sei olotou mafaufau kae ko galo i a latou te munatonu, kae e mafau‵fau latou me ka uke olotou mea e maua mai te taviniga ki te Atua.  Kae ko te ‵tonuga loa, e uke a mea e maua mai te taviniga ki te Atua māfai e lotoma‵lie tatou ki mea kolā ko maua ne tatou.  Me e seai se mea ne aumai ne tatou ki te lalolagi, kae e seai foki se mea e ave ne tatou keatea mai i ei.  Tela la, kafai ko maua a ‵tou meakai mo ‵tou gatu, ke lotoma‵lie eiloa tatou i ei.  Kae ko tino kolā e ma‵nako ke mau‵mea latou e ‵to atu ki te fakaosoosoga mo te malei mo manakoga sē aoga kae fakalogo‵mae, kolā e fakamasei kae fakaseai atu i ei a latou. 10  Me i te manako ki tupe ko te māfuaga tenā o mea ma‵sei katoa. Kae ko nisi tino kolā e va‵lea ki ei ko oti ne ‵to ki tua mo te fakatuanaki kae ko fati‵fati nei olotou loto i puapuaga e uke. 11  A ko koe, e te tagata o te Atua, tele keatea mai mea konei. Kae ‵sala atu ki te amiotonu, te fakamaoni ki te Atua, te fakatuanaki, te alofa, te kufaki mo te agamalu. 12  Taua atu i te taua ‵lei o te fakatuanaki. Puke ‵mau ki te ola se-gata-mai telā ne kalagagina ei koe kae folafola atu ne koe ki tino katoa i mua o molimau e tokouke. 13  E fakatonu atu au i mua o te Atua, telā e tausi ne ia a mea katoa ke ola, mo Keliso Iesu, telā ne tuku atu ne ia se molimau ‵lei i mua o tino katoa ki a Ponitio Pilato, 14  ke fakalogo koe ki te fakatonuga tenei e aunoa mo se pona mo se fakamaseiga ke oko eiloa ki te taimi e fakaasi mai ei te ‵tou Aliki ko Iesu Keliso. 15  Ka fakaasi mai i te taimi tonu a te tino telā ko te Pule fua e tokotasi kae fiafia, telā ko te Tupu o latou kolā ka pule e pelā me ne tupu. Ko ia foki ko te Aliki o latou kolā ka pule e pelā me ne aliki. 16  Ko ia fua e tokotasi telā e se mafai o mate, kae e nofo i te mainaga telā e se mafai o oko ki ei a tino, kae e seai se tino kai lavea io me e mafai o lavea ne ia. Ke i luga i a ia te fakaaloalo mo te ‵mana ki te se-gata-mai. Amene. 17  Fakatonu atu ki tino kolā e mau‵mea i te olaga tenei ke mo a ma fakamaua‵luga, kae ke fakavae te lotou fakamoemoega, e se ki luga i koloa sē mautinoa, kae ki luga i te Atua, telā e tuku mai ne ia ki a tatou a mea katoa ke fia‵fia ei tatou. 18  Fai ki ei ke ga‵lue ki mea ‵lei, ke mau‵mea i te faiga o galuega ‵lei, ke kaima‵lie, ke toka o fetufaaki olotou mea, 19  ko tausi ei mō latou eiloa se fakavae ‵lei i aso mai mua, ko te mea ke puke ‵mau latou ki te ola tonu. 20  Timoteo, puipui faka‵lei te mea telā ne tuku atu ki a koe, ‵kalo keatea mai pati sē aoga kolā e fakamasei atu ki te mea tapu mo te ‵numi o mea kolā e fakaigoa ‵se ki te “poto.” 21  Ko oti ne ‵to keatea a nisi tino mai te fakatuanaki ona ko te fakamata‵mata ki te vaegā poto tenei. Ke i luga i a koutou katoa te alofa tauanoa o te Atua.

Fakamatalaga mai lalo