Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Timoteo 5:1-25

5  Sa sona fakamasei ne koe se tagata matua. I lō te fai penā, ke saga atu ki a ia e pelā eiloa me se tamana o koe, a ko tāgata tai fo‵liki ifo e pelā me ne ou taina,  a ko fāfine ma‵tua e pelā me ne ou mātua, a ko fāfine tai fo‵liki ifo e pelā me ne ou tuagane fakatasi mo te loto ‵ma katoatoa.  Ke saga tonu atu ki fāfine ko ‵mate olotou avaga kolā e ma‵nako ki se fesoasoani.*  Kafai e isi ne tama‵liki io me ne mokopuna o se fafine ko mate tena avaga, fai ke iloa muamua ne latou o fai te taviniga ki te Atua i olotou kāiga mai te ‵toe taui atu ki olotou mātua mo olotou tupuna a mea e ‵tau o maua ne latou, me tenei eiloa te mea e loto ki ei te Atua.  A te fafine telā ko mate tena avaga kae e tiakina fua ke fakaalofa, ko oti ne tuku atu tena fakamoemoega ki te Atua kae e tumau i te fakatagi kae ‵talo atu i te po mo te ao.  Kae ko te fafine telā e fia fakafiafia atu ki tena foitino, e tiga eiloa koi ola tou fafine kae ko mate a ia.  Tela la, tumau i te tukuatuga o fakatonuga konei ko te mea ke seai ne tala sē ‵lei e fai ki a latou.  Se mea mautinoa me ko so se tino e se tausi ki tena kāiga, kae maise eiloa a tino o tena kāiga tonu, ko tiaki ne ia te fakatuanaki kae ko masei atu tou tagata i lō te tino telā e seai sena fakatuanaki.  E mafai o fakamau te igoa o te fafine ko mate tena avaga telā ko oti ne kātoa tena onosefulu tausaga, kae ne fakamaoni* ki tena avaga, 10  kae e lauiloa i te faiga o galuega ‵lei, māfai ne puti aka faka‵lei ne ia ana tama‵liki, māfai ne talimalo sale ne ia a tino, māfai ne mulumulu ne ia a vae o tino tapu, māfai ne fesoasoani atu ki tino loto mafatia, kae toaga o fai a galuega ‵lei katoa. 11  I te suā feitu, sa fakamaugina a igoa o fāfine kolā koi tai fo‵liki kae ko oti ne ‵mate olotou avaga me kafai ko fakalavelave atu olotou manakoga fakatauavaga ki te lotou taviniga ki a Keliso, ko ma‵nako ei ke toe a‵vaga latou. 12  Ka fakamasinogina latou me ko oti ne tiakina ne latou te lotou fakamoemoega* muamua. 13  E fai foki ne latou ke seai ne olotou mea e fai, kae e olo sale faeloa mai te fale e tasi ki te suā fale; e tonu, e se gata fua i te sē ga‵lue, kae e gutu fai‵tala kae sona ‵kau atu fua ki mea a nisi tino kolā e seai eiloa se lotou fekau i ei. 14  Tela la, au e manako ke a‵vaga a fāfine tai fo‵liki kolā ko ‵mate olotou avaga, ke fai ne olotou tama‵liki, ke tausi ki olotou kāiga, ko te mea ke seai se avanoaga mō te tino ‵teke ke fakamasei atu ki a latou. 15  Se mea tonu me ko leva ne ‵fuli keatea a nisi tino o tau‵tali atu i a Satani. 16  Kafai e isi se fafine talitonu e kāiga mo fāfine ko ‵mate olotou avaga, fai ki ei ke fesoasoani atu ki a latou, ko te mea ke se fakalavelave atu ki te fakapotopotoga. E mafai fua o fesoasoani atu te fakapotopotoga ki fāfine ko ‵mate olotou avaga kolā e ma‵nako ‵tonu ki se fesoasoani. 17  Ke fakalasi aka te āva ki tāgata ma‵tua kolā e fai ne latou te takitakiga i se auala ‵lei, maise eiloa a latou kola e ga‵lue malosi i te fai‵pati mo te faiga o akoakoga. 18  Me e fai mai penei i tusitusiga tapu: “E se ‵tau o ‵sai ne koe te gutu o te pulumakau tagata māfai e lakalaka ne ia a saito ke faka‵ma ei a mea konā”; kae e toe fai mai foki penei: “E ‵tau o maua ne te tino galue tena ‵togi.” 19  Ke se talia ne koe se ‵losiga e uiga ki se tagata matua seiloga ke isi ne molimau e tokolua io me e tokotolu. 20  Polopoloki i mua o tino katoa a tino kolā e fai faeloa ne latou te agasala, ko te mea ke fai mo akoakoga ki nisi tino.* 21  E fakatonu atu au ki a koe i mua o te Atua mo Keliso Iesu mo agelu filifilia, ke tausi ne koe a fakatonuga konei e aunoa mo te fapito mo te fakailoga tino. 22  Ke mo a e fakaeke fakavave atu ou lima ki luga i se tagata;* io me e aofia koe i agasala a nisi tino. Tausi faeloa a koe ke ‵ma. 23  Sa inu fua ki vai, kae inu foki ki ne mu uaina ke ‵lei ei tou tinae e pelā foki mo masaki e masaki ‵soko ei koe. 24  A agasala a nisi tino e iloa ne tino katoa, kae ka fakamasino fakavave latou. Kae ko agasala a nisi tino, e ‵sae fakamuli aka. 25  E penā foki te iloa ne tino katoa a galuega ‵lei, a ko galuega ‵lei kolā e seki iloa ne tino e se mafai o ‵funa.

Fakamatalaga mai lalo

 Ko fāfine kolā ko ‵mate olotou avaga kae seai ne tino ke tausi atu ki a latou.
 I te ‵gana Eleni, “se fafine e tokotasi tena avaga.”
 I te ‵gana Eleni, ko “te fakatuanaki muamua.”
 Io me “ke ma‵taku a nisi tino.”
 Ke mo a e fakasopo fakavave ne koe se tagata ki se tofiga.