Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Timoteo 3:1-16

3  E tonu eiloa te fakamatalaga tenei. So se tagata e fia maua ne ia te tofi ko te ovasia, e manakogina ke fai ne ia a galuega ‵lei.  Tela la, a te ovasia e se ‵tau o taku fakamaseigina ne tino, e tokotasi tena avaga, e ‵lei ana uiga, e ‵lei tena mafaufau, e tokagamalie ana mea e fai, e uiga talimalo, e poto i te akoako atu,  e sē se tino e konā sale, e se amio fakasaua, kae e loto malamalama, e se kinau valea, e sē se tino e valea ki tupe,  se tagata telā e tausi ki tena kāiga i se auala ‵lei, kae e isi ne ana tama‵liki kolā e faka‵logo kae e ‵lei olotou amioga;  (kafai e se iloa ne se tagata o tausi faka‵lei atu ki tena kāiga, e mafai la pefea o tausi ne ia te fakapotopotoga a te Atua?)  e sē se tagata fatoā ‵fuli, i te mea ma ‵fete i te fakamatamata kae tō atu ki te fakamasinoga telā ko oti ne fai ki luga i te Tiapolo.  E se gata i ei, e ‵tau foki o maua se fakamaoniga ‵lei mai tino i tua e uiga ki a ia, ko te mea ke mo a ma taku fakamaseigina a ia kae tō atu ei ki te malei a te Tiapolo.  E ‵tau foki o ma‵tua ‵lei a tavini fesoasoani, e se gutugutulua, e se inu malosi ki uaina, e se kaimanako ke maua ana mea i se auala sē tonu,  e puke ‵mau ki te akoakoga ‵funa kae tapu o te fakatuanaki mo te loto lagona ‵ma. 10  E se gata i ei, e ‵tau o tofotofo muamua latou, kafai ko ‵tau ko fai ei ke ga‵lue e pelā me ne tavini, me ko saoloto latou mai so se ‵losiga. 11  E ‵tau foki a fāfine o ma‵tua ‵lei, e se gutu fatufatu, e ‵lei olotou uiga, e fakamaoni i mea katoa. 12  E ‵tau o taki tokotasi a avaga a tavini fesoasoani, e tausi atu ki olotou tama‵liki mo olotou kāiga i se auala ‵lei. 13  Me i tāgata kolā e tavini atu i se auala ‵lei ka maua eiloa ne latou se tulaga ‵lei mo te saolotoga lasi ke fai‵pati atu i te fakatuanaki e uiga ki a Keliso Iesu. 14  E tusi atu ne au a mea konei ki a koe, kae e fakamoemoe au o fanatu ki a koe i se taimi pili mai mua nei, 15  kae kafai e tai tuai atu au, a ko iloa ne koe te auala e ‵tau ei o ola koe i loto i te kāiga o te Atua, telā ko te fakapotopotoga a te Atua ola, ko te pou mo te ‵lago o te munatonu. 16  Se mea tonu me e tāua ‵ki eiloa a te akoakoga ‵funa kae tapu o te taviniga tenei ki te Atua: ‘Ne fakaasi mai a ia i te foitino, ne taku amiotonugina i te agaga, ne fakaasi atu ki agelu, ne talai atu e uiga ki a ia i fenua katoa, ne tali‵tonu ki ei te lalolagi, kae ne talia a ia i luga i te lagi mo te ‵malu.’

Fakamatalaga mai lalo