Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Timoteo 1:1-20

1  Au ko Paulo, se apositolo a Keliso Iesu e auala i te fakatonuga a te Atua te ‵tou Fakaola mo Keliso Iesu te ‵tou fakamoemoega,  ki a Timoteo, taku tama tonu i te fakatuanaki: Ke i luga i a koe te alofa tauanoa, te alofa fakamagalo mo te filemu mai te Atua te Tamana mo Keliso Iesu te ‵tou Aliki.  E pelā eiloa mo taku fakamalosiga ke nofo koe i Efeso i te taimi ka fano ei au ki Maketonia, ko fakamalosi atu foki au nei ki a koe ko te mea ke fakatonu atu koe ki nisi tino ke mo a e akoako ne latou a akoakoga sē ‵tonu,  io me ‵saga atu ki tala sē ‵tonu e penā foki mo te fakatelega o gafa. A mea penā e iku atu fua ki te sē aoga, kae e tuku mai fua i ei a fesili mō te faiga o sukesukega i lō te tukumaiga o se mea mai te Atua e uiga ki te fakatuanaki.  A te pogai tonu o te akoakoga tenei ko te fakaasiatuga o te alofa mai te loto ‵ma, te loto lagona ‵lei mo te fakatuanaki e aunoa mo te fakaloiloi.  Mai te ‵kalo keatea mai mea konei ko ‵saga atu ei a nisi tino o fai‵pati fua ki mea sē aoga.  E ma‵nako eiloa ke fai latou mo faiakoga o te tulafono, kae e se malamalama latou i olotou pati e fai io me ko mea kolā e kinau malosi mai latou e uiga ki ei.  E iloa ne tatou i te Tulafono e ‵lei fua māfai e fakaaoga faka‵lei ne se tino  mai te iloa atu me i te tulafono e seki faite mō te tino amiotonu, kae mō tino solitulafono kae uiga ‵teke, ko tino sē amioatua mo tino agasala, tino sē a‵lofa fakamaoni, e fakamasei ne latou a mea tapu, e tamate ne latou olotou tamana mo olotou mātua, ne tino tatino, 10  ne tino e fina ki amioga fakatauavaga sē ‵tau, ko tāgata e ‵moe mo tāgata, ko tino kai‵soa tino, ko tino ‵loi, ko tino molimau ‵pelo, mo so se mea telā e ‵teke ki akoakoga ‵tonu 11  e ‵tusa mo te gali o te tala ‵lei e uiga ki te Atua fiafia, telā ne tuku mai ki a au. 12  Au e fakafetai atu ki a Keliso Iesu te ‵tou Aliki, telā ne tuku mai ne ia te ‵mana ki a au, me ne talitonu a ia i a au e fakamaoni o fai te galuega ne tuku mai ne ia, 13  e tiga eiloa au se tino ne muna masei, ne uiga fakasaua kae fia sili i aso mua. Kae ne fakaasi mai ki a au te alofa fakamagalo, ona ko mea konā ne fai ne au i toku valea mo te seai o se fakatuanaki. 14  Kae ne lasi ‵ki te alofa tauanoa o te ‵tou Aliki fakatasi mo te fakatuanaki mo te alofa e auala i a Keliso Iesu. 15  E tonu eiloa te tugapati tenei kae e ‵tau foki o talia katoatoa ne tatou: I a Keliso Iesu ne vau ki te lalolagi o faka‵sao a tino agasala, kae ko au eiloa te tino agasala tafasili i te masei. 16  E tiga te feitu tenā, ne fakaasi mai ki a au a te alofa fakamagalo, ko te mea ke fakaasi mai ei ne Keliso Iesu ana logo‵maega katoa e auala i a au, te ‵toe tino masei, e pelā me se fakaakoakoga mō latou kolā ka fakatuanaki ki a ia ke maua ei ne latou te ola se-gata-mai. 17  Nei la, ke i luga i te Tupu o te se-gata-mai, telā e se mafai o pala, e se mafai o lavea, ko te Atua fua e tokotasi, a tavaega mo vikiga ki te se-gata-mai, ki te se-gata-mai eiloa. Amene. 18  Taku tama ko Timoteo, e tuku atu ne au te fakatonuga tenei ki a koe e ‵tusa mo valoaga kolā ne fai e uiga ki a koe, ko te mea, e auala i valoaga konei, ke tumau ei koe i te taua atu i te taua ‵lei tenei. 19  Puke ‵mau ki te fakatuanaki mo se loto lagona ‵lei. Ko mea eiloa kolā ko oti ne ‵pei keatea ne nisi tino kae ne iku atu ki te fakamaseiga o olotou fakatuanaki e pelā me se vaka kasa. 20  A Humenio mo Alesana ne tino i a latou konei, kae ko oti ne tuku atu ne au a lāua ki a Satani ko te mea ke maua ne lāua se akoakoga e auala i polopolokiga ke se toe muna ma‵sei atu ki te Atua.

Fakamatalaga mai lalo