1 Tesalonia 5:1-28
5 E se ‵tau o tusi atu ki a koutou, e oku taina, e uiga ki taimi mo tau o aso.
2 Me e iloa faka‵lei eiloa ne koutou i te aso o Ieova ka oko mai e pelā me se tino kaisoa i te po.
3 Ko te taimi eiloa e fai mai ei latou penei: “Ko filemu kae tokagamalie!” ko te taimi foki eiloa tenā e oko fakapoi atu ei te lotou fakaseaiga e pelā eiloa mo te ‵mae o te fafine fanau. E se mafai lele eiloa o ‵sao latou.
4 Kae ko koutou, e oku taina, e se ‵nofo koutou i te pouliga ko te mea ke ‵poa aka koutou i te aso tenā e pelā me ne tino kai‵soa,
5 me i a koutou ko fanau katoa o te mainaga mo te ao. A ko tatou e se ne tino o te po io me ko te pouliga.
6 Tela la, ke mo a tatou e ‵moe e pelā eiloa mo nisi tino, kae ke ala faeloa tatou kae tausi ‵tou mafaufau ke ‵lei.
7 Me i tino kolā e ‵moe e masani sale o ‵moe i te po, mo latou kolā e ko‵na e masani sale o ko‵na i te po.
8 Kae ko tatou ne tino o te ao. Ke tausi faka‵lei ‵tou mafaufau, me ko oti ne maua ne tatou a te ufifatafata o te fakatuanaki mo te alofa e pelā me se puloutau, mo te fakamoemoega o te fakaolataga.
9 Me ne fakatoka ne te Atua a tatou, e se mō tena kaitaua, kae mō te mauaga o te fakaolataga e auala i te ‵tou Aliki ko Iesu Keliso.
10 Ne mate a ia mō tatou, ko te mea ke ola fakatasi tatou mo ia faitalia me e ala io me e ‵moe tatou.
11 Tela la, tumau i te fakamalosi* atu te suā tino ki te suā tino, e pelā eiloa mo te mea e fai nei ne koutou.
12 Nei la, ko fakatagi atu matou ki a koutou, e oku taina, ke fakaasi atu te āva ki a latou kolā e ga‵lue malosi mō koutou kae ke tausi atu ki a koutou i te Aliki kae e fakamalosi atu foki ki a koutou.
13 Kae ke fakaasi atu ki a latou se āva lasi i te alofa ona ko olotou galuega. Ke tausi te filemu i te va o te suā tino ki te suā tino.
14 I te suā feitu, e oku taina, e fakamalosi atu matou ke polopoloki atu a tino fakalogoga‵ta, fakamafanafana atu ki tino loto mafatia, ‵lago atu ki tino vāi‵vai, kae ke kufaki foki i tino katoa.
15 Onoono ke mo a e taui atu ne se tino te masei ki te masei, kae ke fai faeloa te mea ‵lei te suā tino ki te suā tino e pelā foki ki tino katoa.
16 Ke fia‵fia faeloa koutou.
17 Ke ‵talo faeloa.
18 Fakafetai atu mō mea katoa. Me tenei eiloa te loto o te Atua mō koutou i te ‵kau fakatasi mo Keliso Iesu.
19 Ke mo a ma ‵teke ne koutou a galuega* o te agaga a te Atua i otou loto.
20 Ke se fakaseaoga ne koutou a pati fakavaloaga.
21 Ke tofotofo aka a mea katoa; puke ‵mau ki mea ‵lei.
22 ‵Kalo keatea mai i vaega katoa o amioga ma‵sei.
23 Ke na fakatapu katoatoa koutou ne te Atua o te filemu. Kae fai ke ‵lei i feitu katoa a otou agaga mo otou ola mo otou foitino, e oku taina, kae tausi ke mo a ma isi se pona i a koutou i te taimi e fakatasi mai i ei te ‵tou Aliki ko Iesu Keliso.
24 E fakamaoni eiloa a te tino telā e kalaga atu ki a koutou, kae ka fakataunu eiloa ne ia te mea tenā.
25 Oku taina, ‵talo faeloa mō matou.
26 Fakatalofa atu ki taina katoa i te sogi tapu.
27 E fakamalosi atu au ki a koutou i te igoa o te Aliki ke faitau atu te tusi tenei ki taina katoa.
28 Ke i luga i a koutou a te alofa tauanoa o te ‵tou Aliki ko Iesu Keliso.
