1 Tesalonia 4:1-18

4  A ko te ‵toe mea, e oku taina, e pelā eiloa mo te fakatonuga ne maua ne koutou mai i a matou e uiga ki te auala e ‵tau o sa‵sale koutou i ei ko te mea ke fakafiafia atu ki te Atua (e pelā eiloa mo te auala e sa‵sale ei koutou nei) e fakatagi kae fakamolemole atu matou e auala i te Aliki ko Iesu ke tumau koutou i te ga‵solo ki mua i te faiga o mea konā.  Me iloa ne koutou a fakatonuga kolā ne tuku atu ne matou ki a koutou e auala i te Aliki ko Iesu.  Me tenei eiloa te loto o te Atua, ko koutou ke tapu kae ke ‵kalo keatea mai i amioga fakatauavaga sē ‵tau.  E ‵tau o iloa ne tino taki tokotasi i a koutou o pule atu ki tena foitino ko te mea ke tapu kae fakaaloalogina,  e se i te kaima‵nako ki manakoga fakatauavaga e pelā mo tino o fenua kolā e se iloa ne latou te Atua.  E seai se tino e ‵tau o fakamasei kae sona fakalavelave atu ki saolotoga o tena taina i te feitu tenei, me ko Ieova eiloa telā e fakasala ne ia a mea katoa konei, e pelā eiloa mo omotou pati kolā ne fai mua atu ki a koutou kae ne tuku atu foki i ei se molimau maea e uiga ki ei.  Me ne kalagagina tatou ne te Atua, e se mō amioga lai‵lai, kae mō te tulaga tapu.  Tela la, ko te tino telā e manatu māmā ki te mea tenei, e se manatu māmā a ia ki se tagata, kae ki te Atua telā ne tuku atu ne ia tena agaga tapu ki a koutou.  Kae e se ‵tau o tusi atu matou ki a koutou e uiga ki te alofa fakataina, me e akoako eiloa koutou ne te Atua ke fakatau a‵lofa koutou te suā tino ki te suā tino. 10  Se mea tonu, me tenā eiloa te mea e fai ne koutou ki taina katoa i Maketonia. Kae e fakamalosi atu fua matou, e oku taina, ke momea aka te fai ne koutou o te mea tenā. 11  Ke taumafai malosi koutou o ola i te filemu kae ke mo a e ‵saga koutou ki mea kolā e seai se otou fekau i ei. Ke ga‵lue malosi, e pelā eiloa mo te motou fakatonuga ki a koutou, 12  ko te mea ke sa‵sale faka‵lei koutou i te kilokiloga a tino i tua e aunoa mo te manavase ki so se mea. 13  E se gata i ei, e oku taina, e ma‵nako matou ke iloa ne koutou a mea e uiga ki a latou kolā ko ‵moe i te mate; ko te mea ke se fanoa‵noa koutou e pelā mo tino kolā e seai se lotou fakamoemoega. 14  Kafai e fakatuanaki tatou i a Iesu ne mate kae toetu aka, e penā foki a tino kolā ko oti ne ‵moe i te mate, e auala i a Iesu, ka ‵toe faka‵tu aka latou ne te Atua ke fakatasi mo ia. 15  Me tenei eiloa te mea e fai atu ne matou ki a koutou e auala i te muna a Ieova, me i a tatou kolā e ola i te taimi e fakatasi* mai ei a te Aliki e se mafai o ‵mua atu i a latou kolā ko oti ne ‵moe i te mate. 16  Me ka fanaifo te Aliki mai te lagi kae ka fakatonu mai, i te leo o te agelu pule mo te pu a te Atua, kae ko latou kolā ko ‵mate i te ‵kau fakatasi mo Keliso ka toe‵tu muamua mai. 17  Fakamuli ifo ko tatou kolā e ola i te taimi tenā, ka ave fakatasi aka tatou mo latou i kaumana ke fetaui tatou mo te Aliki i te ea; ko ‵nofo fakatasi faeloa i ei tatou mo te Aliki. 18  Tela la, ke fakatau fakamafanafana atu te suā tino ki te suā tino ki pati konei.

Fakamatalaga mai lalo

1Te 4:15  Ke onoono ki te Mataupu Fakaopoopo e 6.