1 Tesalonia 3:1-13
3 Tela la, i te taimi ne seki toe mafai ei ne matou o fa‵ki, ne mafau‵fau matou me e ‵lei ke ‵nofo mua matou i a matou eiloa i Atenai.
2 Ne uga atu ne matou a Timoteo, te ‵tou taina mo te tavini a te Atua i te tala ‵lei e uiga ki a Keliso, ko te mea ke fakamalosi* kae fakamafanafana atu ki a koutou e uiga ki te otou fakatuanaki,
3 ko te mea ke seai se tino e fakavāivāi* ne puapuaga konei. Me e iloa ‵lei ne koutou me e se mafai o faka‵seke tatou ki vaegā logo‵maega penā.
4 Me i te motou ‵nofoga i a koutou, ne fai sale atu matou me ka logo‵mae tatou i fakasauaga, kae tenā eiloa te mea ko oti ne tupu, e pelā mo te mea e iloa ne koutou.
5 Tenā te pogai, i te taimi ne seki toe mafai ei ne au o fa‵ki, ne uga atu ei taku fekau ke iloa aka ne au a te otou fakamaoni, māfai ko oti ne fakaosoosogina koutou ne te Tino Fakaosooso i nisi auala, ko se aoga ei omotou galuega mō koutou.
6 Kae ne fatoa oko mai a Timoteo mai i a koutou mo te tala fakafiafia e uiga ki te otou fakamaoni mo te otou a‵lofa, kae e masaua faeloa ne koutou a matou, kae olioli foki koutou ke fetaui tatou e pelā eiloa mo matou ki a koutou.
7 Tenā te pogai, e oku taina, ko fakamafanafanagina ei matou, i omotou logo‵maega* mo omotou puapuaga ona ko koutou e auala i te fakamaoni telā ne fakaasi mai ne koutou.
8 Ona ko koutou e ‵tu ‵mautakitaki i te Aliki, ko toe maua ei ne matou se malosi* fou.
9 Me ka pefea te lasi o te fakafetai ka fakaasi atu ne matou ki te Atua e uiga ki te fiafia lasi telā ko maua ne matou ona ko koutou,
10 i omotou ‵talo e fai i po mo ao ke lavea ne matou otou mata kae ke fakakatoatoa atu te otou fakatuanaki i nai mea kolā e se katoatoa?
11 Nei la, ke na fakatoka ne te ‵tou Atua telā ko te Tamana, mo te ‵tou Aliki ko Iesu se auala mō matou ke olo atu ki a koutou.
12 E se gata i ei, ke na fai foki ne te Aliki ke gasolo aka koutou o tokouke, e tonu, ke ‵fonu koutou i te alofa o te suā tino ki te suā tino mo tino katoa, e pelā eiloa mo matou ki a koutou;
13 ko te mea ke fai ne ia otou loto ke ‵mautakitaki kae tapu e aunoa mo se pona i mua o te ‵tou Atua telā ko te ‵tou Tamana, i te taimi e fakatasi* mai ei te ‵tou Aliki ko Iesu fakatasi mo ana tino tapu katoa.
