1 Tesalonia 2:1-20

2  E iloa ‵lei ne koutou, e oku taina, me ne seki iku vale te motou asiga ki a koutou.  Me e pelā eiloa mo te mea e iloa ne koutou, i te otiga ne logo‵mae kae ‵ta fakamasei matou i te taimi muamua i Filipi, ne ati aka ei ne matou te loto toa e auala i te ‵tou Atua ko te mea ke fakaasi atu ki a koutou a te tala ‵lei mai lalo i ‵tekemaiga e uke.  Me ne seki fakavae a fakamalosiga kolā ne tuku atu ne matou ki luga i manatu ‵se io me ko mea lai‵lai io me ko mea fakaloi‵loi,  kae e pelā eiloa mo te taliaga ne te Atua ke tuku mai ki a matou a te tala ‵lei, e penā foki eiloa te motou fai‵pati atu, e se o fakafiafia atu ki tino, kae ki te Atua, telā e iloilo ne ia omotou loto.  Se mea tonu me e iloa ne koutou me ne seki fakaaoga lele eiloa ne matou a pati tavae io me ne fakaloiloi ne matou a tino ona ko te kaimanako. E molimau te Atua ki te mea tenā!  Ne seki ‵sala atu foki matou ki ne tavaega mai tino, mai i a koutou io me ko nisi tino aka, e tiga eiloa ne ‵tau o ‵mafa te otou amoga ona ko matou ko apositolo a Keliso.  E ‵kese mai i ei, e fai matou mo fai ne tino uiga atafai māfai e ‵nofo tatou, e pelā eiloa mo te atafai o se mātua ki ana tama.  Ona ko te motou a‵lofa atafai ki a koutou, ne fia‵fia malosi matou o tuku atu ki a koutou, e se gata fua i te tala ‵lei a te Atua, kae e pelā foki mo omotou ola, me e fakapelepele ne matou a koutou.  E ‵tau o masaua ne koutou, e oku taina, a omotou galuega ‵mafa. Ne ga‵lue matou i po mo ao, ko te mea ke mo a ma fakafi‵ta ne matou se tino i a koutou, i te taimi e talai atu ei ne matou te tala ‵lei a te Atua ki a koutou. 10  E molimau koutou e pelā foki mo te Atua, e uiga ki te motou fakamaoni mo te motou amiotonu e aunoa mo se motou ‵se ki a koutou, e tino tali‵tonu. 11  E iloa faka‵lei ne koutou me ne fakamalosi kae fakamafanafana kae molimau atu faeloa matou ki tino taki tokotasi i a koutou, e pelā eiloa mo faiga a se tamana ki ana tama, 12  ko te mea ke mafai o tumau koutou i te sa‵sale e ‵tusa mo te otou kalagaga ne te Atua ke ‵kau atu koutou ki tena Malo mo tena tulaga ‵malu. 13  Tenā eiloa te pogai e fakafetai atu faeloa i ei a matou ki te Atua, me i te mauaga ne koutou a te muna a te Atua telā ne lagona ne koutou mai i a matou, ne talia ne koutou, e se ona ko te mea se muna mai tāgata, kae ko te muna eiloa a te Atua, tenā foki e galue i loto i a koutou, e tino tali‵tonu. 14  Me ne tau‵tali eiloa koutou, e oku taina, ki fakapotopotoga a te Atua kolā i Iuta i te ‵kau fakatasi mo Keliso Iesu, me ne logo‵mae foki koutou i lima o tino o te otou fenua e pelā foki eiloa mo te logo‵mae o taina i Iuta i lima o tino Iutaia, 15  kolā ne tamate foki ne latou te Aliki ko Iesu mo te kau pelofeta kae nei ko fakasaua mai ki a tatou. E se gata i ei, e se fakafiafia atu latou ki te Atua, kae e ‵teke atu latou ki mea kolā e manuia ei a tino katoa, 16  i te lotou taumafai o faka‵lave matou mai te fai‵pati atu ki tino o fenua fakaa‵tea ko te mea ke mafai o ‵sao latou. Tenei eiloa te auala e fai ei ne latou ke uke olotou agasala. Kae ko oko atu eiloa ki a latou te kaitaua o te Atua. 17  Kae i te motou ologa keatea mai i a koutou, e oku taina, i se taimi toetoe (i te feitu faka-te-foitino kae e se mai i omotou loto) ona ko te ma‵losi o omotou manakoga, ne taumafai malosi eiloa matou ke toe fetaui tatou. 18  Ko te pogai eiloa tenei ne ma‵nako ei matou o olo atu ki a koutou, ao, ko au ko Paulo, ne taumafai atu i te taimi muamua mo te lua o taimi, kae ne ‵pono te motou auala ne Satani. 19  Se a te fakavae o te motou fakamoemoega io me ko te motou fiafia io me ko te motou foualiki i mua o te ‵tou Aliki ko Iesu i tena fakatasi* mai? E a, e se ko koutou? 20  Ko koutou eiloa te motou ‵malu mo te motou fia‵fia.

Fakamatalaga mai lalo

1Te 2:19  Ke onoono ki te Mataupu Fakaopoopo e 6.