1 Tesalonia 1:1-10
1 Ko matou ko Paulo, Suliano* mo Timoteo ki te fakapotopotoga i Tesalonia telā e ‵kau fakatasi mo te Atua te Tamana mo te Aliki ko Iesu Keliso:
Ke i luga i a koutou a te alofa tauanoa mo te filemu mai te Atua.
2 E fakafetai atu faeloa matou ki te Atua i taimi e aofia ei ne matou a koutou katoa i omotou ‵talo,
3 me ne seki puli lele i a matou a te otou ga‵lue mo te fakamaoni mo otou galuega a‵lofa mo te otou kufaki ona ko te otou fakamoemoega i te ‵tou Aliki ko Iesu Keliso i mua o te ‵tou Atua te Tamana.
4 Oku taina pele, e iloa ne matou me ne filifili koutou ne te Atua kae e alofa foki a ia ki a koutou,
5 me ne seki oko atu fua te tala ‵lei telā ne talai atu ne matou ki a koutou i omotou pati, kae ne oko atu eiloa i te ‵mana mo te agaga tapu mo te mautinoa ‵lei, e pelā eiloa mo te iloa ne koutou a mea kolā ne fai ne matou ke aoga ki a koutou.
6 Tela la, ne tau‵tali mai koutou i a matou e pelā foki mo te Aliki, me ne talia ne koutou te muna mai lalo i puapuaga e uke mo te fiafia telā e maua mai te agaga tapu,
7 kae ne fai koutou mo fakaakoakoga ‵lei ki tino tali‵tonu katoa i Maketonia mo Akaia.
8 Se mea tonu me ne seki fakasalalau atu fua ne koutou te muna a Ieova i Maketonia mo Akaia, kae ko oti foki ne salalau atu te otou fakatuanaki ki te Atua i koga katoa, ko seai ei se pogai ke fai‵pati atu matou e uiga ki ei.
9 Me e fai‵pati faeloa a tino konā ki te auala ne fesokotaki muamua atu ei matou ki a koutou mo te auala ne ‵fuli atu ei koutou ki te Atua mai i otou tupua ke pologa atu koutou ki te Atua ola kae tonu,
10 kae ke fakatali‵tali foki koutou ki te oko mai o tena Tama mai te lagi, telā ne fakatu aka ne ia mai te mate, ko Iesu tenā, ko ia telā ka faka‵sao ne ia tatou mai te kaitaua fakamataku o te Atua telā ka oko mai.
