Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Petelu 4:1-19

4  Tela la, ona ko Keliso ne puapuaga i te foitino, e ‵tau foki o puipui otou mafaufau ki te vaegā manatu tenā, me ko te tino telā ko oti ne puapuaga i te foitino ko oti foki ne fakagata ne ia te faiga o agasala,  ko te mea ke se toe ola a ia mō manakoga o tino i aso koi ‵toe o tena olaga faka-te-foitino, kae ke ola mō te faiga o te loto o te Atua.  Me ko lava loa te taimi ne faivalevale ei ne koutou a otou amioga i manakoga o tino o te lalolagi i aso ko ‵teka, i te taimi ne fai ei ne koutou a amioga matafatu mo te sē āva, ko manakoga sē pulea, ko te inu ke ko‵nā, fakafiafiaga sonafai, te fakatau inu kava, mo te ifo ki tupua.  Ko ‵numi olotou mafaufau me ko se tumau koutou i te ‵tele fakatasi mo latou i te auala e tasi telā e fai i ei a toe amioga ma‵sei, ko faifai muna atu ei latou ki a koutou.  Kae e ‵tau o tuku atu ne tino konei se tala e uiga ki a latou ki te tino telā ko toka o fakamasino ne ia a tino ola mo tino ‵mate.  E tonu, ko te pogai eiloa tenei ne folafola atu foki ei te tala ‵lei ki tino ‵mate,* ko te mea ke mafai o ola latou i te agaga e ‵tusa mo te kilokiloga a te Atua e tiga eiloa e fakamasino latou i te foitino e pelā eiloa mo tāgata.  Kae ko pili mai te gataga o mea katoa. Tela la, fai ke ‵lei otou mafaufau, ke mataala* kae ‵talo malosi koutou.  E sili atu i mea katoa, ke fakatau a‵lofa koutou, me e ‵tao ne te alofa a agasala e uke.  Ke fakaasi atu ne koutou te uiga talimalo te suā tino ki te suā tino e aunoa mo te mui‵mui. 10  Ke fakaaoga a meaalofa kolā e maua ne tino taki tokotasi ke tavini atu ei te suā tino ki te suā tino e pelā me ne situati ‵lei o te alofa tauanoa o te Atua telā e fakaasi mai i auala kese‵kese. 11  Kafai e faipati se tino, ke faipati atu e pelā eiloa me e faipati a ia ki folafolaga mai te Atua. Kafai e tavini atu se tino, ke tavini atu eiloa e ‵tusa mo te malosi telā e tuku atu ne te Atua; ko te mea ke faka‵malugina te Atua i mea katoa e auala i a Iesu Keliso. I o ia te ‵malu mo te ‵mana ki te se-gata-mai, ki te se-gata-mai eiloa. Amene. 12  Aku fagasele, sa ‵poi koutou i tofotofoga e ‵ka pelā me se afi kolā e pokotia koutou i ei, e pelā me se mea e fou ko tupu ki a koutou. 13  I lō te fai penā, ke tumau koutou i te fia‵fia me ko ‵kau fakatasi koutou mo Keliso i ana puapuaga, ko te mea ke fia‵fia kae ke ‵fonu foki koutou i te fia‵fia i te taimi e fakaasi mai ei tena ‵malu sili. 14  Kafai e fakamasei atu ki a koutou ona ko te igoa o Keliso, e fia‵fia eiloa koutou, me ko nofo i luga i a koutou te agaga o te ‵malu, ko te agaga o te Atua tenā. 15  Kae ke seai se tino i a koutou e puapuaga ona ko ia se tino tatino io me se tino kaisoa io me se tino masei io me se tino e sona kau atu fua ki mea a nisi tino. 16  Kae kafai e puapuaga se tino ona ko ia se Kelisiano, ke se mā la a ia i ei, kae ke na tavae atu faeloa a ia ki te Atua i te tauave ne ia o te igoa tenā. 17  Me ko oko mai te taimi ne fuafuagina mō te fakamasinoga ke kamata i te fale o te Atua. Tela la, kafai e kamata i a tatou, ka pefea la te mea ka tupu ki tino kolā e se faka‵logo ki te tala ‵lei a te Atua? 18  “Kae kafai e faigata o fakasao se tino amiotonu, se a la te mea ka tupu* ki te tino sē amioatua mo te tino agasala? 19  Tela la, ke na tuku atu ne latou kolā e puapuaga e ‵tusa mo te loto o te Atua olotou ola ki te Mafuaga fakamaoni i te fai ne latou o mea ‵lei.

Fakamatalaga mai lalo

 Ko tena uiga, ko ‵mate ki olotou amioga solitulafono mo agasala. Ke onoono ki te Efeso 2:1.
 Io me “toka faeloa; matapula‵pula.”
 I te ‵gana Eleni, “tefea te koga ka sae mai ei a ia.”