Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Petelu 2:1-25

2  Tela la, ke tiakina ne koutou a mea ma‵sei katoa, ko te faitogafiti, te fia amiotonu, te loto masei, mo vaega katoa o te gutu fatufatu.  Ke fai koutou e pelā me ne pepe fatoa fa‵nau, e fia inu malosi ki susu sē lai‵lai* o te muna, ko te mea ke ga‵solo atu koutou ki te fakaolataga e auala i ei,  māfai ko oti ne tami* koutou ki te alofa kaimalie o te Aliki.  E olo atu koutou ki a ia, ko te fatu ola telā ne tiaki ne tino, kae ne filifili ne te Atua me e tāua ki a ia.  A koutou ne fatu ola kolā e ati aka ki ei se fale faka-te-agaga ke fai mo fai se kau faitaulaga tapu, ko te mea ke ofo aka i ei a taulaga faka-te-agaga kolā e talia ne te Atua e auala i a Iesu Keliso.  Me ne tusi mai penei i Tusitusiga Tapu: “Kiloke! ko fakatakato ne au i Siona se fatu filifilia. Ko te fatu tulimanu fakavae kae tāua. Kae e seai se tino telā e fakatuanaki ki a ia ka fanoanoa.”  Tela la, e tāua ‵ki a ia ki a koutou, me i a koutou ko tino tali‵tonu. Kae e pelā mo tino sē tali‵tonu, “a te fatu telā ne tiakina ne tufuga fai fale ko oti ne fai mo fai te fatu tulimanu tafasili i te aoga,”  kae “se fatu faka‵siga tino mo se papa e ‵lave ei olotou vae.” E ‵siga latou me e se faka‵logo ki te muna. Tenei eiloa te mea ko oti ne fakaiku aka mō latou.  Kae ko koutou “se matakāiga ne filifiligina, ne faitaulaga kolā ka fai mo tupu, se fenua tapu, ne tino fakapito o te Atua, ke folafola atu ne koutou ki fenua katoa a galuega fakaofoofogia” a te tino telā ne kalaga ne ia koutou mai te pouliga ki tena mainaga fakaofoofogia. 10  Me i a koutou ne seki fai mo tino o te Atua i aso mua, kae nei ko fai koutou mo fai ana tino. Ne seki fakaasi atu ki a koutou te alofa fakamagalo i aso ko ‵teka, kae nei ko oti ne fakaasi atu ki a koutou a te alofa fakamagalo. 11  Aku fagasele, e pelā me ne tino fakaa‵lofa kae se ‵nofo tumau, e fakamalosi atu au ke tumau koutou i te ‵kalo keatea mai manakoga faka-te-foitino, kolā e taua atu faeloa ki a koutou.* 12  Ke tausi otou amioga ke ‵lei i mua o tino i fenua katoa, ko te mea kafai e fakamasei ne latou koutou e pelā me ne tino amio ma‵sei, e mafai o lavea ne latou ki olotou mata otou galuega ‵lei, kae e iku atu ei ki te ‵viki atu o latou ki te Atua i te aso o tena asiga. 13  Ke faka‵logo koutou ki pulega katoa a tāgata ona ko te Aliki: faitalia me ki se tupu telā e maluga 14  io me ko kovana kolā e uga atu ne ia ke fakasala a tino ma‵sei kae tavae atu ki tino kolā e fai ne latou a mea ‵lei. 15  Me tenā eiloa te loto o te Atua, ko te mea ke fakafilemu ne koutou a pati va‵lea a tino sē loto malamalama ona ko te fai ne koutou o mea ‵lei. 16  Ke fai koutou mo fai ne tino saoloto, kae ke se fakaaoga te otou saolotoga ke ‵funa aka ei a mea ma‵sei, kae ke fai pelā me ne pologa a te Atua. 17  Āva ki tino katoa, a‵lofa ki te kautaina kātoa, ma‵taku ki te Atua, kae āva ki te tupu. 18  Ke faka‵logo a tavini ki olotou matai mo te mataku ‵tau, e se gata fua ki matai ‵lei kae loto malamalama, kae e penā foki ki matai faiga‵ta. 19  Me se mea ‵lei māfai e fa‵ki se tino i mea faiga‵ta* i se auala sē tonu ona ko tena loto lagona i mua o te Atua. 20  Me se a te aoga māfai e fa‵ki koutou i faifaiga ma‵sei* ona ko otou agasala? Kae kafai e fa‵ki koutou i logo‵maega ona ko te faiga o mea ‵lei, e talia eiloa ne te Atua te mea tenā. 21  Se mea tonu me tenei eiloa te pogai ne kalagagina ei koutou, me ne puapuaga a Keliso mō koutou, kae tuku mai ne ia se fakaakoakoga mō koutou ke tau‵tali faka‵lei atu i ana kalafaga. 22  E seai sena agasala ne fai, io me se pati loi ne tō mai i tena gutu. 23  I taimi ne pati masei atu ei ki a ia, ne seki taui atu ne ia ki pati ma‵sei. I taimi ne puapuaga ei a ia, ne seki kaitaua a ia, kae ne tuku atu faeloa ne ia a ia ki te tausiga a te tino telā e fai ne ia a fakamasinoga ‵tonu. 24  Ne amo ne ia a ‵tou agasala i tena foitino i luga i te lakau fakasaua, ko te mea ke se toe aofia tatou i te fai agasala kae ke ola tatou i te amiotonu. Kae “ona ko ana pa‵kiaga, ne faka‵lei aka ei koutou.” 25  Me i a koutou e pelā me ne mamoe kolā ne ‵galo, kae nei ko oti ne ‵foki atu koutou ki te tausi mamoe mo te ovasia o otou ola.

Fakamatalaga mai lalo

 Io me ko te “tinā susu.”
 Io me “ko oti ne iloa.”
 I te ‵gana Eleni, “psy.khe’.”
 Io me “mafatia; logo‵mae.”
 I te ‵gana Eleni, “ko te fusu.”