Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Kolinito 15:1-58

15  Nei la, ko fakamasaua atu ne au ki a koutou, e oku taina, e uiga ki te tala ‵lei telā ne folafola atu ne au ki a koutou, kae telā ne talia ne koutou, kae ko tumau foki koutou i ei.  Ka ‵sao foki koutou māfai e puke ‵mau koutou ki te tala ‵lei telā ne folafola atu ne au ki a koutou, seiloga ke fai koutou mo tino kolā e tali‵tonu ki mea sē aoga.  Me e aofia i mea muamua kolā ne tuku atu ne au ki a koutou ko mea foki kolā ne maua ne au, me ne mate a Iesu mō ‵tou agasala e ‵tusa mo pati i Tusitusiga Tapu,  me ne tanu a ia, ne toe fakatu aka i te tolu o aso e ‵tusa mo pati i Tusitusiga Tapu,  kae ne fakasae atu ki a Kefa, kae oti aka ki te toko sefululua.  Mai tua ifo i ei ne fakasae atu a ia ki taina e silia atu i te toko 500 i te taimi e tasi, a ko te tokoukega o latou konei koi ‵nofo eiloa mo tatou, kae ko nisi tino ko oti ne ‵moe i te mate.  Mai tua ifo i ei, ne fakasae atu a ia ki a Iakopo, kae oti aka ki apositolo katoa;  kae fakamuli loa ne fakasae mai a ia ki a au e tiga eiloa ne fai au e pelā me se pepe ne tō moto.  Me ko au eiloa te ‵toe apositolo fatauva i apositolo katoa, kae e se ‵tau o taku au ki se apositolo, me ne fakasaua ne au te fakapotopotoga a te Atua. 10  Kae ona ko te alofa tauanoa o te Atua, ko fai ei au penei. Ne seki maumau tena alofa tauanoa telā ne fakaasi mai ki a au, me ne galue malosi atu au i lō latou, kae e se ko au kae ko te alofa tauanoa o te Atua tenei e maua i a au. 11  Kae faitalia me ko au io me ko latou, tenei eiloa te mea e talai atu ne matou, kae tenā foki te auala ne tali‵tonu ei koutou. 12  Tela la, kafai e talai atu i a Keliso ko oti ne toe fakatu aka mai te mate, kaia la e fai mai ei a nisi tino i a koutou me e seai se toetu mai te mate? 13  Kafai e tonu me e seai se toetu mai te mate, ko tena uiga a Keliso e seki toe fakatu aka. 14  Kae kafai e seki toetu a Keliso, ko seai ei se aoga o te motou talaiga, kae ko seai foki se aoga o te motou fakatuanaki. 15  E se gata i ei, ko fai matou mo fai ne molimau ‵pelo e uiga ki te Atua, me ko ‵teke atu matou ki te Atua mai te molimau atu me i a Keliso ne fakatu aka ne ia, telā ka se fakatu aka eiloa ne ia moi fai e se toe faka‵tu aka a tino ‵mate. 16  Me kafai e se toe faka‵tu aka a tino ‵mate, ko tena uiga e seki fakatu aka foki a Keliso. 17  E se gata i ei, kafai e seki fakatu aka a Keliso, ko seai ei se aoga o te otou fakatuanaki; ko tumau eiloa koutou i otou agasala. 18  E tonu, a tino kolā ko oti ne ‵moe i te mate i te ‵kau fakatasi mo Keliso ko ‵galo atu eiloa ki te se-gata-mai. 19  Kafai e fakamoe‵moe fua tatou ki a Keliso i te olaga tenei, ko ‵tau ei o fakaa‵lofa atu tatou i lō so se isi tino aka. 20  E tonu, ko oti ne toe fakatu aka a Keliso mai te mate, ko te fuataga muamua o latou kolā ko oti ne ‵moe i te mate. 21  Me ona ko te mate ne oko mai e auala i se tagata e tokotasi, ne oko mai foki a te toetu e auala i se tagata e tokotasi. 22  Me e pelā eiloa mo te ‵mate o tino katoa i a Atamu, e penā foki te ‵toe fakaola mai o tino katoa e auala i te Keliso. 23  Kae ko tino taki tokotasi e ‵tusa mo olotou tulaga: ko Keliso te fuataga muamua, mai tua i ei ko tino o Keliso i te taimi o tena fakatasi mai. 24  Kae e ‵tao atu ki ei ko te gataga, ko te taimi ka toe tuku atu ei ne ia te Malo ki tena Atua mo tena Tamana, māfai ko oti ne fakaseai ne ia a malo, mo pulega, mo malosi pule katoa. 25  Me e ‵tau mo ia o pule mai e pelā me se tupu ke oko ki te taimi e tuku ei ne te Atua ana fili katoa mai lalo i ana vae. 26  A te ‵toe fili telā e ‵tau o fakaseai atu ko te mate. 27  Me i te Atua ko oti ne “tuku atu ne ia a mea katoa mai lalo i ana vae.” Kae kafai e fai mai a ia me ‘ko oti ne tuku atu ne ia a mea katoa,’ e maina ‵lei me e se aofia i ei a te tino telā ne tuku atu ne ia a mea katoa ki a ia. 28  Kae kafai ko oti ne tuku atu a mea katoa ki a ia, ko nofo foki ei te Tama mai lalo i a Ia telā ne tuku atu ne ia a mea katoa ki a ia, ko te mea ke pule katoatoa atu te Atua ki ana mea katoa. 29  Me kafai e se fai penā, se a la te mea ka fai ne latou kolā e papatiso ke fai latou e pelā me ne tino ‵mate? Kafai e se mafai o toe faka‵tu mai a tino ‵mate, kaia la e papatiso ei latou ke fai latou penā? 30  Kaia foki la e ‵tu ei tatou i se tulaga fakamataku i taimi katoa? 31  E fepaki au mo te mate i aso takitasi. E mautinoa eiloa te mea tenei e pelā eiloa mo toku fiafia ona ko koutou, e oku taina, telā e maua ne au i a Keliso Iesu te ‵tou Aliki. 32  Kafai ko oti ne taua au mo manu fe‵kai i Efeso e pelā eiloa mo nisi tāgata, se a la te aoga o te mea tenā ki a au? Kafai e se toe faka‵tu mai a tino ‵mate, “ke na ‵kai kae inu tatou me ka taeao ko ‵mate ei tatou.” 33  Ke se faka‵segina koutou. A taugasoa ma‵sei e fakama‵sei ne latou a amioga ‵lei. 34  Fai ke ala otou mafaufau i se auala amiotonu kae sa toe fai a faifaiga o te agasala, me e isi ne tino e seai se lotou iloa e uiga ki te Atua. Au e faipati atu o fakamasiasi koutou. 35  Kae kāti ka fai mai se tino: “Ka toe faka‵tu aka pefea a tino ‵mate? E tonu, ne vaegā foitino pefea ka toe ‵tu mai ei latou? 36  A koe e se malamalama! A te mea telā e ‵toki ne koe e se mafai o ola aka seiloga ke pala muamua. 37  Kae e pelā mo te mea telā e ‵toki ne koe, e se ‵toki ne koe a te foitino o te lakau ke ola aka, kae ko te fuaga fua, kāti se fuaga o te saito io me se isi fuaga aka. 38  Kae e tuku atu ne te Atua ki ei se foitino, e ‵tusa mo te mea e fiafia a ia ki ei, kae tuku atu ki fuaga takitasi e ‵tusa mo olotou foitino. 39  E se ‵pau a foitino katoa, e ‵kese te foitino o te tagata, e ‵kese te foitino o te pulumakau, e ‵kese te foitino o te manu eva, kae e ‵kese foki te foitino o te ika. 40  E isi ne foitino faka-te-lagi, mo foitino faka-te-lalolagi; kae e ‵kese te ‵malu o te foitino faka-te-lagi, e ‵kese foki te ‵malu o te foitino faka-te-lalolagi. 41  E ‵kese te ‵malu o te la, e ‵kese foki te ‵malu o te masina, kae e ‵kese foki te ‵malu o fetū. E tonu, e kese‵kese foki te ‵malu o fetū takitasi 42  E penā foki te toe‵tu mai o tino ‵mate. Ne ‵toki i te pala kae ne toe fakatu mai i te sē pala. 43  Ne ‵toki mo te masiasi, kae ne toe fakatu aka mo te ‵malu. Ne ‵toki mo te vāivāi, kae ne toe fakatu aka mo te ‵mana. 44  Ne ‵toki i te foitino faka-te-foitino, kae ne toe fakatu aka i se foitino faka-te-agaga. Kafai e isi se foitino faka-te-foitino, e isi foki se foitino faka-te-agaga. 45  Ne tusi mai foki penei: “A te Atamu muamua ne fai mo fai se tino ola.” A ko te Atamu fakaoti ne fai mo fai te agaga telā e tuku mai ne ia te ola. 46  E tiga te feitu tenā, e se ko te foitino faka-te-agaga e mua. Ko te foitino faka-te-foitino e mua, kae fakamuli ko te foitino faka-te-agaga. 47  A te tagata muamua ne faite i te lalolagi ki ‵pefu o te laukele; a ko te tagata i te tokolua ne fanaifo mai te lagi. 48  E pelā mo te tino ne faite ki ‵pefu, e penā foki a latou kolā ne faite ki ‵pefu; kae e pelā mo te tino faka-te-lagi e penā foki a tino faka-te-lagi. 49  Kae e pelā eiloa mo tatou e ‵pau mo te tino telā ne faite ki ‵pefu, ka ‵pau foki tatou mo foliga o te tino faka-te-lagi. 50  Kae e fai atu ne au te mea tenei, e oku taina, me e se mafai o maua ne tino kolā e faite ki ‵kano mo toto a te Malo o te Atua. E se mafai foki o maua ne te pala a mea kolā e se ‵pala. 51  Kiloke! Ka fakaasi atu ne au ki a koutou se mea ‵funa kae tapu: Ka se ‵moe a tatou katoa i te mate, kae ka ‵fuli fakavave a tatou katoa, 52  e pelā eiloa mo te ‵kemo o te mata i te pu fakaoti. Me ka tagi te pu, kae ka faka‵tu aka ei a tino kolā ne ‵mate e pelā me ne tino e se pala, kae ka ‵fuli ei tatou. 53  Me ka ‵fuli te mea pala ki te mea sē pala, a ko te mea telā e mafai o mate ki te mea telā e se mafai o toe mate. 54  Kae kafai e sui te mea telā e pala ki te mea sē pala kae e sui foki a te mea telā e mafai o mate ki te mea telā e se mafai o toe mate, ko fakataunu ei a pati kolā ne tusi: “Ka fakaseai atu te mate ki te se-gata-mai.” 55  “Te mate, tefea tou manumalo? Te mate, tefea tou ū ‵kati?” 56  A te ū ‵kati telā e aumai ne ia te mate ko te agasala, kae ko te malosi o te agasala ko te Tulafono. 57  Kae ke fakafetai atu ki te Atua, me ne tuku mai ne ia te manumalo ki a tatou e auala i te ‵tou Aliki ko Iesu Keliso. 58  Tela la, e oku taina fagasele, ke ‵mautakitaki koutou, sa gasue‵sue, kae fai faeloa ke uke otou galuega e fai i te galuega a te Aliki, me e iloa ne koutou me e se mafai o māumāu otou galuega e fai mō te Aliki.

Fakamatalaga mai lalo