Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Kolinito 12:1-31

12  E uiga ki meaalofa faka-te-agaga, e oku taina, e se manako au ke se iloa ne koutou a mea konā.  E iloa ne koutou i te taimi koi fai ei koutou mo tino o fenua fakaa‵tea, ne takitaki ‵se koutou ki tupua kolā e gū‵gu kae tau‵tali atu foki ki so se koga e ‵taki ne latou koutou ki ei.  Tela la, e fakailoa atu ne au ki a koutou me e seai se tino telā e faipati e auala i te agaga o te Atua, e mafai o fai atu penei: “A Iesu e malaia!” kae e seai se tino e mafai o fai atu penei: “A Iesu ko te Aliki!” kae na ko latou fua kolā e takitaki ne te agaga tapu.  E uke a vaegā meaalofa kese‵kese, kae e tasi fua te agaga.  E uke foki a vaegā taviniga kese‵kese kae e tokotasi fua te Aliki.  E uke foki a vaegā taviniga kese‵kese e fai, kae ko te Atua eiloa e tokotasi tenā e fai ne ia a taviniga katoa e auala i tino katoa.  E lavea atu a te galue o te agaga i loto i tino taki tokotasi, me ne tuku atu ne te Atua ki a latou mō se pogai aoga.  E pelā mo te mea tenei, e auala i te agaga ne tuku atu ei ki se tino a te poto i te faipati, kae ko te agaga foki eiloa tenā ne tuku atu ei ki te suā tino a te atamai i te faipati,  ne tuku atu ki te suā tino a te fakatuanaki mai te agaga eiloa tenā, kae ki te suā tino ko te meaalofa ko te faka‵leiga o masaki e auala i te agaga foki eiloa tenā, 10  ki te suā tino ko te faiga o galuega ‵mana, ki te suā tino ko te faiga o valoaga, ki te suā tino ko te malamalama i pati fakaosofia, ki te suā tino ko te faipati ki ‵gana kese‵kese, kae ki te suā tino ko te ‵fuliga o pati ki nisi ‵gana. 11  Kae ko galuega katoa konei e fai ne te agaga eiloa e tasi, kae e tufa atu ki tino taki tokotasi e ‵tusa mo te loto o te Atua. 12  Me e pelā eiloa mo te foitino, e uke ana vaega, kae e tiga te uke o ana vaega kae e tasi fua te foitino, e penā foki a Keliso. 13  E auala i te agaga e tasi ne papatiso ei tatou katoa ki loto i te foitino e tasi, faitalia me ne tino Iutaia io me ne tino Eleni, faitalia me ne pologa io me ne tino saoloto, a tatou katoa ne fainu ki te agaga e tasi. 14  Me i te foitino e se tasi te vaega i ei, kae e uke ana vaega. 15  Kafai e fai mai te vae: “Au e sē se vaega o te foitino i a au e sē se lima,” e se fakauiga i ei i a ia e sē se vaega o te foitino. 16  Kae kafai e fai mai te taliga: “Au e sē se vaega o te foitino i a au e sē se mata,” e se fakauiga i ei i a ia e sē se vaega o te foitino. 17  Kafai a te foitino kātoa se mata, ka lagona la pefea ne ia a mea? Kafai se taliga, ka ‵sogi la pefea ne ia a mea? 18  Kae ko oti ne faite ne te Atua a vaega kese‵kese o te foitino e ‵tusa eiloa mo te mea e manako a ia ki ei. 19  Kafai e ‵pau katoa ana vaega, ka fai la pefea te foitino? 20  Kae nei la, e uke ana vaega kae e tasi fua te foitino. 21  E se mafai o fai atu te mata ki te lima: “Au e se manako ki a koe”; io me ko te ulu e fai atu ki te vae: “Au e se manako ki a koe.” 22  I lō te fai penā, a vaega o te foitino kolā e foliga mai me e vāi‵vai, e isi eiloa ne olotou aoga. 23  Kae ko vaega o te foitino kolā e mafau‵fau tatou me e se tāua malosi, e fakatāua malosi eiloa ne tatou, a ko vaega o ‵tou foitino kolā e foliga mai me e se mata ‵gali e atafai faka‵lei ne tatou. 24  Tela la, ko se manakogina ke toe fai se mea ki vaega ‵gali o te foitino. E tiga te feitu tenā, ne tuku fakatasi ne te Atua a vaega o te foitino ke faka‵lasi aka ei te tāua o vaega kolā e se tāua malosi, 25  ko te mea ke seai ne mavae‵vaega i te foitino, kae ke fakatau amanaia te suā vaega ki te suā vaega. 26  Kafai e logo‵mae se vaega e tasi, e logo‵mae ana vaega katoa; io me kafai e vikia se vaega e tasi, e fia‵fia fakatasi katoa a nisi vaega mo ia. 27  A koutou ko te foitino o Keliso, a ko koutou taki tokotasi ko ana vaega takitasi katoa. 28  Kae ko oti ne ‵tofi ne te Atua a galuega a tino taki tokotasi i te fakapotopotoga, muamua ko apositolo; te lua ko pelofeta; te tolu ko faiakoga; ko galuega ‵mana; ko te meaalofa i te faka‵leiga o masaki; ko galuega fesoasoani; te poto o fai te takitakiga, ko te faipati ki ‵gana kese‵kese. 29  E a, a tino katoa ne apositolo? E a, a tino katoa ne pelofeta? E a, a tino katoa ne faiakoga? E a, e fai ne latou katoa a galuega ‵mana? 30  E a, e maua ne tino katoa a te meaalofa ko te faka‵leiga o masaki? E a, e fai‵pati a tino katoa ki ‵gana kese‵kese? E a, e fai a tino katoa e pelā me ne tino ‵fuli pati? 31  Kae ke kausaki atu faeloa koutou ke maua a meaalofa kolā e tāua atu. Kae ka fakaasi atu ne au ki a koutou a te uiga telā e tafasili i te tāua.

Fakamatalaga mai lalo