1 Kolinito 10:1-33

10  Nei la, e manako au ke iloa ne koutou, e oku taina, me i ‵tou tupuga ne ‵nofo katoa mai lalo i te kaumana kae ne olo atu katoa i loto i te tai,  kae ne papatiso katoa latou e pelā me ne soko o Mose e auala i te kaumana mo te tai  kae ne ‵kai a latou katoa ki te meakai faka-te-agaga e tasi  kae inu katoa latou ki te meainu faka-te-agaga e tasi. Me ne inu sale latou mai te kaupapa faka-te-agaga telā ne tautali atu i a latou, a ko te kaupapa tenā ne fakauiga ki a Keliso.  E tiga te feitu tenā, ne seki fakaasi atu ne te Atua a tena taliaga ki te tokoukega o latou, me ne ‵mate atu latou i te koga lavaki.  Ne fai a mea konei mo fakaakoakoga ki a tatou, ko te mea ke se ma‵nako tatou ki mea kolā e pa‵kia ei a tino, e pelā mo mea ne ma‵nako latou ki ei.  Ke se fai foki tatou mo tino e ifo ki tupua, e pelā mo nisi tino i a latou; me ne tusi mai penei: “Ne saga‵saga a tino ki lalo o ‵kai kae inu, kae ‵tu aka foki ki luga o fai olotou fakafiafiaga.”  Ke mo a foki ma fai faeloa ne tatou a amioga fakatauavaga sē ‵tau e pelā eiloa mo nisi tino i a latou kolā ne aofia i amioga fakatauavaga sē ‵tau, kae ne ‵mate atu ei te toko 23,000 i a latou i te aso e tasi.  Ke se tofotofo foki ne tatou a Ieova e pelā mo nisi tino i a latou, kae ne tamate atu ei latou ne gata. 10  Ke se mui‵mui foki koutou e pelā mo nisi tino i a latou, kae ne tamate atu ei latou ne te tino fakaoko sala. 11  Ne ‵tupu a mea konei ki a latou ke fai e pelā me ne fakaakoakoga, kae ne tusi ki lalo mo fai se fakailoaga ke fakaeteete tatou kolā ko ‵nofo i te taimi o te gataga o te olaga tenei. 12  Tela la, ko te tino telā e mafaufau i a ia e tu, ke fakaeteete i a ia ma siga. 13  E seai eiloa se tofotofoga kai oko atu ki a koutou kae na ko mea kolā e masani o oko atu ki tino. Kae ko te Atua e fakamaoni, e se mafai o talia ne ia ke tofotofogina koutou ke silia atu i te mea telā e mafai o fa‵ki ne koutou, kae kafai ko oko mai a tofotofoga, e tuku mai foki ne ia a te auala e ‵sao ei koutou, ko te mea ke mafai ne koutou o kufaki i ei. 14  Tela la, e aku fagasele, ‵tele keatea mai te ifo ki tupua. 15  E faipati atu au ki tino kolā e malamalama, ke mafau‵fau faka‵lei koutou ki aku pati. 16  A te ipu o te fakamanuiaga telā e fakamanuia atu ei tatou, e a, e se ko te ‵kau fakatasi i te toto o Keliso? A ko te falaoa telā e tofitofi ne tatou, e a, e se ko te ‵kau fakatasi i te foitino o Keliso? 17  Ona ko te mea e tasi fua te falaoa, e tasi foki te foitino, e tiga eiloa e tokouke tatou, me e ‵kai katoa tatou i te falaoa e tasi. 18  Onoono atu ki te Isalaelu faka-te-foitino: E a, e se ‵kau fakatasi a tino kolā e ‵kai ki taulaga, mo te fatafaitaulaga? 19  Ne a la aku pati e fai atu? E mata, e aoga atu a mea kolā e ofo ki tupua, io me ko te tupua? 20  Ikai; kae fai atu au me i mea kolā e ofo atu ne fenua fakaa‵tea e ofo atu eiloa ne latou ki temoni, kae e se ki te Atua; kae e se manako au ke ‵kau fakatasi koutou mo temoni. 21  E se mafai o inu koutou ki te ipu a Ieova e pelā foki mo te ipu a temoni; e se mafai o ‵kai koutou i “te taipola a Ieova” e pelā foki mo te taipola a temoni. 22  “E a, ko fai ne tatou a Ieova ke loto masei”? E a, e ‵mafi atu tatou i a ia? 23  E saoloto a mea katoa; kae e se ko mea katoa e aoga. E saoloto a mea katoa; kae e se ko mea katoa e fakamalosi loto. 24  Ke se ‵sala atu a tino taki tokotasi ki tena ‵lei eiloa, kae mō te ‵lei o te suā tino. 25  E mafai o ‵kai faeloa koutou ki so se mea telā e fakatau atu i te maketi, e aunoa mo se sukesukega ki ei ona ko otou loto lagona 26  me “i te lalolagi mo mea katoa i luga i ei i o Ieova.” 27  Kafai e ‵kami koutou ne se tino sē talitonu kae e ma‵nako koutou o olo, kai so se mea e tuku atu ki a koutou e aunoa mo se sukesukega ki ei ona ko otou loto lagona. 28  Kae kafai e fai atu se tino ki a koutou: “A te mea tenei se taulaga telā e ofo atu ki tupua,” sa kai la ki ei, ona fua ko te tino telā ne fakaasi atu ne ia ki a koe, e penā foki mo te loto lagona. 29  E se fakauiga au ki tou loto lagona kae ko te loto lagona o te suā tino. Me kaia e fakamasino ei toku saolotoga ne te loto lagona o te suā tino? 30  Kafai e kai au mo te loto fakafetai ki te Atua, kaia la e fakamasei ei au i te mea telā ko oti ne fakafetai atu au e uiga ki ei? 31  Tela la, faitalia me e ‵kai koutou io me inu io me e fai so se mea aka, ke fai a mea katoa mō te vikiga o te Atua. 32  Ke mo a ma fai koutou mo mea e ‵siga ei a tino Iutaia e pelā foki mo tino Eleni mo te fakapotopotoga a te Atua, 33  e pelā eiloa mo te fakafiafia ne au a tino katoa i mea katoa, kae e se ‵sala atu au ki toku ‵lei eiloa kae mō te ‵lei o tino e tokouke, ko te mea ke mafai o ‵sao latou.

Fakamatalaga mai lalo