Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Ioane 5:1-21

5  So se tino e talitonu i a Iesu ko te Keliso ko oti eiloa ne fai te tino tenā mo fai se fanau a te Atua, kae ko so se tino e alofa ki te Atua e alofa foki ki fanau a te Atua.  Mai te mea tenei ko iloa ei ne tatou i a tatou e a‵lofa ki fanau a te Atua, māfai e a‵lofa tatou ki te Atua kae faka‵logo foki ki ana fakatonuga.  Me tenei eiloa te uiga o te alofa ki te Atua, ko te fakalogo ki ana fakatonuga. Kae ko ana fakatonuga e se ‵mafa,  me i tino katoa* kolā ko oti ne fa‵nau mai i te Atua e fakatakavale ne latou te lalolagi. Kae tenei eiloa te mea telā ne fakatakavale ne ia te lalolagi, ko te ‵tou fakatuanaki.  Ko oi te tino e mafai o fakatakavale ne ia te lalolagi? E se ko te tino telā e fakatuanaki i a Iesu ko te Tama a te Atua?  Tenei eiloa te tino telā ne vau e auala i te vai mo te toto, ko Iesu Keliso. E se ko te vai fua, kae ko te vai mo te toto. Kae ko te agaga telā ne molimau mai ki ei, me i te agaga ko te munatonu.  Me e tokotolu a molimau e uiga ki ei,  ko te agaga, te vai, mo te toto, kae ‵pau eiloa a molimau e tolu konei.  Kafai e maua ne tatou te molimau a tāgata, e sili atu eiloa te molimau a te Atua. Me tenei eiloa te molimau e tuku mai ne te Atua, me ko oti ne molimau mai a ia e uiga ki tena Tama. 10  A te tino telā e fakatuanaki ki te Tama a te Atua e maua ne ia te molimau tenā i loto i a ia. A te tino telā e se fakatuanaki ki te Atua ko fai ne ia a ia eiloa mo fai se tino loi, me e seki fakatuanaki ki te molimau telā ne tuku mai ne te Atua e uiga ki tena Tama. 11  Kae tenei eiloa te molimau, me ne tuku mai ne te Atua ki a tatou te ola se-gata-mai, kae ko te ola tenei e auala mai i tena Tama. 12  A te tino telā e maua ne ia te Tama e maua foki ne ia te ola tenei. A te tino telā e se maua ne ia te Tama a te Atua e se maua foki ne ia te ola tenei. 13  E tusi atu ne au a mea konei ko te mea ke iloa ne koutou me ko maua ne koutou te ola se-gata-mai, a koutou kolā e fakatuanaki ki te igoa o te Tama a te Atua. 14  Kae tenei eiloa te mea e tali‵tonu ei tatou ki a ia, me kafai e fakatagi atu tatou ki se mea e ‵tusa mo tena loto, ka fakalogologo mai eiloa a ia ki a tatou. 15  E se gata i ei, kafai e iloa ne tatou me e fakalogologo mai a ia ki so se mea e fakatagi atu ei tatou, e iloa ne tatou me ka maua eiloa a mea kolā e fakatagi atu ei tatou me ko oti ne fakatagi atu tatou ki a ia. 16  Kafai e lavea ne se tino tena taina ko fai ne ia se agasala telā e se iku atu ki te mate, e ‵tau o ‵talo atu a ia kae ka tuku atu ne te Atua te ola ki te tino tenā, e tonu, ka tuku atu eiloa ne ia te ola tenā ki tino kolā e agasala ki te agasala telā e se iku atu ki te mate. Kae e isi se agasala telā e iku atu eiloa ki te mate. Tenei la te agasala e se fai atu au ke ‵talo a ia e uiga ki ei. 17  A amioga ma‵sei katoa ne agasala, kae e isi eiloa se agasala telā e se iku atu ki te mate. 18  E iloa ne tatou me i so se tino telā ko oti ne fai mo fai se fanau a te Atua e se fai faeloa ne ia te agasala, kae e puipui a ia ne te Tino telā ne fanau mai i te Atua, kae e se mafai o puke a ia ne te tino masei. 19  E iloa ne tatou i a tatou e māfua mai i te Atua, kae ko te lalolagi kātoa ko nofo mai lalo i te pule a te tino masei. 20  E iloa ne tatou me ko oti ne vau te Tama a te Atua, kae ko oti ne tuku mai ne ia ki a tatou te poto* ko te mea ke iloa ne tatou te tino telā e tonu. Kae e ‵kau fakatasi tatou mo te tino tonu tenei, e auala i tena Tama ko Iesu Keliso. Tenei eiloa te Atua tonu mo te ola se-gata-mai. 21  Aku tama, ke puipui koutou mai tupua.

Fakamatalaga mai lalo

1Io 5:4
 I te ‵gana Eleni, “mea katoa.”
1Io 5:20
 I te ‵gana Eleni, “te malosi o te mafaufau.”