Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

1 Ioane 2:1-29

2  Aku tama, ko tusi atu ne au a mea konei ki a koutou ko te mea ke se fai ne koutou se agasala. Kae kafai e fai ne se tino se agasala, e isi se ‵tou fesoasoani telā e ‵nofo mo te Tamana, ko Iesu Keliso, te tino amiotonu.  A ia ko te taulaga mō ‵tou agasala ke faka‵lei aka ei tatou mo te Atua, kae e se ko ‵tou agasala fua kae e pelā foki mo agasala a te lalolagi kātoa.  E auala i te mea tenei ko iloa ei ne tatou a ia, māfai e faka‵logo faeloa tatou ki ana fakatonuga.  A te tino telā e fai mai, penei: “Ko iloa ne au a ia,” kae tela la, e se fakalogo ki ana fakatonuga, a te tino tenā se tino loi, kae e se nofo te munatonu i loto i a ia.  Kae ko so se tino e fakalogo ki tena muna, ko katoatoa i loto i te tino tenei a te alofa ki te Atua. E auala i te mea tenei ko iloa ei ne tatou me e ‵kau fakatasi tatou mo ia.  A te tino telā e fai mai me e ‵kau fakatasi lāua mo ia e ‵tau foki o sasale faeloa e pelā mo ia.  Aku fagasele, e se tusi atu ne au ki a koutou se fakatonuga fou, kae se fakatonuga mua loa telā ko leva ne maua ne koutou mai i te kamataga. A te fakatonuga mua tenei ko te muna telā ne lagona ne koutou.  Ko toe tusi atu ne au ki a koutou se fakatonuga fou telā se mea tonu e uiga ki a ia e pelā foki mo koutou, me ko teka atu keatea te pouliga kae ko leva ne maina mai te mainaga.  A te tino telā e fai mai i a ia e nofo i te mainaga kae tela la, e takalialia ki tena taina e nofo eiloa a ia i te pouliga ke oko mai eiloa ki te taimi nei. 10  A te tino telā e alofa ki tena taina e tumau i te mainaga, kae seai se pogai e ‵tau ei o siga a ia. 11  Kae ko te tino telā e takalialia ki tena taina e nofo eiloa i te pouliga kae e sasale foki i loto i te pouliga, kae e se iloa ne ia te koga e fano a ia ki ei, me ko oti ne faka‵segi ana mata ne te pouliga. 12  E tusi atu au ki a koutou, e aku tama, me ko oti ne fakamagalo otou agasala mō te ‵lei o tena igoa. 13  E tusi atu au ki a koutou, e tamana, me ko oti ne iloa ne koutou a ia tenā mai te kamataga. E tusi atu au ki a koutou e tāgata tai fo‵liki me ko oti ne fakatakavale ne koutou te tino masei. E tusi atu au ki a koutou, e tama‵liki, me ko oti ne iloa ne koutou te Tamana. 14  E tusi atu au ki a koutou, e tamana, me ko oti ne iloa ne koutou a ia tenā mai te kamataga. E tusi atu au ki a koutou e tāgata tai fo‵liki, me i a koutou koi ma‵losi kae e tumau i a koutou te muna a te Atua kae ko oti ne fakatakavale ne koutou te tino masei. 15  Ke mo a e fia‵fai koutou ki te lalolagi io me ko mea i te lalolagi. So se tino e fiafai ki te lalolagi e se alofa a ia ki te Tamana i tena loto, 16  me i mea katoa i te lalolagi—ko manakoga o te foitino mo manakoga o mata mo mea e sona fakamata‵mata ki ei a tino i te olaga nei*—e se māfua mai i te Tamana, kae māfua mai eiloa i te lalolagi. 17  E se gata i ei, ka fakaseai atu te lalolagi e pelā foki mo ana manakoga, kae ko te tino telā e fai ne ia te loto o te Atua ka tumau eiloa ki te se-gata-mai. 18  Aku tama, ko te itula fakaoti tenei, e pelā eiloa mo te mea ko oti ne lagona ne koutou me ka oko mai te fili o Keliso. E tokouke a fili o Keliso ko oti ne oko mai i te taimi nei. Ko iloa ei ne tatou me ko oko mai te itula fakaoti. 19  Ne olo keatea latou mai i a tatou, me i a latou e se ne tino o tatou. Moi fai a latou ne tino o tatou penei e ‵nofo tumau eiloa a tino konā mo tatou. Kae ne olo keatea latou ko te mea ke fakaasi mai i ei me e se ko tino katoa ne tino o tatou. 20  Kae ko oti ne fakaekegina koutou ne te tino telā e tapu, kae ko maua ne koutou katoa te poto. 21  E tusi atu au ki a koutou, e se ona ko te mea e se iloa ne koutou te munatonu, kae ona ko te mea e iloa eiloa ne koutou, kae ona foki ko te mea e seai se loi e māfua mai i te munatonu. 22  Ko oi te tino loi, e se ko ia telā e fakafiti ne ia i a Iesu ko te Keliso? Tenei eiloa te fili o Keliso, ko te tino telā e fakafiti ne ia te Tamana mo te Tama. 23  So se tino e fakafiti ne ia te Tama e se maua foki ne ia te Tamana. A ko te tino telā e talitonu ki te Tama e maua foki ne ia te Tamana. 24  Kae e pelā mo koutou, a te mea telā ne lagona ne koutou i te kamataga e ‵tau o tumau i loto i a koutou. Kafai e tumau i a koutou a te mea telā ne lagona ne koutou i te kamataga, ka ‵kau fakatasi foki koutou mo te Tama fakatasi mo te Tamana. 25  E se gata i ei, tenei eiloa te mea ne folafola mai ne ia ki a tatou, ko te ola se-gata-mai. 26  Konei a mea e tusi atu ne au ki a koutou e uiga ki a latou kolā e taumafai o takitaki ‵se koutou. 27  Kae e pelā mo koutou, a te fakaekega telā ne maua ne koutou mai i a ia e tumau eiloa i a koutou, kae e se manakogina ke akoako koutou ne se isi tino. Me e akoako eiloa koutou ne te fakaekega tenā mai i a ia e uiga ki mea katoa, ne mea ‵tonu eiloa, kae e seai se loi i ei. Ke tumau koutou i te ‵kau fakatasi mo ia e pelā eiloa mo tena akoakoga ki a koutou. 28  Tela la, e aku tama, tumau i te ‵kau fakatasi mo ia, ko te mea ke maua eiloa ne tatou te saolotoga o fai‵pati atu māfai e fakaasi mai a ia kae e se ‵tele keatea tatou mo te masiasi mai i a ia. 29  Kafai e iloa ne koutou i a ia e amiotonu, ko iloa ei ne koutou i tino amio‵tonu ko ana fanau katoa.

Fakamatalaga mai lalo

1Io 2:16
 Io me “fakamatamata ki ana kope.”