Ona ko te pilipili mai o te fakalavelave lasi, ko oko eiloa i te manakogina ke fakava‵vave aka te ‵tou galuega talai. (Fat 24:11, 12, 20) Ke fesoasoani atu ki tino, e mafai o fakaaoga ne tatou a pepa ki te ‵tou fakatuatusi ke takitaki atu ei a tino ke ‵saga tonu atu ki te Muna a te Atua mo te ‵tou website. E aofia i te pepa tenā se code telā e mafai o takitaki atu ei koe ki te vitio ko te Kaia e ‵Tau ei o Sukesuke ki te Tusi Tapu? fakatasi mo se ‵kamiga ke fakamolemole atu ki fakamatalaga fakaopoopo io me se akoga faka-te-Tusi Tapu. E se ma‵nako a nisi tino ki ‵tou tusi kae e fia‵fia fua o olo atu ki luga i ‵tou website. Sa fakatalave o tuku atu ki a latou se pepa ki te fakatuatusi. Kae sa tuku atu ne tatou a pepa ki te fakatuatusi ki fale kolā e se fia‵fia.

I te taimi e fai ei au galuega i aso takitasi, e mafai o fakamalosi aka ne koe te fiafia o se tino mai te fai atu: “E isi se mea e fia tuku atu ne au ki a koe. E fakaasi atu ne te pepa tenei ki a koe a te website telā e maua i ei a fakamatalaga sē ‵togi mo vitio e uiga ki mataupu kese‵kese.” (Ioa 4:7) Ona ko te mea e fo‵liki a pepa konā, e mafai ne koe o tausi faka‵lei a nisi pepa konei ko te mea ke tufa atu ne koe ki nisi tino i so se taimi.