Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Tesema 2015

E Iloa ne Koe?

E Iloa ne Koe?

E mata, ne olo atu a tino Iutaia “mai fenua katoa i lalo o te lagi” ki Ielusalema i te Penitekoso 33 T.A.?

Se auala e ‵fonu i tino i Ielusalema i te Penitekoso 33 T.A.

I tafa o te tala i te Tusi Tapu telā e maua ne tatou i te Galuega 2:5-11, a te tino tusi tala ko Philo telā ne ola fakatasi mo tino Iutaia i te vaitaimi tenā, ne fakamatala mai ne ia te potukau o tino kolā ne olo atu ki Ielusalema i te Penitekoso 33 T.A.

E pelā mo latou kolā e faima‵laga atu ki Ielusalema, ne tusi mai a Philo: “Ne faima‵laga atu a tino e tokouke mai fenua kese‵kese i luga i te laukele mo te tai, nisi tino mai te saegala, togala, matū mo saute ke ‵kau atu ki so se fakamanatuga fakalotu. Ne taku mai foki ne ia a pati i te tusi a Akelipa I, te mokopuna o Helota te Sili, ki te Emupaea o Loma ko Caligula. I loto i ei, ne fakaasi mai ne Akelipa se mea e uiga ki Ielusalema: “Te Fa‵kai Tapu . . . e se ko te laumua fua o te fenua ko Iuta kae e penā foki mo nisi fenua, ona ko kolone io me ko ana tino kolā ne uga atu i taimi takitasi ki fa‵kai pili atu.”

Ne tusi mai ne Akelipa a fenua kolā ne faka‵tu aka i ei a kolone o Iuta, e aofia i ei a koga ‵mao i Mesopotamia, Afelika ki matū, Asia Foliki, Eleni mo fenua i te Metitilani. Ne fai mai se tino akoga e tokotasi ko Joachim Jeremias: “E tiga eiloa a te fakasologa tenei o kogā koga e se taku mai ei te pogai o te faima‵laga atu ki Ielusalema, kae mautinoa eiloa me se tulafono mō tino Iutaia ma‵tua katoa ke faima‵laga atu ki konā.”—Teutelonome 16:16.

Ne faka‵nofo pefea a te fia afe o tino kolā ne olo atu ki Ielusalema mō fakamanatuga faka-Iutaia?

Mea Ne ‵Toe Mai i Koga Kou‵kou Kae Faka‵ma i ei a Tino mō te Tapuakiga i Ielusalema

E tolu a vaegā fakamanatuga e fai i tausaga katoa i Ielusalema—te Paseka, te Penitekoso, mo te ‵Kaiga o Fale Fakamalumalu. I te senitenali muamua, e fia selau afe o tino ne faima‵laga atu ki Ielusalema ke ‵kau atu ki fakamanatuga konā mai Isalaelu kātoa mo fenua katoa kolā e ‵nofo i ei a tino Iutaia. (Luka 2:41, 42; Galuega 2:1, 5-11) E ‵tau mo tino faima‵laga katoa konei o ‵sala ne koga mo olotou ‵nofo.

E isi ne tino ne ‵nofo i olotou taugasoa; nisi tino ne ‵nofo i fale talimālō. E tokouke a tino ne ‵nofo i faleie i kogā koga i loto io me i tafa o te ‵pui o te fa‵kai. I tena toe malaga ki Ielusalema, ne nofo atu a Iesu i se fa‵kai pili atu ko Petania.Mataio 21:17.

E uke a mea ne faite i aso mua e maua atu i ei a tāpu kou‵kou i tafa o te faletapu. Ne taku ne tino a fale konei ki fale talimālō kolā e fakaaoga sāle ne tino faima‵laga mo olotou ‵nofo kae kou‵kou i ei a koi tuai o ulu atu ki te faletapu. E isi se tusitusiga ne maua atu i se fale e tasi mai fale konei telā e taku mai i ei a Theodotus, se faitaulaga kae se takitaki foki i te sunako, “ne faite ne ia a sunako ke faitau atu i ei a te Torah [te Tulafono] kae . . . ko fale talimālō, potu mo vai mō tino mai fenua fakaa‵tea.”