Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Aokuso 2015

 MATAUPU I TE ‵KAVAT | TE OLAGA MAI TUA O TE MATE—E MATA, E ISI EILOA?

Se a te Mea e Tupu Māfai ko Mate se Tino?

Se a te Mea e Tupu Māfai ko Mate se Tino?

“Au ne mafaufau me e tolu a koga e mafai o fanatu ki ei se tino māfai ko mate: te lagi, afi i seoli, io me ko pekatuli. Ne iloa ne au me i a au e se tō ‵lei ke fanatu ki te lagi io me se tō masei ke fanatu ki te afi i seoli. Ne seki maina ‵lei au me se a tonu eiloa a pekatuli. Ne seki lavea aka eiloa ne au a mea konā i te Tusi Tapu. Ko pati fua a tino e uiga ki ei.”—Lionel.

“Ne akoako mai ki a au me i tino katoa ka olo atu ki te lagi māfai ko ‵mate, kae ne seki talitonu katoatoa au ki ei. Ne mafaufau au me i te mate ko te gataga o mea katoa—me e seai se fakamoemoega mō tino ‵mate i aso mai mua.”—Fernando.

Kai mafaufau aka eiloa koe: ‘Se a te mea e tupu māfai ko mate se tino? E mata, e logo‵mae ‵tou tino pele i se koga? Ka toe fetaui tatou? E mafai pefea o mautinoa i a tatou?’ Fakamolemole, mafaufau ki mea kolā e akoako ‵tonu mai i te Tusi Tapu. Muamua la, ke onoono tatou ki pati i te Tusi Tapu e uiga ki te mate. Ko sau‵tala ei tatou ki te fakamoemoega telā e tuku mai ne te Muna a te Atua, ko te Tusi Tapu.

 Se a te tulaga o tino ‵mate?

TE TALI I TE TUSI TAPU: “E iloa ne tino ola i a latou e ‵mate, ka ko tino ‵mate e seai se mea a latou e iloa. E seai aka foki eiloa se mea ‵lei e maua ne latou me ko se toe manatua latou. Galue malosi ki tau mea e fai, me kafai e oko koutou ki te lalolagi o tino ‵mate, te koga ka olo koutou ki ei, e se toe mafau‵fau koutou, seai se poto e toe ‵sala ne koutou, se toe gasue‵sue foki koutou.” *Failauga 9:5, 10.

A te Tanuga io me ko te Lalolagi o tino ‵mate, ko te koga e olo ki ei a tino māfai ko ‵mate latou; se koga io me se tulaga fakatusa telā ko se toe mafaufau io me e gasue‵sue i ei. Ne kilo atu pefea a te tagata fakamaoni ko Iopu ki te Tanuga? Ne ‵galo atu ana kope mo ana tamaliki katoa i te aso e tasi, kae ne logo‵mae malosi foki tou tagata i fakafoa i tena foitino kātoa. Ne fakamolemole atu a ia ki te Atua: “Aku muna loa i a au e faka‵muni ne koe i te lalolagi o tino ‵mate [“i seoli,” Douay Version a te Katolika].” (Iopu 1:13-19; 2:7; 14:13) E manino ‵lei i ei, me ne seki kilo atu a Iopu ki te Tanuga e pelā me ko te afi i seoli, se koga telā e momea aka ei ana logo‵maega. I lō te fai penā, ne mafaufau a ia me se koga e fakasaoloto ei a ia mai i ana logo‵maega.

E isi aka foki se auala ke iloa ne tatou a te tulaga o tino ‵mate. E mafai o iloilo aka ne tatou a tala i te Tusi Tapu e uiga ki tino e tokovalu kolā ne toe faka‵tu mai i te mate.—Ke onoono ki te pokisi “Toe‵tuga e Valu i te Tusi Tapu.”

E seai eiloa se tino i a latou ne faipati mai e uiga ki se palataiso i te lagi io me se koga fakapuapuaga. Moi ne olo atu a tino ne faka‵tu mai ki se vaegā koga penā i te taimi ne ‵mate ei, e a, ka se fakamatala atu ne latou ki tino? Kae e mata, ka se aofia a tala fakaosofia konei i te Tusi Tapu ke iloa ne tino katoa? I te Tusi Tapu, e seai eiloa ne fakamatalaga penei ne fakamau i ei. E mautinoa eiloa me seai ne pati a tino e tokovalu konā e uiga ki te mataupu tenā. Kaia? Ona ko te mea e seai se lotou mea e iloa, e pelā eiloa me ne ‵nau ‵ki olotou ‵moe. A te ‵tonuga loa, e fakaaoga sāle i te Tusi Tapu i nisi taimi a te moe e pelā me se fakatusaga ke fakamatala mai i ei a te tulaga o te tino mate. E pelā eiloa mo Tavita mo Setefano ne “‵moe i te mate.”Galuega 7:60, fakamatalaga mai lalo; 13:36.

Se a la te fakamoemoega mō tino ‵mate? E mata, e mafai o toe ‵fagu aka latou mai te mate?

^ pala. 7 I te Tusi Tapu o te Lalolagi Fou, a te pati ko te “Tanuga” ne fakaaoga ke ‵fuli ki ei te pati Epelu ko te “Seoli” mo te pati Eleni ko te “Heitisi.” E fakaaoga ne nisi ‵fuliga o te Tusi Tapu a te pati ko te “afi i seoli,” kae ko te manatu e uiga ki te koga fakapuapuaga ki te afi mō tino ‵mate e sē se akoakoga faka-te-Tusi Tapu.