Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU I TE ‵KAVA | KE FAKAFESAGAI ATU KI TE MANAVASE

A te Manavase ko Oko ki Koga Katoa!

A te Manavase ko Oko ki Koga Katoa!

“Ne fanatu au o ‵togi meakai kae ‵toe mai fua a masikeke —kae e sili faka-10,000 taimi te ‵togi i lō te ‵togi masani! I te suā aso, ne seai eiloa ne mea‵kai ne ‵toe i te sitoa.” —Paul, i Zimbabwe.

“Ne faipati mai taku avaga kae fai mai me ko tiakina ne ia matou. Ne mafai pefea o fa‵ki au i te amioga faitogafiti tenei? Ne a mea ka ‵tupu ki aku tama‵liki?”—Janet, i Amelika.

“I te taimi e tagi ei te pū mō te taua, ne tele au o ‵muni kae takato i te fola i te taimi e ‵pa mai ei a loketi. I te fia o itula mai tua ifo, koi pole‵pole eiloa oku lima.”—Alona, i Isalaelu.

Ko ola tatou i taimi o te manavase, ko “taimi faiga‵ta.” (2 Timoteo 3:1) E pokotia faeloa a tino e tokouke i fakalavelave i mea tau tupe, mavae‵vae o kāiga, taua, masaki tamate tino, mo fakalavelave o te natula io me kolā e māfua mai i tino. I tafa o mea konei, ko mea totino kolā e manava‵se ki ei tatou: ‘E mata, a te pōnaga i toku foitino e iku atu ki te kenisa?’ ‘Se a te vaegā lalolagi ka ‵tupu aka i ei oku mokopuna?’

E se ma‵sei a mea katoa e manava‵se ki ei. E masani o pole‵pole malie tatou mai mua o se sukega, se siva, io me se fakasau‵talaga mō se galuega ‵togi. A te mataku ‵tau e fesoasoani mai ki te puipuiga o tatou mai i mea fakalogo‵mae. Kae ko te ‵tō manavase io me ko te manavase faeloa e mafai o fakalogo‵mae mai. Ne fakaasi mai ne se sukesukega fakamuli nei o tino ma‵tua kolā e silia atu i te toko 68,000 ne aofia i ei, me ke oko foki eiloa ki te manavase malie e momea aka ei te ‵mate fo‵liki o tino. Ona ko te mea tenei, ne fesili atu a Iesu: “Ko oi i a koutou konā, e mafai o fakaloa malie aka ne ia tena ola i tena manavase?” A te ‵tonuga loa, e se fakaloa ne te manavase a te ola o se tino. Tela la, ne fakamalosi atu a Iesu: “Sa toe manava‵se.” (Mataio 6:25, 27) Kae e mafai pefea o fai penā?

E aofia eiloa a te tali i te fakagaluegaga o te poto aoga, te fakamalosiakaga o te fakatuanaki tonu ki te Atua, mo te atiakaga o te fakamoemoega tonu mō aso mai mua. Kafai foki e se fe‵paki nei tatou mo fakanofonofoga faiga‵ta, e mafai o tupu se mea penā i aso mai mua. Tela la, ke na onoono aka tatou ki te auala ne fesoasoani atu a mea konei ki a Paul, Janet, mo Alona i te fakafesagai atu ki te manavase.