Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Iuni 2015

 TALA TONU

Se Mea Tāua ne Tuku Fakasolo Mai ke Oko ki te Fitu o Kautama

Se Mea Tāua ne Tuku Fakasolo Mai ke Oko ki te Fitu o Kautama

E fai mai a tino me e tai ‵pau eiloa au mo toku tamana. Oku tuputupuga, oku mata, mo oku uiga fai fa‵kata, ne maua katoa mai i a ia. Kae ne tuku fakasolo mai foki ne ia se isi mea—se koloa tāua ki kautama e fitu i toku kāiga. Ke fakamatala atu ne au.

Ne tauloto fakatasi māua mo toku tamana, ki se koloa tāua penā i te motou kāiga

I a Ianuali po 20, 1815, ne fanau toku tupuga ko Thomas (1) * Williams i Horncastle, i Egelani. Ne mate tena mātua i se lua tausaga mai tua ifo, kae ne puti aka a ia mo ana taina e tokotolu ne te lotou tamana, ko John Williams. Ne akoako ne John a Thomas e pelā me se kamuta, kae ne fakamalosi aka a Thomas ke fai se isi galuega.

Ne kamata o toe faka‵fou aka a faifaiga fakalotu i Egelani kātoa. Ne ‵vae keatea a John Wesley mai te Lotu Egelani ke fakatu aka te Sosaiete o Metotisi, se potukau telā ne faka‵mafa ne latou a te faiga o sukesukega totino ki te Tusi Tapu mo te talai atu. Ne salalau atu eiloa a akoakoga a Wesley e pelā me se afi tena makini, kae ne puke ‵mautakitaki a te kāiga o William ki ei. Ne fai a Thomas mo fai se failauga i te lotu Uesele kae ne fiafia o galue fakagamua mō te galuega fakamisionale i te Pasefika ki Saute. I a Iulai 1840, ne olo atu lāua mo tena avaga, ko Mary (2) ki te Motu o Lakeba, * i Fiti, se motu telā e uke a mauga ‵ka i ei kae ne ‵nofo foki i ei a tino kai tino.

NE ‵NOFO FAKATASI MO TINO KAI TINO

I tausaga kamata o lāua i Fiti, ne kufaki a Thomas mo Mary i tulaga faiga‵ta. Ne ga‵lue lāua i te fia o itula i koga kolā koi ola i olaga i aso mua mo te ‵vela. Ne fe‵paki foki lāua mo mea fakama‵taku—taua i va o matakāiga, te ‵kumiga o ua o fafine ko ‵mate olotou avaga, te tamatega o tama‵liki, mo tino kai tino—kae ne ‵teke atu a te tokoukega o tino ki te lā fekau. Ne ma‵saki a Mary mo tena tama tagata matua, ko John, kae toeitiiti ko ‵mate. I te 1843, ne tusi mai a Thomas: “Ne poi masei au. . . . Toeitiiti eiloa ko seai soku malosi.” . . . Kae ne tumau eiloa lāua mo Mary, kae ne maua ne lāua te malosi mai i te lā fakatuanaki ki a Ieova te Atua.

I te vaitaimi tenā, ne fakaaoga faka‵lei ei ne Thomas tena atamai i mea tau kamuta ke faite ei se fale palagi muamua i Fiti. Ne fakapāpā te fale kae ne avaka loa ke maluga mo nisi mea i ei kolā ne fai ei ke fia onoono atu a tino Fiti. A koi tuai o oti te fale, ne fanau mai ne Mary tena tamaliki tagata i te tokolua, ko Thomas Whitton (3) Williams, ko toku tupuga tonu eiloa.

I te 1843, ne fesoasoani mai a Thomas matua ke ‵fuli te Evagelia a Ioane ki te ‵gana Fiti, se galuega telā ne faigata ‵ki. * Kae ne fai mo fai se tino poto i te iloiloga o tino mo te atamai ke iloa aka ne ia a fakamatalaga likiliki. Ne fakamau faka‵lei eiloa ne ia ana sukesukega ne fai i tena tusi ko te Fiji and the Fijians (1858), se tala gali e uiga ki te olaga o se tino Fiti i te 19 senitenali.

Ona ko te leva o tena nofoatuga i Fiti mō tausaga e  13, ne masaki ei a Thomas, kae ne toe ‵foki atu a ia mo tena kāiga ki Ausetalia. Mai tua o se taimi leva ‵ki telā ne fai ei a ia mo fai se faifeau tu ‵kese, ne mate atu a Thomas i Ballarat, Victoria, i te 1891.

“AULO” I TE TOGALA

I te 1883, a Thomas Whitton Williams mo tena avaga, Phoebe,(4) ne olo atu mo te lā kāiga koi fo‵liki ki Perth, i Ausetalia ki Togala. A te lua o lā tama, ko Arthur Bakewel1 (5) Williams, ko toku tupuga mai tua ifo, ko iva ana tausaga i te taimi tenā.

I te taimi ko 22 ei a tausaga o Arthur, ne fanatu a ia o ‵sala manuia ki Kalgoorlie, se fa‵kai keli aulo telā kāti e 370 maila (600 km) i te feitu ki saegala o Perth. I konā ne faitau ei ne ia a nisi mekesini ne ‵lomi ne te International Bible Students, ko te igoa o Molimau a Ieova i aso konā. Ne fai foki sena feagaiga mō mekesini ki te Zion’s Watch Tower. Ona ko te fiafia ki ana mea ne faitau, ne kamata o fakaasi atu ne Arthur ana mea ‵fou ne iloa ki nisi tino kae fai foki ne ia a fakatasiga mō sukesukega faka-te-Tusi Tapu. Mai i tamā kamataga konā, ne gasolo aka ei ki luga a te galuega a Molimau a Ieova i Ausetalia ki Togala.

Ne fai atu foki ne Arthur ki tena kāiga e uiga ki ana mea ne tauloto. Ne ‵lago atu tena tamana ko Thomas Whitton, ki te kau atu o Arthur ki Tino A‵koga i te Tusi Tapu kae e seki leva kae mate atu tou tagata. Ne fai foki tena mātua, ko Phoebe, mo ana tuagane, ko Violet mo Mary, mo fai ne Tino A‵koga i te Tusi Tapu. Ne fai a Violet mo fai se tino talai tumau, io me se paenia. Ne fai mai a Arthur me ne fai tou fafine mo fai “te ‵toe paenia ‵lei kae loto finafinau kae loto fiafia i te feitu ki Togala o Ausetalia.” Kāti ne tai fapito a Arthur, me ko te fakaakoakoga loto finafinau a Violet ne lasi ‵ki tena fakamalosiga ki te kautama mai tua ifo o te kāiga o Williams.

E seki leva, ne avaga a Arthur kae ne fanatu ki Donnybrook, se fa‵kai e ‵fua malosi ei a lakau i te feitu ki saute-togala o te feitu ki Togala o Ausetalia. I konā ne maua ne ia se igoa fakasalasala ko “Old Mad 1914!” ona ko te folafola atu ne ia mo te loto finafinau a valoaga i te Tusi Tapu e uiga ki te tausaga tenā. * Ne gata atu a te fakaitaitaga i te taimi ne kamata ei a te Taua Muamua a te Lalolagi. Ne talai atu faeloa a Arthur ki tino kolā ne olo atu ki tena sitoa, telā ne faka‵tu atu ne ia a tusi faka-te-Tusi Tapu i te famalama. Ne fakatu foki ne ia i te famalama se fakailoga telā ne ofo atu ei se 100 pauni ki so se tino telā ne mafai o fakamaoni atu ne ia a te ‵tonu o te Tolutasi—se akoakoga telā e se fakavae ki te Tusi Tapu kae ne ‵teke malosi atu ki ei a Arthur. E seai eiloa se tino ne maua ne ia a tupe konā.

Ne fai a te fale o William mo fai se koga fakavae mō te potukau ke suke‵suke ki te Tusi Tapu i ei mo fakatasiga a te fakapotopotoga i Donnybrook. Fakamuli ifo, ne faite ne Arthur se Fale Tapuaki, io me se fale fai fakatasiga, i te fa‵kai—ko te fale muamua eiloa penā i Ausetalia ki Togala. Ke oko ki te taimi ko 70 tupu ana tausaga, ne pei tena tivae mo tena peleue, sopo atu ki luga i tena solofanua e igoa ki a Doll, kae fanatu o talai i fa‵kai katoa o Donnybrook.

Ne pokotia malosi a tama‵liki a Arthur i faifaiga a te lotou tamana, telā ne uiga filemu kae faka‵malugina,  kae e lasi ‵ki tena loto finafinau. Ne tavini atu tena tama fafine ko Florence (6) e pelā me se misionale i Initia. Tena tama ko Arthur Lindsay (7) mo Thomas, e pelā mo te lā tamana, ne tavini atu e pelā me ne toeaina i te fakapotopotoga mō se taimi leva ‵ki.

SE FAFINE GALI KO WILLIAMS

A Arthur Lindsay Williams, te tamana o toku tupuna, ne lauiloa kae ne alofagina ona ko ana uiga atafai. Ne fakaavanoa faeloa ne ia ana taimi mō tino kae ne fakaasi atu ne ia te āva ki a latou. Ne fai foki a ia mo fai te ‵toe tino ‵fai eiloa i te fakaaogaga o te takū, telā ne sili a ia i taimi e 18 i te katikatiga o lakau ki te takū mō tausaga e 12.

Kae ne seki poi malosi eiloa a Arthur, i te taimi ne puke ei ne tena tama tagata ko lua ana tausaga, ko Ronald (8) (toku tupuna), a te takū o katikati ki ei se tamā lakau ko te apolo i tafa o te fale o te kāiga. Ne saisai faka‵lei eiloa ne te mātua o Ronald a te lakau, kae ne fua fakamuli mai i ei a toe apolo ma‵galo eiloa. Ne fakaigoa eiloa a te apolo ki te Lady Williams, kae ne fakaaoga a te vaega fou tenā ke ‵fua mai i ei a te apolo ko te Cripps Pink, ko te vaega lauiloa e tasi o apolo i te lalolagi.

A Ronald, io me ko Gramp, ko te igoa e kalaga atu ki ei, ne saga atu fakamuli ki nisi galuega aoga. Ne tavini atu lāua mo Grandma i te fia o tausaga e pelā me ne tino ga‵lue fakagamua i galuega fakatū‵tu a te kau Molimau i Ausetalia mo Solomona. Toeitiiti kae kātoa nei tena 80 tausaga, kae koi tavini atu eiloa a ia e pelā me se toeaina i te fakapotopotoga kae fesoasoani atu ki te faitega mo te faka‵fouga o Fale Tapuaki i Ausetalia ki Togala.

NE FAKATĀUA NE AU A TE KOLOA TĀUA NE TUKU MAI KI A AU

I te tau‵tali atu ki te koloa tāua o te kāiga, ne ga‵lue malosi oku mātua, ko Geoffrey (9) mo Janice (10) Williams, ke puti aka māua mo toku tuagane, ko Katharine, ke fakatāua a akoakoga fakavae Kelisiano. I te taimi ko 13 ei oku tausaga, ne puke ‵mau au ki akoakoga tāua konā. I te taimi ne kau atu ei au ki se fono faka-Kelisiano, ne lagona ne au a John E. Barr, se sui o te Potukau Pule o Molimau a Ieova, ne fakamalosi atu ki talavou i te kautaina: “Sa fakamāumāu ne koutou a te ‵toe mea tāua telā e maua ne koutou—te avanoaga ke iloa kae a‵lofa ki a Ieova.” I te po eiloa tenā, ne fai ei te tukuatuga o toku ola ki a Ieova. I te lua tausaga mai tua ifo, ne kamata ei au o paenia.

I aso nei, ko (12) ‵kau atu māua mo taku avaga, ko Chloe, ki te galuega talai tumau, (11) i Tom Price, se fa‵kai foliki kae ‵mao o Ausetalia Togala, i te feitu ki matū togala. Ne ga‵lue maua i galuega sē tumau ke mafai o maua a mea e manakogina ne māua. Ne paenia matou mo oku mātua mo toku tuagane ko Katherine, mo tena avaga, ko Andrew, i Port Hedland, kāti e nofo ki te 260 maila (420 km) ki te feitu ki matū. Ne tavini atu foki māua mo toku tamana e pelā me ne toeaina i te fakapotopotoga.

I te fitu o kautama mai mua atu i ei, ne fakaiku aka ne toku tupuga ko Thomas William, ke tavini atu a ia ki a Ieova te Atua. A te koloa tāua tenā o te fakatuanaki mo te taviniga ne tuku fakasolo mai ki lalo, ke oko mai eiloa ki a au. E maua ne au a te lagonaga me se fakamanuiaga tonu eiloa ke maua se koloa tāua faka-te-agaga penā.

^ pala. 5 E tai tokouke a tino e iloa ne latou a tino i ata i te itulau e 12 mo te 13.

^ pala. 6 Ne taku muamua ki te Motu o Lakemba, kae e tu i te feitu ki saegala o Fenua o Lau, i Fiti.

^ pala. 10 Ne ‵fuli ne te misionale ko John Hunt a te lasiga o te Fijian New Testament, telā ne ‵lomi i te 1847. E gali ‵ki te ‵fuliga me ne fakaaoga i ei a te igoa o te Atua ko “Jiova,” i te Maleko 12:36, Luka 20:42, mo te Galuega 2:34.

^ pala. 16 Ke onoono ki te mataupu fakaopoopo “Te 1914—Se Tausaga Tāua ‵Ki i Valoaga a te Tusi Tapu” i te tusi ko te Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova kae ko mafai foki o maua i te itaneti i te www.jw.org.