Kafai e lagona ne koe a pati konei, “Ko pili mai te gataga!” se a te mea e mafaufau koe ki ei? E mata, e mafaufau koe ki se tino talai telā ko tō silia tena loto finafinau, mo ana mata ko faka‵pula aka eiloa mo ana tāga, fakatasi mo te Tusi Tapu i tena lima? Io me e fakaataata ne koe se toeaina mo tena talafa i se ‵kōna i te auala, e pei ki se gatu ‵loa mo te fusi i tena taugasulu, kae taofi ne ia se fakailoga telā e maua atu i ei se fekau e uiga ki te gataga o te lalolagi? Mafaufau ki vaegā ata konā e mafai o fai ei a tino ke manava‵se, kae e fakalotolotolua io me e ‵kata fakatauemu atu ki ei a nisi tino.

E fai mai te Tusi Tapu: “Ko oko mai ei te gataga.” (Mataio 24:14) E taku foki te taimi tenā ki “te aso lasi o te Atua” mo “Amaketo.” (Fakaasiga 16:14, 16) E tonu, e lasi ‵ki eiloa te ‵numi o lotu i te mataupu tenei, kae e uke foki a manatu fai fakaatea kae fakafanoa‵noa e uiga ki ei. Kae tiga eiloa te feitu tenā, e manino ‵lei a te fakamatalaga i te Tusi Tapu e uiga ki te gataga—telā e fakaasi mai i ei a manatu ‵tonu mo manatu sē ‵tonu. E fesoasoani mai foki a te Muna a te Atua ke maina faka‵lei tatou me e mata, ko pili mai eiloa te gataga. E sili atu i mea katoa, e akoako mai i ei a te auala ke ‵sao atu ei tatou! Muamua la, ke na onoono aka tatou ki nisi manatu sē ‵tonu  kae fakamautinoa aka ei a te uiga tonu. Se a te uiga o “te gataga” e ‵tusa mo te Tusi Tapu?

MANATU SĒ ‵TONU E UIGA KI TE GATAGA

  1. A TE GATAGA E SĒ SE FAKAMASEIGA LASI TELĀ E ‵SUNU EI TE LALOLAGI.

    E fai mai te Tusi Tapu: “Ne fakatu ne [te Atua] te lalolagi ke mautakitaki i luga i ona fakavae, ko te mea ke se toe gasuesue.” (Salamo 104:5) E fakamaoni mai ki a tatou ne te tusi siki tenā mo nisi tusi aka foki me ka se fakaseai atu ne te Atua a te lalolagi io me e talia ne ia ke fakamasei katoatoa atu!—Failauga 1:4; Isaia 45:18.

  2. A TE GATAGA E SĒ SE MEA TELĀ E SEKI FAKATOKA FAKA‵LEI TE TAIMI E OKO MAI EI.

    E fakaasi mai i te Tusi Tapu me ko oti ne fakatoka te taimi e oko mai ei te gataga—ko oti ne fakatoka ne te Atua a te taimi mautinoa. E fai‵tau tatou e uiga ki ei, penei: “E uiga ki te aso tenā io me ko te itula tenā, e seai se tino e iloa ne ia, ke oko eiloa ki agelu o te lagi io me ko te Tama, kae na ko te Tamana fua. Ke matapula‵pula kae ke mataala faeloa, me e se iloa ne koutou te taimi telā ko oti ne fuafuagina.” (Maleko 13:32, 33) E manino ‵lei, me i te Atua (“te Tamana”) ko oti ne fakatoka ne ia “te taimi telā ko oti ne fuafuagina” ke kamata ei te gataga.

  3. E SE KAMATA TE GATAGA NE TINO IO ME KO MEA I TE VANIMONIMO.

    Ne a mea ka iku atu ki te gataga? E fai mai te Fakaasiga 19:11: “Kae ne matea atu ne au te lagi ko matala, kae, kiloke! se solofanua ‵kena. Kae ko te tino telā e sagasaga i ei e fakaigoa ki a Fakamaoni kae Tonu.” I te fuaiupu e 19: “Kae ne matea atu ne au me ne maopoopo fakatasi te manu fekai mo tupu o te lalolagi mo olotou kautau ke laga atu te lotou taua ki te tino telā e sagasaga i luga i te solofanua mo ana kautau.” (Fakaasiga 19:11-21) E tiga eiloa e fakaaoga i konei a pati fakatusa, e mafai eiloa o malamalama faka‵lei tatou i te mea tenei: Ka uga mai ne te Atua se kautau o agelu ke fakaseai atu ana fili.

Te fekau i te Tusi Tapu e uiga ki te gataga se tala ‵lei eiloa kae e sē se tala masei

 MANATU ‵TONU E UIGA KI TE GATAGA

  1. KO TE GATAGA O PULEGA SĒ ‵LEI A TĀGATA.

    E fakamatala mai te Tusi Tapu: “Ka fakatu ne te Atua o te lagi a te malo telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.” (Tanielu 2:44) E pelā mo te mea ne taku atu muamua i te manatu e 3, ka fakaseai atu a “tupu o te lalolagi mo olotou kautau,” kolā ka “maopoopo fakatasi . . . ke laga atu te lotou taua ki te tino telā e sagasaga i luga i te solofanua mo ana kautau.”—Fakaasiga 19:19.

  2. KO TE GATAGA O TAUA, FAKASAUAGA, MO FAIFAIGA SĒ FAKAMAONI.

    “E fakagata ne [te Atua] a taua i te lalolagi kātoa.” (Salamo 46:9) “A tino amio‵tonu kae fai mea ‵tonu ka ola i te fenua tenei. Ka ko te Atua ka tapale keatea ne ia a tāgata amio ma‵sei mai i te fenua, kae unu keatea a tino agasala, e pelā me ne lakau e unu keatea mai i te laukele.” (Faataoto 2:21, 22) “Kiloke! Ko faka‵fou ne au a mea katoa.”—Fakaasiga 21:4, 5.

  3. KO TE GATAGA O LOTU KOLĀ NE FAKALOGO‵MAE ATU KI TE ATUA MO TINO.

    “A pelofeta e fai‵pati faeloa ki te loi; a faitaulaga e fai olotou pulepulega . . . Se a la te mea ka fai ne latou manafai ko oko mai te ikuga?” (Ielemia 5:31) “E tokouke a tino ka fai mai ki a au i te aso tenā: ‘Te Aliki, te Aliki, e a, e seki ‵valo atu matou i tou igoa kae ‵tuli a temoni i tou igoa kae fai a galuega ‵mana i tou igoa?’ Kae ka fakailoa atu ne au ki a latou: ‘E se iloa lele ne au koutou! Olo kea‵tea mai i a au, koutou tino amio ma‵sei!’”—Mataio 7:21-23.

  4. KO TE GATAGA O TINO KOLĀ E TUMAU I TE ‵LAGO ATU KI TULAGA O TE LALOLAGI I ASO NEI.

    Ne fai mai a Iesu Keliso: “Tenei eiloa te fakavae o te fakamasinoga: me ko oti ne oko mai te mainaga ki te lalolagi, kae e fia‵fia atu a tino ki te pouliga i lō te mainaga, me e matagā olotou galuega.” (Ioane 3:19) Ne fakamatala mai ne te Tusi Tapu a te fakamaseiga ne tupu i te lalolagi kātoa i aso o te tagata fakamaoni ko Noa. “Ne fakamaseigina ei te lalolagi i te taimi ne lofia ei i te vai. Kae e auala i te muna foki eiloa tenā, a te lagi mo te lalolagi konei e iai nei e tausi eiloa penā mō te afi i te aso o te fakamasinoga kae ka fakaseai atu ei a tino sē amioatua.”—2 Petelu 3:5-7.

Masaua me i te “aso o te fakamasinoga” mo te ‘fakaseaiga’ telā ko pili mai, ne fakatusa ki te fakaseaiga o “te lalolagi” i aso o Noa. Se a te lalolagi ne fakaseai atu? E se ko te ‵tou paneta; kae ko “tino sē amioatua”—fili o te Atua—kolā ne “fakamaseigina.” I te “aso o te fakamasinoga” a te Atua telā ko pili mai, ka fakaseai atu foki a tino kolā e filifili ke fai latou mo fili o te Atua. Kae ka tumau a taugasoa o te Atua, e pelā eiloa mo Noa mo tena kāiga.—Mataio 24:37-42.

Mafaufau la ki te taulekaleka o te lalolagi tenei mai tua o te fakaseaiatuga o tino ma‵sei katoa! E manino ‵lei i ei, me i te fekau i te Tusi Tapu e uiga ki te gataga se tala ‵lei eiloa kae e sē se tala masei. Kae kāti koi mafaufau koe penei: ‘E mata, e taku mai i te Tusi Tapu me e oko mai mafea te gataga? E mata, ko pili mai? E mafai pefea o sao atu au i ei?