• TAUSAGA NE FANAU I EI: 1954

  • TENA FENUA: KANATA

  • TENA TALA FAKASOLOPITO: SE TINO AMIO FAITOGAFITI, KAE KEMUPOLO

TOKU OLAGA MUA:

Ne tupu aka au i se koga fakafanoanoa i te fa‵kai o Montreal. I te taimi ko ono ei oku tausaga, ne mate toku tamana, telā ne ‵toe mai fua toku mātua ke tausi atu ki tiute katoa i te kāiga. Au ko te toekimuli i se kāiga o tamaliki e toko valu.

I te taimi ne tupu aka ei au, ne aofia eiloa toku olaga i te fakaaogaga o vailakau tapu, kemupolo, fakasauaga, mo te kauga ki tino ofa tulafono. I te taimi ko sefulu ei oku tausaga, ne kamata o fakatau atu ne au a fafine talitāgata kae fakakaitalafu atu a tupe i auala kai‵soa. Ne pati loi sāle au kae ne fiafia malosi au o fakaloiloi a tino i so se auala faitogafiti e mafai ne au. Ne fai eiloa pelā me se vailakau tapu ki a au.

I te taimi ko 14 ei oku tausaga, ne gasolo aka eiloa ki luga toku poto i te fakaaogaga o auala faka‵se tino ke fakaloiloi aka ei a tino. E pelā mo te ‵togi ne au o itula, taulima, mama aulo e uke, kae fakamailoga ne au i ei e pelā me se 14-carat te malosi o te aulo mo te fakailoga o te tino ne faite ne ia, kae fakatau atu ne au i te auala mo koga faka‵tu motoka i tafa o sitoa ‵lasi. Ne ofo malosi au i te faigofie ke maua a tupe. I te taimi e tasi, ne maua ne au se $10,000 i te aso e tasi!

Mai tua o taku fakateaga mai i se akoga fesoasoani ki te fakafouga o te olaga kae ko 15 ei oku tausaga, ne seai se koga mo oku nofo. Ne moe au i auala, i malae ta‵fao, io me ko fale o nisi taugasoa kolā ne talia ne latou au.

Ona ko aku faifaiga faitogafiti, ne fakafesili sāle au ne pulisimani. Ona ko te mea ne seki ‵togi atu ne au a mea kaisoa, ne seki ‵pei lele atu eiloa au ki te falepuipui. Kae ne fakasala au ki te ‵togiatuga o aofaki ‵lasi o tupe mō te amio faitogafiti, te fakaloiloi, mo te ‵togiatuga o mea e aunoa mo se laisene. E aunoa mo te mataku ki se tino, ne ‵tae foki ne au a tupe kolā ne fakakaitalafu i se auala kaisoa. Ne fakamataku ‵ki te mea tenā, kae i nisi taimi, ne tauave ne au se fana. I nisi taimi, ne ga‵lue fakatasi au mo fakapotopotoga solitulafono.

TE AUALA NE ‵FULI EI TOKU OLAGA NE TE TUSI TAPU:

Ko 17 oku tausaga i te taimi muamua ne lavea ei ne au a te Tusi Tapu. Ne ‵nofo fakatasi au mo taku famau i te taimi ne kamata ei o sukesuke a ia ki te Tusi Tapu mo Molimau a Ieova. Kae ne ‵teke atu au ki amioga  ‵ma i te Tusi Tapu, telā ne tiakina ei ne au tou fafine kae fanatu o ‵nofo mo te suā fafine, telā ne fia‵fai māua.

Ne kamata eiloa o ‵fuli toku olaga i te taimi ne kamata ei o sukesuke fakatasi a te lua o aku famau mo Molimau! Ne fai ne tou fafine a ‵fuliga i tena olaga, kae ne ofo masei au me ne kamata o momea aka tena agamalu mo te fa‵ki. Ne talia ne au se ‵kamiga ke fanatu ki se fakatasiga i te Fale Tapuaki o Molimau a Ieova. Ne fakatalofa mai ki a au a tino mata ‵ma kae atafai. Ko se faka‵tau eiloa te ‵kese mo te lalolagi ne iloa ne au! Ne seki maua eiloa ne au se lagonaga me e manakogina au ne toku kāiga; ne seki fakaasi mai eiloa ne latou a te alofa atafai mo te fakapelepele i toku olaga kātoa e pelā me se tamaliki. A te alofa ne lagona ne au i va o Molimau a Ieova ko te mea eiloa telā ne manako malosi au ki ei. I te taimi ne fesili mai a Molimau ke suke‵suke matou ki te Tusi Tapu, ne talia eiloa ne au mo te fiafia.

Kāti ne fakasao eiloa toku ola ne mea kolā ne tauloto ne au mai te Tusi Tapu. Ko oti ne mafaufau au ke olo matou mo oku taugasoa e tokolua o kai‵soa ko te mea ke ‵togi omotou kaitalafu i te kemupolo, telā e silia atu mo te $50,000. Kae ko oko eiloa i toku fiafia me ne seki kau atu au ki ei! Ne olo atu eiloa oku taugasoa o kai‵soa. E tokotasi ne puke fakapagota, kae ne mate atu a te suā tino.

I te taimi ne gasolo ei ki mua taku sukesukega ki te Tusi Tapu, ne kamata o lavea ne au a te uke o ‵fuliga e ‵tau o fai ne au. E pelā mo pati i te Tusi Tapu ne tauloto ne au i te 1 Kolinito 6:10: “Tino kai‵soa, io me ko tino kaima‵nako, io me ko tino ko‵nā, io me ko tino fatu‵fatu, io me ko tino ‵faomea, e se mafai o maua ne latou a te Malo o te Atua.” I te taimi ne faitau ei au ki te fuaiupu tenā, ne tagi eiloa au ona ko te masei o toku tulaga. Ne iloa ne au me e ‵tau o ‵fuli katoatoa toku olaga. (Loma 12:2) Ne uiga fakasaua kae mata kaitaua, kae ne fakavae eiloa toku olaga kātoa ki te loi.

Kae ne tauloto foki ne au mai taku sukesukega ki te Tusi Tapu me i a Ieova e alofa fakamagalo kae loto fakamagalo. (Isaia 1:18) Ne ‵talo malosi au, kae fakamolemole ki a Ieova ke fesoasoani mai ke fakasaoloto aka au mai i toku olaga mua. Fakatasi mo tena fesoasoani, ne mafai ei ne au o ‵fuli oku uiga. Kae ne oko atu ei ki te ‵toe faifaiga tāua, i te taimi ne fakaipoipo faka‵lei ei māua mo taku famau i te tulafono.

Koi ola eiloa au i te aso nei ona ko te mea ne fakagalue aka ne au a akoakoga fakavae i te Tusi Tapu

Ko 24 oku tausaga i te taimi ne avaga ei au kae ko tokotolu aku tama‵liki. Nei la, ko ‵tau o ‵sala atu au ki se galuega ‵lei. Kae ne akoga malie fua au kae e seai ne fakamaoniga e uiga ki ei. Ne ‵toe ‵talo malosi atu foki au ki a Ieova. Kae ne ‵sala atu au ki se galuega. Ne fai atu au ki tino kolā e mafai o fakagalue ne latou a au me e manako au o ‵fuli toku olaga kae fai se galuega fakamaoni. I nisi taimi, ne fakamatala atu ne au me ko sukesuke nei au ki te Tusi Tapu kae e momea aka faeloa toku manakoga ke fai mo fai se tino ‵lei o te fenua. Ne ita fitifiti a nisi tino o latou ke fakagalue ne latou a au. Fakamuli loa, mai tua o te fakaasiatuga o toku olaga masei mua ki te suā tino telā ne fakafesilisili ne ia au, ne fai mai a ia: “E se iloa ne au me se a te pogai, kae e isi se mea e fai mai me e ‵tau o fakagalue ne au a koe.” Ne talitonu au me tenei eiloa te tali ki aku ‵talo. E seki leva, kae ne papatiso māua tokolua mo taku avaga e pelā me ne Molimau a Ieova.

TE AUALA NE MAUA EI NE AU A MEA AOGA:

Koi ola eiloa au i te aso nei ona ko te mea ne fakagalue aka ne au a akoakoga fakavae i te Tusi Tapu kae ola i se olaga faka-Kelisiano. Ko oko eiloa i te gali o toku kāiga. Ona ko te loto talitonu me ko oti ne fakamagalo au ne Ieova, ne maua eiloa ne au se loto lagona ‵ma.

I te 14 tausaga ko ‵teka, ne tavini atu au i te taviniga tumau, kae fesoasoani atu ki nisi tino ke tauloto ki mea e akoako mai ne te Tusi Tapu, kae fakamuli nei, ne kau mai foki taku avaga ki a au i te taviniga tumau. I te 30 tausaga ko ‵teka atu, ne maua eiloa ne au a te fiafia i te fesoasoani atu ki tino e toko 22 kolā e ga‵lue fakatasi matou ke kamata o tapuaki atu ki a Ieova. Koi fanatu eiloa au ki sitoa ‵lasi—kae e se fanatu o fakaloiloi a tino e pelā mo te mea ne fai sāle ne au. Nei la, e fanatu au ki konā o fakaasi atu ki nisi tino a mea e talitonu au ki ei. E manako au o tuku atu se mea ki a latou: te fakamoemoega ke ola i te lalolagi fou i aso mai mua telā ka seai ne amioga faitogafiti i ei.—Salamo 37:10, 11.