Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Apelila 2015

 E ‵FULI NE TE TUSI TAPU A OLAGA O TINO

Ne ‵Fuli Toku Olaga ne Fesili e Tolu

Ne ‵Fuli Toku Olaga ne Fesili e Tolu
  • TAUSAGA NE FANAU I EI: 1949

  • TENA FENUA: IUNAITE SITETE

  • TENA TALA FAKASOLOPITO: NE FIA ILOA NE IA TE AOGA O TE OLAGA

TOKU OLAGA MUA:

Ne ola au i Ancram, se tamā fa‵kai i te feitu ki mātū o Niu Ioki, Amelika. Ne malaku eiloa a lafu manu i te fa‵kai tenei. A te ‵tonuga loa, ne uke atu a pulumakau i tino.

Ne ‵kau atu te motou kāiga ki te lotu eiloa e tasi i te fa‵kai. I taeao o Aso Sa, ne ‵fulu fakagaligali ne toku tupuna tagata oku taka, ne pei au ki ei kae fanatu ki te akoga Aso Sa mo taku tamā Tusi Tapu ‵kena telā ne tuku mai ne toku tupuna fafine. Ne akoakogina matou mo toku taina mo toku tuagane ke iloa o ga‵lue malosi, āva kae fesoasoani atu ki motou tuakoi, kae loto fakafetai ki motou fakamanuiaga.

I te taimi ne tupu aka ei au, ne fanatu au keatea kae ne fai mo fai se faiakoga. Ne uke ‵ki eiloa aku fesili e uiga ki te Atua mo te olaga. Ne ‵poto eiloa a nisi o aku tamaliki a‵koga. Ne seki ‵poto a nisi tamaliki kae ne lasi ‵ki te lotou taumafai. Ne seki katoatoa ‵lei a nisi tamaliki, kae ne ma‵losi ‵lei a nisi tamaliki. Ne mafaufau au me e se ‵lei te tulaga tenā. I nisi taimi, e fai mai sāle ne nisi mātua o aku tamaliki kolā e se na lō ko ‵lei a pati penei, “Tenei te auala ne manako te Atua ke fai penei taku tamaliki.” Ne mafaufau au me se a te pogai ne talia ei ne te Atua a nisi pepe ke fa‵nau mai kae se katoatoa. Me e seai eiloa ne mea ‵se kai fai ne se pepe.

Ne mafaufau foki au, ‘Se a te mea tāua e ‵tau o fai ne au i toku olaga?’ Ne mafaufau au me e seai eiloa se aoga o toku olaga. Ne tupu aka au i se kāiga gali, ne fanatu au ki akoga ‵lei, kae ko galue nei au i se galuega telā e fiafia malosi au ki ei. Kae e foliga mai me e seai se aoga o toku olaga mai tua i ei. A te ‵toe mea ‵lei e mafai o mafaufau ki ei, ke avaga, ke maua se fale gali mo nai tamaliki, tumau i te galue ke oko ki te taimi ko litaea ei au, kae fakamuli loa ko fanatu o nofo i se fale tausi tino ma‵tua. Ne mafaufau au me e mata, ko gata fua i konā te olaga.

TE AUALA NE ‵FULI EI TOKU OLAGA NE TE TUSI TAPU:

I te tau ‵vela e tasi, ne olo atu matou mo nisi faiakoga ki Eulopa. Ne olo atu matou ki Westminster Abbey, Notre-Dame de Paris, mo te Vatikana, e pelā foki ki tamā lotu e uke. I so se koga ne fanatu au ki ei, ne ‵sili atu eiloa ne au aku fesili. Mai tua o te ‵fokiatuga ki te fale i Sloatsburg, i Niu Ioki, ne āsi atu au ki lotu e uke. Kae e seai eiloa se tino ne tuku mai ne ia ki a au a tali fakama‵lie loto.

I te aso e tasi, ne vau se tamaliki akoga ko 12 ana tausaga kae  fesili mai ne ia ki a au a fesili e tolu. Muamua la, ne fesili mai a ia me e iloa ne au i a ia se tokotasi o Molimau a Ieova. Ne fai atu au ao. A te lua, ne fesili mai tou fafine me e fia iloa ne au a mea e uiga ki Molimau a Ieova. Ne toe fai atu au ao. A ko te tolu, ne fesili mai tou fafine me ko au e nofo i fea. I te taimi ne fai atu ne au te koga e nofo au i ei, ne iloa aka ei ne māua me e se ‵mao a fale o matou. E se iloa ei ne au me i fesili e tolu konā mai i se tamā tamaliki fafine, ka ‵fuli ei toku olaga ki te se-gata-mai.

E seki leva mai tua ifo, ne tele mai tou fafine i tena pasika-ta-ki-vae ki toku fale kae ne kamata ne ia taku akoga faka-te-Tusi Tapu. Ne fesili atu ei ne au a fesili kolā ne ‵sili sāle ne au ki takitaki lotu e tokouke. E se pelā mo latou, ne fakaasi mai ne tou fafine a tali manino ‵lei kae fakamalie loto mai i taku Tusi Tapu—tali kolā e seki iloa aka eiloa ne au muamua!

Ne ‵fonu eiloa au i te fiafia mo te lotomalie ki mea ne tauloto ne au mai te Tusi Tapu. Ne otia toku loto i te taimi ne faitau ei au ki te 1 Ioane 5:19, telā e fai mai: “Te lalolagi kātoa ko nofo mai lalo i te pule a te tino masei.” Ne maua ne au se fakatapūga me e se ko te Atua kae ko Satani telā e pogai mai i ei a mea fakafanoa‵noa katoa kolā e lavea atu i ‵tou tafa—kae ka faka‵lei aka ne te Atua a te tulaga tenā. (Fakaasiga 21:3, 4) Ne iloa ne au me e ‵tonu eiloa a fakamatalaga i te Tusi Tapu māfai e fakamatala faka‵lei mai. E tiga eiloa ko 12 fua tausaga o te Molimau telā ne suke‵suke fakatasi māua, ne fakaiku aka ei ne au me i te munatonu ko te munatonu eiloa faitalia me ko oi e faipati mai e uiga ki ei.

Ne manako foki eiloa au ke lavea atu me e fakagalue aka ne Molimau a mea e talai atu ne latou. E pelā mo te faka‵mafa mai ne te tamaliki fafine tenei me e fakaasi atu ne Kelisiano ‵tonu a vaegā uiga pelā mo te kufaki mo te atafai. (Kalatia 5:22, 23) Ne fakaiku aka ne au ke tofotofo aka tou fafine me e fakaasi mai eiloa ne ia a uiga konā. I te aso e tasi, ne fakaiku aka ne au ke fakatuai au ki taku akoga. Ne mafaufau au: ‘E mata, ka faka‵tali mai eiloa tou fafine ki a au? Kae kafai e penā loa, e mata, ka kaitaua mai tou fafine me i a au ko talimuli?’ I te taimi ne piko atu ei taku motoka ki te koga fakatu motoka, ne lavea ne au tou fafine e faka‵tali mai i mua o toku fale. Ne tele mai tou fafine ki te motoka kae fai mai: “Au ko tai fano aka loa ki te fale o fai ki toku matua me e ‵tau o telefoni atu māua ki te fa‵kaimasaki mo pulisimani, ke onoono aka me ko koe e ‵lei loa, me e se tī talimuli sāle mai koe ki tau akoga. Ne manavase au ki a koe!”

I te suā taimi, ne ‵sili atu ne au se fesili telā ne mafaufau au me ko tō faigata ki se tamaliki ko 12 ana tausaga ke tali mai. Ne fia iloa ne au me ka faite aka fua ne ia se tali. I te taimi ne fesili atu ei au, ne kilo ‵tonu mai tou fafine ki a au mo te mafaufau ‵mafa ki ei kae fai mai: “A te mea tenā se fesili faigata. Ka tusi ne au ki lalo kae ka fesili atu ki oku mātua.” Se mea tonu eiloa me i te suā taimi ne vau ei tou fafine ki te akoga, ne aumai ne ia se lōmiga o The Watchtower telā e maua i ei a te tali ki taku fesili. Tenei eiloa te mea ne tosina atu ei au ki te kau Molimau—ne tuku mai eiloa i olotou tusi a tali kolā e fakavae ki te Tusi Tapu ki aku fesili katoa. Ne tumau au i te sukesuke mo te tamaliki fafine tenā, kae ne papatiso fakamuli eiloa au e pelā me se Molimau a Ieova. *

TE AUALA NE MAUA EI NE AU A MEA AOGA:

I te taimi ne maua fakamuli ei ne au a tali fakamalie loto ki aku fesili, ne manako au ke fakaasi atu ki tino katoa. (Mataio 12:35) Muamua la, ne ‵teke mai toku kāiga ki oku talitonuga ‵fou. E seki leva, ne kamata o feoloolo te lotou ‵teke mai. I te taimi ko pili ei o galo toku mātua, ne kamata o sukesuke tou fafine ki te Tusi Tapu. E tiga eiloa ne seki ola leva tou fafine ke papatiso, e talitonu au me ko oti ne fakaiku aka ne ia ke tavini atu ki a Ieova.

I te 1978, ne avaga au ki se Molimau e igoa ki a Elias Kazan. I te 1981, ne ‵kami māua mo Elias ke aofia i te kāiga Peteli i te Iunaite Sitete. * Se mea fakafanoanoa, mai tua fua o tausaga e fa ne tavini atu ei māua i konā, ne mate atu a Elias. E tiga eiloa ne nofo taka au, ne tumau au i taku galuega i te Peteli, telā ne tuku mai i ei se mea ke saga tonu atu au ki ei kae fakamafanafana malosi mai foki.

I te 2006, ne avaga māua mo Richard Eldred, se tino e tokotasi i te kāiga Peteli. Ne tumau eiloa māua mo Richard i te tauliaga ke tavini atu i te Peteli. A te iloaga o te munatonu e uiga ki te Atua, e lagona tonu ne au me ko oti eiloa ne maua ne au, e se gata fua i tali kolā ne ‵sala au ki ei kae e penā foki loa mo te aoga tonu o toku olaga—kae ne kamata eiloa a mea katoa mai i fesili kolā ne taku mai ne se tamaliki fafine.

^ pala. 16 Ne fai mai me i a latou katoa, te tamaliki fafine mo ana taina mo tuagane ma‵tua, ne fesoasoani atu ki olotou faiakoga ke suke‵suke ki te Tusi Tapu kae kamata o tapuaki atu ki a Ieova.

^ pala. 18 A te “Peteli” e fakauiga ki te “Fale o te Atua,” ko te tugapati telā e fakaaoga ne Molimau a Ieova ke fakaigoa ki ei olotou ofisa lagolago i te lalolagi kātoa. (Kenese 28:17, 19; fakamatalaga fakaopoopo) A sui o te kāiga Peteli e fai ne latou a vaegā galuega kese‵kese kolā e ‵lago atu ei ki te galuega a Molimau a Ieova, ko te akoako atu.