Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Mati 2015

 TALA TONU

Mata o Jairo—Te Auala ne Tavini Atu ei a ia ki te Atua

Mata o Jairo—Te Auala ne Tavini Atu ei a ia ki te Atua

E mafai o fakaataata i tou mafaufau a te faigata ke pule faka‵lei atu koe ki tou foitino kātoa kae na ko ou mata? Tenā eiloa te tulaga o toku taina ko Jairo. Kae ne maua eiloa ne ia se olaga aoga. A koi tuai o fakamatala atu ne au te pogai ne maua ei ne ia se olaga aoga, ke fai atu ne au tena tala.

Ne fanau mai a Jairo mo se vaega o te masaki ko te cerebral palsy, telā e taku ki te spastic quadriplegia. * Ne iku atu ei ki te sē mafai ne ia o pule faka‵lei atu ki tena foitino. Ne seki mafai o aveave ne tena faiai a fekau manino ‵lei ki ana taganoa, telā ana lima mo ana vae se mafai o gasuesue faka‵lei. I nisi taimi, e mafai foki eiloa o logo‵mae a Jairo māfai e gasue fakavave sāle tou tagata. E mafai foki o logo‵mae a nisi tino kolā e ‵pili atu māfai e se matapula‵pula latou. Se mea fakafanoanoa, me ne ‵tau o ‵sai faeloa ana lima mo ana vae ki tena nofoga fakatekateka, ko te mea ke puipui ei a ia mai vaegā fakalavelave penā.

NE TIGAINA I TENA TUPUAKAGA

Ne logo‵mae malosi faeloa a Jairo i tena tupuakaga. I te taimi ko tolu ei ana masina, ne kamata o fakatu tena koga kae galo atu foki tena mafaufau. Ne tupu faeloa te mea tenei, telā ne ‵sai ‵kini ne Mami tou tagata kae avatu fakavave ki te fa‵kaimasaki, kae mafaufau me k o mate a ia.

Ona ko te saisai sāle o tou tagata, e seki leva kae kamata o ‵piko a ivi o Jairo. I te taimi ko 16 ei ana tausaga, ne seke i ei tena ivi i ana tega, kae e manakogina ke fai se ‵tipiga lasi eiloa ki ana kauaga, tega, mo nisi ivi i te kogākoga tenā. Koi masaua eiloa ne au a te ‵tagi sāle o Jairo i te logo‵mae i po katoa i te otiga o tena ‵tipiga.

Ona ko te sē mafai ne Jairo o fai se mea, e fakalagolago katoatoa eiloa a ia ki nisi tino ke tausi atu ki a ia i aso katoa, e pelā mo te fagaiga, fakapei ana gatu, mo te fakatokaga ke moe. Ne fai sāle loa ne Mami mo Teti a galuega konei. E tiga eiloa ne manakogina faeloa ne Jairo a te fesoasoani, ne fakamasaua atu faeloa ne ma mātua ki a ia me e se fakalagolago fua tena ola ki tino, kae e penā foki loa ki te Atua.

NE ‵TALA MAI SE AUALA O FESOKOTAKIGA

A ma mātua ne Molimau a Ieova, kae ne faitau atu faeloa ne lāua a tala i te Tusi Tapu ki Jairo talu mai te taimi koi pepe ei tou tagata. Ne iloa faeloa ne lāua me ka sili atu te aoga o te olaga māfai e maua ne te tino se fesokotakiga ‵lei mo te Atua. Ne tumau a Jairo i se foitino sē malosi telā e saisai faeloa, kae ne maua eiloa ne ia se fakamoemoega gali kae ‵mautakitaki mō aso mai mua. Kae ne mafau‵fau faeloa lāua me e mata, ne maina faka‵lei a Jairo i fakamatalaga i te Tusi Tapu io me ikai.

I te aso e tasi, i te taimi koi foliki ei a Jairo, ne fesili atu a Teti ki tou tagata, “Jairo, fakamolemole, e mafai ne koe o faipati mai ki a au?” Ne toe fai atu a ia, “Kafai e alofa tonu mai koe ki a au, ka faipati mai eiloa koe!” I te taimi koi fakamolemole atu ei a Teti ke fai atu ne Jairo se pati fua e tasi, ne lavea atu eiloa a loimata i mata o tou tagata. E tiga eiloa ne taumafai malosi tou tagata ke fakaasi atu  ana lagonaga ki pati, ne mafai fua ne ia o gūgū e aunoa mo te ma‵faki o ana pati. Ne ma‵sei a lagonaga o te ma Tamana me ne fai ne ia a Jairo ke tagi. Kae ne fakaasi mai eiloa ne te mea tenā me ne malamalama a Jairo i mea ne fai atu ne te ma Tamana. A te fakalavelave me e se mafai ne ia o faipati.

E seki leva, kae ne iloa ne ma mātua me i nisi taimi, ne fakagasue‵sue fakavave ne Jairo ana mata i ana taumafaiga ke fakaasi mai ana mafaufauga mo lagonaga. Ko oko eiloa i te fakafi‵ta ki a Jairo ke lavea atu me e se faigofie faeloa ke malamalama matou i a ia. Kae i te taimi ne tauloto ei oku mātua ki fakailoga kese‵kese i ana mata kae tuku atu a te mea e manako a ia ki ei, e lavea atu eiloa a te mata fiafia o tou tagata. Ko te auala ke fakaasi atu tena fakafetai.

Ne fesoasoani mai se tino poto i mea tau faipati ke momea aka te ‵lei o fesokotakiga, e ‵tau o sisi aka ne matou omotou lima e lua ki luga māfai e fai se fesili telā e manakogina a te ao io me ko te ikai. E fakauiga te lima fakaatamai ki te ao, kae ko te fakamaui ki te ikai. Tela la, ne mafai ne tou tagata o fakaasi mai tena manakoga mai te kilo ‵tonu atu ana mata ki te lima tonu.

TE ‵TOE MEA TĀUA I TE OLAGA O JAIRO

E fakatolu taimi i te tausaga e fai sāle ne Molimau a Ieova a olotou fono o te fenua mo fono i te atufenua, telā e fai atu i ei a lāuga faka-te-Tusi Tapu ki se kautaina lasi. Ne fiafia faeloa a Jairo i taimi e fai ei te lāuga telā e fakasino atu ki tino ka papatiso. I te aso e tasi, i te taimi ko 16 ei ana tausaga, ne fesili atu te ma Tamana ki ei, “Jairo, koe e fia papatiso?” I te taimi eiloa tenā, ne kilo atu a ia mo te mautinoa ki te lima fakaatamai o Teti, ne fakaasi atu ei tena manakoga ki te tulaga tenā. Ne toe fai atu ei a Teti, “Kai tauto atu koe ki te Atua i se ‵talo ke tavini atu koe ki a ia ki te se-gata-mai?” Ne toe kilo ‵tonu atu foki a tou tagata ki te lima fakaatamai o Teti. Ne fakaasi faka‵lei mai i ei, me ko oti ne tuku atu ne Jairo tena olaga ki a Ieova.

Mai tua o nai sau‵talaga faka-te-Tusi Tapu, ne lavea faka‵lei atu ei me ne malamalama a Jairo i te uiga o te papatisoga faka-Kelisiano. Tela la, i te 2004, ne tali atu ei ne ia te ‵toe fesili tāua ne ‵sili atu ki a ia, “Kai tuku atu tou ola ki te Atua ke fai tena loto?” Ne tali ne Jairo te fesili tenei mai te kilo aka o ana mata ki luga. Ko te auala fou e fakaaoga ne tou tagata ke tali atu ao. Tela la, i te taimi ko 17 ei ana tausaga, ne papatiso tou tagata e pelā me se tokotasi o Molimau a Ieova.

NE SAGA TONU ATU KI MEA A TE ATUA

I te 2011, ne maua ei se auala fou o fesokotakiga mō Jairo—se komupiuta telā e fakagalue aka ne mata. E mafai o iloa ne te masini tenei a te gasuesuega o ana mata ko te mea ke ‵sae aka a vaegā fakailoga kese‵kese i luga i te komupiuta. A te ‵kemo atu io me ko te ‵pula ‵toka atu ki se fakailoga, e fai eiloa e pelā mo te tokotoko ne koe o mea ke ‵sae aka i te komupiuta. Ne aofia i te polokalame tenā a ata kolā e fakaata mai i ei a pati kae ne fesoasoani atu ki a Jairo ki te faiga o ana fesokotakiga. Kafai e ‵kemo  atu a ia ki se tasi o fakailoga konā, ko ‵fuli eiloa ei ne te masini tenā a tenā fekau ki se leo e faipati mai i te masini.

I te taimi ne gasolo aka ei o lasi te malamalama o Jairo i te Tusi Tapu, ne gasolo aka foki tena manakoga ke fesoasoani atu ki tino i te feitu faka-te-agaga. I taimi e fai ei te motou sukesukega faka-te-kāiga ki te Tusi Tapu, e masani eiloa o kilokilo mai a ia ki au mo tena komupiuta. Tenei te auala e fakamasaua mai ei a ia ki a au me e ‵tau o tusi ne au ana tali ki lalo, ko te mea ke fai ana tali i tōfiga kolā e fai ei a fesili mo tali i fakatasiga a te motou fakapotopotoga Kelisiano.

I te fakatasiga, e onoono atu eiloa mo te kufaki ki te komupiuta ke ‵toko i te ata telā e fetaui ‵lei, kae ne mafai ei o lagona tena leo ne tino katoa mai tena masini. E fakamisikata malosi atu eiloa tou tagata i taimi katoa e fakamalosi atu ei a ia ki tino i te fakapotopotoga i te auala tenei. A Alex, se taugasoa talavou o Jairo, ne fai mai: “E ofo faeloa au māfai e lagona ne au a tali a Jairo e uiga ki se mataupu faka-te-Tusi Tapu.”

E fakaaoga ne Jairo se polokalame i tena komupiuta telā e fakagasuesue ne ana mata mo se leo e vau mai i ei ke fai ana tali i fakatasiga kae fakaasi atu foki ana talitonuga ki nisi tino

Ne fakaaoga foki ne Jairo ana mata ke fai atu ki nisi tino e uiga ki ana talitonuga. E tasi te auala e fai ei ne ia ko te ‵toko atu ki se ata telā e fakaasi mai i ei se fatoaga, telā e ‵nofo fakatasi ei a manu mo tino mai matakāiga kese‵kese i se tulaga filemu. Kafai e fakaola ne ia te mea tenei, e folafola atu eiloa ne tena leo i te komupiuta penei, “A te fakamoemoega i te Tusi Tapu me ka fai te lalolagi mo fai se palataiso telā ka se toe ai ne masaki mo te mate, Fakaasiga 21:4.” Kafai e fiafia a te tino fakalogologo, e toe ‵toko ne ia a te suā fakailoga i te komupiuta ke fai atu, “E fiafia koe ke suke‵suke fakatasi tāua ki te Tusi Tapu?” Se mea fakaofoofogia me ne talia ne te ma tupuna tagata a te ‵kamiga tenei. Se mea fakafiafia ke lavea atu a Jairo, e akoako malielie atu ne ia a te ma Tupuna tagata ki te Tusi Tapu, fakatasi mo te fesoasoani o se Molimau! Se mea fakafiafia, me ne papatiso a te ma Tupuna i te fono i te atufenua i Madrid i a Aokuso 2014.

Ne lavea eiloa ne faiakoga i te akoga a te loto finafinau o Jairo mō tena tapuakiga ki te Atua. A Rosario, se tokotasi o ana tino poto i mea tau faipati, ne fai mai penei i se taimi e tasi: “Kafai e mafaufau au ke kau atu ki se lotu, ka fai eiloa au mo fai se Molimau a Ieova. Ko oti eiloa ne lavea ne au a te auala ne fai ei ne te fakatuanaki o Jairo ke aoga tonu tena olaga, faitalia te faigata o tena tulaga.”

Ne lavea atu faeloa mata fiafia o Jairo māfai e faitau atu ne au ki a ia a te folafolaga i te Tusi Tapu: “A tino vae ma‵sei ka eva ki luga kae ‵saka, ka ko tino gūgū ka ka‵laga mo te fia‵fia.” (Isaia 35:6) E tiga eiloa e loto vāivāi a ia i nisi taimi, kae e masani eiloa fiafia tou tagata. Ne mafai fua o fai penei me ne aofia eiloa ne ia i tena olaga a te Atua mo ana taugasoa Kelisiano. Ne fai eiloa ana foliga fia‵fia mo tena fakatuanaki malosi mo fai se fakamaoniga, me e fai ne te tavini atu ki a Ieova ke aoga te olaga faitalia te faigata.

^ pala. 5 A te cerebral palsy (CP) se tugapati ne fakaaoga ke fakamatala mai a te pakia o te faiai telā e pokotia i ei a gasuesuega a se tino. E mafai o iku atu ki te fakatu o se koga, te sē ‵lei o te kai mo te faipati. A te spastic quadriplegia ko te ‵toe vaega masei o te CP; e mafai o iku atu ki te sē gasue‵sue katoa o lima, vae mo te ua.