Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 E Fesili Mai ‵Tou Tino Fai‵tau . . .

E Mata, a te Eseta se Fakamanatuga Faka-Kelisiano?

E Mata, a te Eseta se Fakamanatuga Faka-Kelisiano?

E fakamatala mai i te Encyclopædia Britannica a te Eseta e pelā me se “fakamanatuga Kelisiano telā e fakamanatu i ei a te Toetuga o Iesu Keliso.” Kae e mata, se fakamanatuga faka-Kelisiano eiloa?

Ke fakamaoni aka te ‵tonu o se mea, e tāua ‵ki ke iloilo faka‵lei aka ne tatou a fakamatalaga liki‵liki e uiga ki ei. E penā foki loa, ke iloa aka me ko te Eseta se fakamanatuga faka-Kelisiano io me ikai, e manakogina ke iloilo faka‵lei aka ne tatou a fakamatalaga katoa e uiga ki te Eseta.

A te mea muamua, ne fai atu a Iesu ki ana soko ke fakamanatu tena mate, kae e se ko tena toe‵tuga. Ne taku ne te apositolo ko Paulo te fakamanatuga tenei ki te “‵kaiga a te Aliki i te afiafi.”—1 Kolinito 11:20; Luka 22:19, 20.

E se gata i ei, a te ukega o faifaiga kolā e fai i te Eseta, e “mu‵tana fua a mea e uiga ki te toetuga o Iesu,” ko pati i te Britannica, “kae e aofia malosi i ei a faifaiga fapaupau.” E pelā mo fakailoga lauiloa o te Eseta, ko te fuamoa mo te lapiti, e fai mai ei penei a The Encyclopedia of Religion: “A te fuamoa e fakaata mai ei a te ola fou telā e vau mai loto i se fuamoa telā ko mafa.” E se gata i ei: “Ne lauiloa a te lapiti e pelā me se manu fanafanau, kae e fakaata mai foki i ei te ‵tau e ‵somo aka ei a lau o lakau.”

Ne fakamatala mai ne Philippe Walter, telā se polofesa o tusi mua, e uiga ki te auala ne fai ei a vaegā faifaiga penei e pelā me ne vaega o te fakamanatuga o te Eseta. Ne tusi mai tou tagata e uiga ki te “faimālōga o faifaiga fapaupau ke fai pelā me ne fakamanatuga faka-Kelisiano,” ne fai ei ke fakamanatu fakatasi a te toetuga o Iesu, mo te fakamanatuga fapaupau telā ko te “otiatuga o te ‵tau ‵moko mo te kamataga o te ‵tau e ‵somo aka ei a lau o lakau.” Ne toe fai mai a Walter me i faifaiga penā ne tuku mai ei se avanoaga ke fai fakatasi a “fakamanatuga faka-Kelisiano” mo faifaiga fapaupau, telā ne fai ei mo fai se ‵fuliga lasi ‵ki.

Ne seki tupu a te faimālōga tenei ki “faifaiga faka-Kelisiano” i te taimi koi ola mai ei a te kau apositolo, me e “taofiofi” eiloa latou mai faifaiga fapaupau penā. (2 Tesalonia 2:7) Ne fakamasaua atu ne te apositolo ko Paulo me kafai ko “fano” a ia kea‵tea, ka ulu mai ei a “tāgata kolā ka ‵fuli faka‵kotua ne latou a mea ke ‵futi atu ei a soko ki a latou.” (Galuega 20:29, 30) Kae i te fakaotiga o te senitenali muamua, ne tusi mai ne te apositolo ko Ioane me e isi ne nisi tāgata ko oti ne takitaki ‵se ne latou a nisi Kelisiano. (1 Ioane 2:18, 26) Ne ‵tala atu ei te auala mō fakamanatuga fapaupau.

“Ke mo a ma se paleni koutou i te otou ‵kau fakatasi mo tino sē tali‵tonu.”—2 Kolinito 6:14

E mafau‵fau a nisi tino me e seai se mea e masei i ei a te taliaga o faifaiga o te Eseta—ko te mea ke malamalama a “tino fapaupau” e uiga ki te toetuga o Iesu. Kae ko Paulo ne seki talia lele eiloa ne ia a te mea tenā. E tiga eiloa ne faimalaga atu a ia i Loma kātoa telā e tuku faka‵sau atu ki faifaiga fapaupau, ne seki fakaoga aka eiloa ne ia a faifaiga fapaupau konā, ko te mea ke fakamaina faka‵lei atu ei ki tino a mea e uiga ki a Iesu. Kae ‵kese mai ei, ne polopoloki atu a ia ki Kelisiano: “Ke mo a ma se paleni koutou i te otou ‵kau fakatasi mo tino sē tali‵tonu. E a, e fetaui pefea te amiotonu mo te solitulafono? Io me e mafai pefea o māfuta fakatasi te mainaga mo te pouliga? ‘Tela la, olo keatea mai i a latou, kae ‵vae keatea mai i a latou,’ ko muna a Ieova, ‘kae sa toe puke ki mea sē ‵ma.’ ‘Ko puke mai ei ne au koutou ki loto.’”—2 Kolinito 6:14, 17.

Se te ikuga ne maua mai i te sukesukega toetoe ne fai ki fakamatalaga liki‵liki konei? E fakaasi faka‵lei mai ei me i te Eseta e sē se fakamanatuga faka-Kelisiano.