Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Ianuali 2015

Tāgata A‵vaga—Fai ke Maua ne Tou Kāiga se Olaga Tokagamalie

Tāgata A‵vaga—Fai ke Maua ne Tou Kāiga se Olaga Tokagamalie

SE A te vaegā olaga tokagamalie e ‵tau o tuku atu ne se tagata avaga ki tena avaga? A te tokoukega o tino e tali‵tonu me i te fakamoemoega tāua o te tagata avaga, ko te fesoasoani atu ke maua ne tena kāiga se olaga tokagamalie i mea tau tupe. E tiga te feitu tenā, e isi ne avaga fa‵fine kolā e mau‵mea i te feitu faka-te-foitino, e seki maua ne latou se lagonaga tokagamalie —kae koi ma‵taku eiloa latou. Ne fai mai se fafine Sepania e igoa ki a Rosa e uiga ki tena avaga, “E fai a ia mo fai se tagata ‵lei ki nisi tino kae e fai eiloa a ia pelā me se tagata sāua i te fale.” Ne fai mai foki a Joy mai Nigeria, “Kafai e se lotomalie au ki se manatu o taku avaga, e fai mai tou tagata, ‘Fai fua so se mea e fai atu ne au me i a au ko tau avaga.’”

E mafai pefea ne se tagata o fakagalue aka tena tulaga e pelā me se tagata avaga i se auala alofa? Ne a mea e ‵tau o fai ne te tagata avaga ke mafai o fai tena fale mo fai se koga tokagamalie kae “filemu” ki tena avaga?—Luta 1:9, fakamatalaga fakaopoopo, NW.

PATI A TE TUSI TAPU E UIGA KI TE PULEGA A SE TAGATA AVAGA

E tiga eiloa e ‵pau a te tagata avaga mo te fafine avaga i te kilokiloga a te Atua, e fai mai te Tusi Tapu me e ‵kese eiloa lā tiute i loto i te kāiga. E fai mai te Loma 7:2 me i te fafine avaga e nofo mai lalo i te “tulafono a tena avaga.” E pelā eiloa mo fakapotopotoga e uke kolā e ‵tofi aka se tino ke onoono ki te fanofano ‵lei o mea, e penā foki te tagata avaga ne fili ne te Atua ke fai mo ulu o tena avaga. (1 Kolinito 11:3) E ‵tau o fai ne te tagata avaga a te takitakiga i tena kāiga.

E pelā me se tagata avaga, e mafai pefea o fakagalue aka ne koe tau pulega telā ne tuku atu ne te Atua? “Ke tumau koutou i te a‵lofa ki otou avaga,” ko pati i te Tusi Tapu e “pelā eiloa mo te alofa o Keliso ki te fakapotopotoga.” (Efeso 5:25) E tonu, faitalia me ne seki avaga a Iesu kae e mafai eiloa ne tena fakaakoakoga o fesoasoani atu ki a koe ke fai mo fai se tagata avaga ‵lei. Ke onoono tatou ki te auala e fai ei penā.

TE OLAGA O IESU—SE FAKAAKOAKOGA ‵LEI KATOATOA MŌ TĀGATA A‵VAGA

Ne salasala eiloa a Iesu ki avanoaga ke fakamalosi atu ki nisi tino kae fakamāmā aka olotou amoga ‵mafa. Ne tauto atu a Iesu ki tino katoa kolā e puapuaga kae mafatia i olotou fakalavelave totino: “O‵mai ki a au, . . . me ka tuku atu ne au ki a koutou se malosi fou.” (Mataio 11:28, 29) Ne fakafeoloolo aka ne ia olotou logo‵maega faka-te-foitino kae tuku atu foki a fakamalosiga faka-te-agaga. E se tioa eiloa o fakapili‵pili atu a tino e tokouke ki a Iesu, ona ko te loto tali‵tonu me ka fakamāmā aka ne ia olotou amoga!

 Te auala e mafai o fakaakoako atu ei a tāgata a‵vaga ki a Iesu. Salasala ki auala ke fakamāmā aka ei a te amoga a tau avaga. E fai eiloa a nisi fāfine a‵vaga e pelā mo Rosa, telā ne fai mai penei: “E fai eiloa au mo fai te tavini a taku avaga.” E ‵kese mai i ei, e fai mai se tagata avaga e tokotasi e igoa ki a Kweku, telā ne gali ‵ki tena olaga avaga: “E masani o fesili atu au ki taku avaga me ne a aku mea e mafai o fai ke fesoasoani atu ki a ia. Ona ko toku alofa ki tou fafine, e gasuesue muamua eiloa au o fesoasoani atu ki a ia i galuega i te fale.”

E atafai kae loto malamalama a Iesu ki nisi tino. E isi se fafine ne tigaina i tena masaki mō se 12 tausaga. I te lagonaga ne ia o tala e uiga ki vavega ‵mana a Iesu, “ne fai atu faeloa tou fafine ki a ia eiloa, penei: “Ke patele fua au ki tena gatu ko ‵lei ei au.” Kae ne tonu eiloa a ia. Ne fanatu a ia ki a Iesu, patele ki te fele o tena gatu kae ne ‵lei ei a ia. E tiga eiloa ne fakaiku aka ne nisi tino me ne seki āva a te fafine tenā, kae ne iloa ne Iesu me ne manako malosi tou fafine ki se fesoasoani. * Ne fai atu a ia mo te atafai ki tou fafine:  “Taku tama, ko ‵lei tou masaki.” I lō te fakama io me kaitaua atu ki tou fafine, ne faka‵lei eiloa ne ia tena masaki. Ne fakaasi faka‵lei atu ne ia me i a ia se tagata—telā e loto malamalama.—Maleko 5:25-34.

Te auala e mafai o fakaakoako atu ei a tāgata a‵vaga ki a Iesu. Kafai e se malosi ‵lei tau avaga, ke momea aka tou atafai mo te kufaki. Ke taumafai o talia kae malamalama i ana faifaiga. E pelā mo Ricardo, ne fai mai: “Kafai e lavea ne au me ko momea aka te ma‵sei vave o lagonaga o taku avaga, e taumafai malosi eiloa au o fakaeteete i te faiga o pati kolā e mafai ei o momea aka te ma‵sei o ana lagonaga.”

Ne fesokotaki atu faeloa a Iesu ki ana soko. Ne fakaasi atu ne Iesu a mea e uke ki ana taugasoa. Ne fai mai a ia: “Ko oti ne fakaasi atu ne au ki a koutou a mea katoa kolā ne lagona ne au mai toku Tamana.” (Ioane 15:15) E tonu, e manako eiloa a Iesu i nisi taimi ke nofo tokotasi ko te mea ke mafai o mafaufau a ia ki nisi mea kae ‵talo foki. Kae ne masani eiloa o fakaasi atu ne ia ana lagonaga ‵loto ki ana soko. I te po mai mua o tena mate, e pelā me se tagata solitulafono, ne fai ‵tonu atu a ia ki a latou me ko “mafatia eiloa” a ia. (Mataio 26:38) Kafai foki ne fakafanoanoa atu olotou faifaiga ki a ia, ne seki fakagata eiloa ne Iesu tena faipati atu ki ana soko.—Mataio 26:40, 41.

A te mafaufau faka‵lei ki te fakaakoakoga a Iesu e mafai o fesoasoani atu ki se tagata ke momea aka tena fai mo fai se avaga mo se tamana ‵lei

Te auala e mafai o fakaakoako atu ei a tāgata a‵vaga ki a Iesu. Ke fakaasi atu ki tau avaga a mea katoa i tou mafaufau mo tou loto. E mafai o fameo atu se fafine me e foliga mai i tena avaga e seai se fakalavelave ke faipati atu i mua o tino kae e nofo filemu faeloa i te fale. I te suā feitu la, onoono aka ki lagonaga o Ana e uiga ki tena avaga i te taimi e faipati atu ei tou tagata ki tou fafine. “E maua ne au se lagonaga me e alofa tonu mai a ia ki a au,” ko muna a tou fafine, “kae e maua ei ne au se lagonaga pili ki tou tagata.”

Ke mo a ma fakaaoga a te fa‵ki e pelā me se meatau ke fakasala ki ei tau avaga. E fai mai se fafine: “Kafai ko ita mai taku avaga, e ita fitifiti tou tagata ma faipati mai ki a au i aso e uke. E fai ne ia ke ma‵sei oku lagonaga kae fakamasiasi foki ne ia au.” Kae e taumafai malosi eiloa a Edwin ke fakaakoako atu ki a Iesu. “Kafai e se fiafia au, e se fakaasi fakavave atu ne au, kae e onoono au ki se taimi ‵lei ke fai‵pati tokolua māua.”

A Joy, telā ne taku atu i te kamataga, ne lavea ne ia a ‵fuliga i tena avaga talu mai te taimi ne sukesuke fakatasi ei mo Molimau a Ieova. E fai mai a Joy: “Ko gasolo aka eiloa o ‵lei tou tagata kae e taumafai malosi a ia ke fai mo fai se tagata avaga ‵lei i te fakaakoako atu ki a Iesu.” Ko maua eiloa ne te fia miliona o tauavaga a mea aoga mai i akoakoga foki eiloa konei i te Tusi Tapu. E mata, e fia kau atu koe ki a latou? E mafai o fakamolemole atu koe ki se Molimau a Ieova ke fai sau akoga faka-te-Tusi Tapu sē ‵togi.

^ pala. 10 E ‵tusa mo te Tulafono faka-Mose, ne fai eiloa ne te tulaga o te fafine tenei ke se ‵ma a ia i feitu fakalotu, kae ko so se tino e patele ki ei ka se ‵ma foki.—Levitiko 15:19, 25.