Fanatu ki te fakasologa

Fanatu ki te fakasologa o mataupu

Tali ki Fesili Mai te Tusi Tapu

Tali ki Fesili Mai te Tusi Tapu

E mata, e mafai o fesoasoani mai a agelu ki a tatou?

E pelā mo te fesoasoani atu o agelu ki te tavini fakamaoni a te Atua ko Tanielu i aso mua, e fesoasoani mai foki latou ki tino ke maua a mea aoga mai te tala ‵lei

Ne faite ne Ieova te Atua a te fia miliona o agelu a koi tuai eiloa o faite ne ia a tino. (Iopu 38:4, 7) A agelu konei ne tino faka-te-agaga kolā e tavini atu ki te Atua, e uga sāle mai i nisi taimi ke takitaki kae puipui ana tavini i te lalolagi nei. (Salamo 91:10, 11) I aso nei, e fesoasoani atu a agelu ki tino ke maua ne latou a mea aoga mai te tala ‵lei telā e talai atu ne soko o Iesu.—Faitau te Fakaasiga 14:6, 7.

E mata, e ‵tau o ‵talo tatou ki agelu mō se fesoasoani? Ikai. A te ‵talo se vaega o te tapuakiga, telā e ‵tau o tuku atu ki te Atua. (Fakaasiga 19:10) Ona ko agelu ne tavini a te Atua, e fai fua ne latou a fakatonuga a te Atua i lō tino. Tela la, e ‵tau fua o fai ‵tonu atu ‵tou ‵talo ki te Atua e auala i a Iesu.—Faitau te Salamo 103:20, 21; Mataio 26:53.

E mata, e isi ne agelu ma‵sei?

E pelā mo tino, ne faite a agelu mo te saolotoga ke mafai o filifili ki te mea ‵lei io me ko te mea masei. Se mea fakafanoanoa, me ne tokouke agelu ne ‵teke atu ki te Atua. (2 Petelu 2:4) A te agelu muamua mai i a latou ko Satani; ne tau‵tali atu a nisi agelu kae ne fai ei mo fai a temoni. I aso nei, ko oti ne ‵tuli ifo a Satani mo ana temoni mai te lagi kae ne ‵pei ifo ki te lalolagi.—Fakaasiga 12:7-9.

A te fanakaga fakavave ki luga o mea masei mo uiga fakasāua talu mai te 1914, e fakaasi mai ei me ko pili o fakaseai atu ne te Atua a Satani mo ana temoni. Ko toe fakafoki mai ei ne te Atua a te lalolagi ki tena tulaga tonu.—Faitau Fakaasiga 12:12; 21:3, 4.