Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Fepuali 2014

 E ‵FULI NE TE TUSI TAPU A OLAGA O TINO

Ne ‵Fuli ne te Folafolaga e Uiga ki te Lalolagi Palataiso Toku Olaga!

Ne ‵Fuli ne te Folafolaga e Uiga ki te Lalolagi Palataiso Toku Olaga!
  • TAUSAGA NE FANAU I EI: 1974

  • TENA FENUA: LATVIA

  • TENA TALA FAKASOLOPITO: RISK-TAKING MOTORBIKE RACER

TOKU OLAGA MUA:

Au ne fanau i Riga, te laumua o Latvia. Ne tausi māua mo toku tuagane ne te ma mātua. E tiga eiloa toku Mātua se Katolika, ne olo atu fua matou ki lotu i aso malō‵lo fakalotu. Ne maua ne au se loto talitonu ki se tino maluga kae malosi, kae e pelā me se talavou, ne seki saga tonu atu au ki ei ona ko te uke o nisi mea ne fiafia au ki ei.

I te taimi ne tupu aka ei au, ne lavea ne toku mātua me ne poto ‵ki au i te tapalepale o mea kae toe fakapikipiki aka foki. Ona ko te uke o mea i te fale kolā ne mafai o tapalepale, ne manavase faeloa a ia ma tuku tokotasi ne ia au i te fale. Tela la, ne tuku mai ne tou fafine ne fiti fakatū‵tu fale ta‵fao, telā ne fiafia malosi au ke fakapikipiki kae toe tapalepale. Ne olo tasi eiloa toku fiafia ki te mea tenā mo te suā mea ne fiafia malosi au ki ei—ko te fakateletele pasikaiti. Ne fakaaofia ne toku mātua au i te fakatau‵telega o pasikaiti e igoa ki te Zelta Mopēds (The Golden Moped). Ne kamata ei o aofia au i te fakatau‵telega tenā a te kau mopeds, kae fakamuli ifo, ko te tinā fakatau‵telega tonu eiloa i pasikaiti.

Ne tauloto vave au kae e se leva kae iku manuia au i te tafaoga makini kae fakamataku tenei. Ne sili fakatolu au i te fakatautelega o pasikaiti i Latvia, kae ne sili fakalua au i te Fakatautelega Sili o Pasikaiti a te Baltic States.

TE AUALA NE ‵FULI EI TOKU OLAGA NE TE TUSI TAPU:

I te ‵lotoga eiloa o taku galuega, a taku famau ko Evija (telā ne fai fakamuli mo fai taku avaga) ne fesokotaki mo Molimau a Ieova. Ne maua ne ia a nisi tusi a latou, kolā e maua atu ei se vaega i ei telā e mafai o faka‵fonu ne koe tou igoa mo tou fakatuatusi ke fakamolemole atu ei mō se akoga faka-te-Tusi Tapu. Ne faka‵fonu ne tou fafine te vaega tenā kae lafo atu. E seki leva kae āsi atu se tokolua molimau ki a ia kae ne kamata ei o suke‵suke latou ki te Tusi Tapu. Ne ‵lei eiloa te mea tenā ki a au, kae fakamuli ifo, ne seki fia saga malosi atu au ki mea faka-te-agaga.

Fakamuli loa, ne ‵kami au ne Molimau ke kau atu ki te akoga faka-te-Tusi Tapu a Evija kae fakalogologo. Ne talia ne au te ‵kamiga, kae ne fiafia au ki mea ne lagona ne au. E tasi te mea ne  otia malosi i ei toku loto ko te folafolaga i te Tusi Tapu e uiga ki te lalolagi palataiso. E pelā mo te fakaasimaiga o te fuaiupu i te Salamo 37:10, 11, telā e fai mai: “E se toe leva nei, ka ‵galo atu ei a tino amio ma‵sei; ka salasala ne koe latou, kae se maua ne koe; ka ko latou kolā e loto maulalo, ka fai mo latou te fenua, kae maua ne latou te manuia mo te filemu katoatoa.” Ne gali ‵ki eiloa ki a au a te folafolaga tenā.

Ne gasolo aka ki luga toku fiafia ki mea faka-te-agaga. Ne kamata o iloa ne au a te uke o akoakoga fakalotu ‵loi. E ‵kese mai i ei, ne fiafia malosi au ki akoakoga i te Tusi Tapu ona ko te fakamalosi loto i te ‵tonu mo te manino ‵lei.

I te taimi ne fakatumau ei taku sukesukega ki te Tusi Tapu, kae ne iloa ei ne au a te fakatāua malosi ne Ieova o te ola, se mea tafasili i te tāua ki a ia. (Salamo 36:9) Ne pokotia eiloa au i toku aofia i te fakatau‵telega o pasikaiti—ne seki toe manako au ke tu toku ola i se tulaga fakamataku. I lō te fai penā, ne manako au ke fakaaoga toku ola ke avatu ei a tavaega ki a Ieova. Tela la, a te takutakua, te ‵malu, mo te gali o te fakateletele pasikaiti ne seki toe tāua eiloa ki a au.

Ne kamata o malamalama au me e isi soku tiute ki te Tino telā ne tuku mai ne Ia te ola

I te 1996, ne kau atu au ki se fono i atufenua a Molimau a Ieova i Tallinn, Estonia, e se ‵mao mai i te koga telā ne fakateletele pasikaiti sāle ei au. I te fono, ne lavea ne au a tino mai fenua kese‵kese e ‵kau fakatasi i te fealofani mo te filemu. E pelā mo te galoga o te pausi tupe a se Molimau e tokotasi, ne mafaufau au me ka se toe maua eiloa ne tou fafine. E seki leva, ne maua ne se suā Molimau a te pausi tupe kae ne toe fakafoki atu e aunoa mo se mea e galo i ei. Ne poi masei eiloa au! Ko malamalama foki nei au me e ola tonu eiloa a Molimau e ‵tusa mo tulaga ma‵luga i te Tusi Tapu. Ne tumau eiloa te gasolo atu o māua mo Evija i te ma akoga, kae i te 1997 ne papatiso ei maua e pelā me ne Molimau a Ieova.

TE AUALA NE MAUA EI NE AU A MEA AOGA:

Ko oti eiloa ne ‵mate atu oku nisi taugasoa ona ko te fai valevale o olotou olaga i fakatau‵telega o pasikaiti. Mai te sukesuke ki te Tusi Tapu, ne kamata o malamalama au me e isi soku tiute ki te Tino telā ne tuku mai ne Ia te ola, ko Ieova. Kāti ne fakasao eiloa toku ola ne te malamalama tenā.

Mō te fa tausaga, ne maua ne māua mo Evija a te tauliaga ke tavini atu e pelā ne tavini ga‵lue tumau i te ofisa lagolago o Molimau a Ieova i Riga. Nei la, e maua ne māua a te fiafia i te putiakaga o te ma tamaliki fafine ko Alise, kae fesoasoani atu māua ki tou fafine ke tupu aka mo te alofa ki a Ieova. E maua foki ne au te tauliaga ke galue i se aso e tasi i te vaiaso i te ofisa ‵fulitusi, i te faitega o motoka mo nisi mea kolā e ma‵sei. E fai ei ke fiafia malosi au me koi fakaaoga eiloa ne au toku atamai mai taku folikiga! Ao, koi tapalepale eiloa ne au a mea kae toe fakapikipiki foki.

E fakatāua malosi ne au te tauliaga ke talai atu e uiga ki te Atua tonu e tokotasi fakatasi mo toku kāiga, kae fakafetai au ki mea katoa ne tauloto ne au mai te Tusi Tapu. A te ‵tonuga loa, a te folafolaga e uiga ki te lalolagi palataiso ne ‵fuli ei toku olaga!