Tauloto Mai te Muna a te Atua
Kaia e ‵Tau ei o Fakaaoga ne Tatou a te Igoa o te Atua?
E mafaufau a te mataupu tenei ki fesili kolā kāti ne faka‵sae aka ne koe kae fakaasi atu i ei a te koga e mafai ei o faitau ne koe a tali i loto i tau Tusi Tapu. Ka fia‵fia eiloa a Molimau a Ieova o sau‵tala fakatasi mo koe ki tali konei.
1. Kaia ne fai ei ne te Atua ke isi sena igoa?
E seai se fakalotolotolua, me e manako koe ke ka‵laga atu a tino ki tou igoa totino i lō te ‵tofi, e pelā mo te “tagata” io me ko te “fafine.” E fesoasoani atu a te igoa ke iloa ei koe e pelā me se tino e tokotasi. E masani o ka‵laga atu ki te Atua i vaegā tofi pelā mo te “Aliki Maluga,” “Atua Tafasili i te Malosi,” mo te “Māfuaga Sili.” (Kenese 15:2; 17:1; Failauga 12:1, NW) Kae ne fai foki ne ia ke isi sena igoa ke fesoasoani mai ke ati aka ne tatou se fesokotakiga totino mo ia. I te ‵gana Tuvalu, a te igoa totino o te Atua ko Ieova.—Faitau te Isaia 42:8, NW.
E tigā eiloa ko oti ne sui ne tino ‵fuli Tusi Tapu a te igoa o te Atua ki vaegā tugāpati pelā mo te “Atua” mo te “Aliki,” toeitiiti kae kātoa te 7,000 taimi e sae mai ei a te igoa totino o te Atua i tusitusiga mua o te Tusi Tapu i te ‵gana Epelu. E manino ‵lei me e manako te Atua ke iloa ne tino a tena igoa.—Faitau te Isaia 12:4, NW.
2. Kaia e tāua ei ke iloa a te igoa o te Atua?
E uke atu a mea e aofia i te iloa o te igoa o te Atua i lō te taku atu fua o te igoa. Ke iloa te Atua e auala i te igoa e fakauiga loa ki te mauaga o se fesokotakiga ‵pili mo ia. A te uiga o te igoa Ieova ko te “Ka Fai Eiloa ne au so se Mea e ‵Tau o Fai.” Se fakapa‵tonuga me ka fai ne te Atua so se mea e manakogina ke fakataunu ei a tena fuafuaga. Tela la, a te iloa o te igoa o te Atua e fakasino atu ki te talitonu me ka fakataunu eiloa ne te Atua ana tautoga. (Salamo 9:10) A te fakatuanaki o tino kolā e iloa kae fakaaoga a te igoa o te Atua e fakama‵losi aka ei latou ke tali‵tonu ki a ia kae fakamuamua a ia i olotou olaga. Ka puipui ne Ieova te Atua a vaegā tino penā.—Faitau te Salamo 91:14.
3. Kaia e manako ei te Atua ke iloa a tena igoa?
E manako te Atua ke iloa ne tino a ia e auala i tena igoa me e aoga ki a latou. Ka mafai o fai latou mo fai se taugasoa o te Atua mo te fakamoemoega ke ola ki te se-gata-mai. E se tioa eiloa o manako a Ieova ke fakailoa atu ne tatou a tena igoa!—Faitau te Ioane 17:3; Loma 10:13, 14.
Ne fai ne Iesu ke iloa te igoa o te Atua mai te akoakoga o tino ki auala o te Atua, Ana tulafono, mo Ana tautōga. I aso nei, koi tumau eiloa a soko o Iesu i te fakailoatuga o te igoa o te Atua i atufenua katoa. E fai fakatasi ne latou e pelā me ne “tino mō tena igoa.”—Faitau te Galuega 15:14; Ioane 17:26.
4. Ka faka‵malu pefea ne te Atua a tena igoa?
E manako a Ieova te Atua ke faka‵malu a tena igoa me ko oti ne fatufatugina ne tino. E pelā me se fakaakoakoga, e fai mai a nisi tino me ne seki māfua mai i a ia te ola kae ona ko te mea tenā, e se manakogina ke faka‵logo tatou ki a ia. E fai mai a nisi tino me e se fia saga mai a ia ki a tatou kae ona ko te mea tenā, ko ia ne māfua mai i ei a logo‵maega. E fai ne vaegā tino penā a muna ma‵sei mo tala ‵loi ki te igoa o te Atua. Kae ka sē fai ne latou penā ke oko ki te se-gata-mai. Ka fakaseai ne te Atua a latou kolā e se āva ki tena igoa.—Faitau te Salamo 83:17, 18.
Ka faka‵malu ne Ieova a tena igoa māfai ko fakaseai ne tena Malo a pulega katoa a tino kae toe fakafoki mai te filemū mo te tokagamalie ki tino. (Tanielu 2:44) E se leva nei, kae ka iloa ne tino katoa me i a Ieova ko te Atua tonu.—Faitau te Esekielu 36:23; Mataio 6:9.
Se a te mea e ‵tau o fai ne koe? Fakapilipili atu ki te Atua mai te sukesuke ki tena Muna kae ‵kau fakatasi mo tino kolā e a‵lofa ki a ia. Kafai e faka‵malu ne Ieova a tena igoa, ka masaua eiloa ne ia ana tavini fakamaoni.—Malaki 3:16.
Ke maua a fakamatalaga e uke atu, ke onoono ki te mataupu 1 o te tusi tenei Ne a Mea e Akoako ‵Tonu Mai i te Tusi Tapu?, telā ne ‵lomi ne Molimau a Ieova.
[Ata i te itulau e 10]
Te igoa o te Atua i tusitusiga mua i te ‵gana Epelu
