“A pati i toku gutu . . . ke fakafiafia atu ki a koe e Ieova.”SALA. 19:14, NW.

PESE: 82, 77

1, 2. Kaia e mafai ei o fakatusa ne tatou te afi ki te alelo io me ko te gutu, telā e fakauiga ki te atamai ke fai‵pati atu?

I TE kamatamataga o Oketopa 1871, ne ‵ka i ei a te togavao o Wisconsin, i Amelika. Tenei eiloa te ‵toe afi i tala fakasolopito o Amelika, ne lasi ‵ki tena fakamaseiga ki mea. Ona ko te salalau atu o te afi, ne ‵mate atu ei te aofaki o tino e silia atu mo te 1,200, mo se lua piliona o lakau ne fakamaseigina ne te afi. E foliga mai me ne fakamāfua aka foki ne tamā malapu‵lapuga pelā me ne afi mai tuleini kolā e ‵tele i te togavao a te salalau atu o te afi. Ko oko eiloa i te ‵tonu o pati i te Iakopo 3:5: “Onoono foki ki te foliki o te afi telā e mafai o ‵sunu ne ia se togavao lasi ‵ki!” Kaia ne fai mai ei ne se tino tusitala o te Tusi Tapu se vaegā fakamatalaga penā?

2 E fakaasi manino mai i te fuaiupu e 6 a te manatu e uiga ki te fakatusaga a Iakopo. “A te alelo se afi.” A te alelo io me ko te gutu e fakauiga ki te atamai ke fai‵pati atu. E pelā me se afi, e mafai o lasi te fakamaseiga e fakamāfua aka ne ‵tou pati e fai. E fai mai foki te Tusi Tapu me i te “muna telā e fai ne koe e mafai o fakasao ne ia tou ola, e mafai foki o fakamasei ne ia.” (Faata. 18:21) E tonu, e mafai o se fia fai‵pati atu tatou ona ko te manava‵se me e mafai loa o fai atu ne tatou ne pati fakalogo‵mae, e pelā loa mo te sē fia fakaaoga ne tatou te afi me e ma‵taku tatou i fakamaseiga kolā e mafai o iku mai i ei. A ko te kī tāua ko te loto pulea. Kafai e fakaaoga faka‵lei ne tatou te afi mo kūka ‵tou  mea‵kai, fakamafanafana ki ei ‵tou foitino, io me fakamaina ki ei tatou i te po, e ‵lei faeloa te mea tenā. E penā foki te gutu, e mafai o fakaaoga faka‵lei ne tatou te malosi o ‵tou gutu ke faka‵malu atu ei ki te Atua kae ke aoga foki ki nisi tino.—Sala. 19:14.

3. Ne a vaega e tolu o te faipati ka sau‵tala nei tatou ki ei?

3 Faitalia me e fakaaoga ne tatou a ‵tou gutu ke fai‵pati atu io me fai au tāga ki ou lima, a te atamai ke fakaasi atu ‵tou mafaufauga mo lagonaga se meaalofa mai te Atua. E mafai pefea o fakaaoga ne tatou te meaalofa tenei ke fakamalosi atu a nisi tino? (Faitau te Iakopo 3:9, 10.) Ka sau‵tala nei tatou ki vaega tāua e tolu o te faipati: te taimi ke faipati atu, pati kolā e ‵tau o fai atu, mo te auala e faipati atu ei koe.

TE TAIMI KE FAIPATI ATU

4. Taku mai ne fakaakoakoga o te “taimi o te nofo ‵mu.”

4 A te faipati se vaega o ‵tou olaga i aso takitasi, kae e se manakogina ke fai‵pati tatou i taimi katoa. E tonu, e fai mai te Tusi Tapu me e isi se “taimi o te nofo ‵mu.” (Fai. 3:7) A te nofo ‵mu i te taimi e fai‵pati ei a nisi tino se fakailoga o te āva. (Iopu 6:24) A te pule faka‵lei o te gutu ke sē fakaasi atu a mea ‵funa se fakamaoniga o te poto mo te malamalama. (Faata. 20:19) Se faiga poto ke iloa ne tatou o pule faka‵lei ‵tou gutu māfai tatou e kaitaua.Sala. 4:4.

5. E mafai pefea o fakaasi atu ne tatou te loto fakafetai mō te meaalofa a te Atua ko te faipati?

5 I te suā feitu, e fai mai foki te Tusi Tapu me isi foki se “taimi o te faipati.” (Fai. 3:7) Kafai ne tuku atu ne sou taugasoa se meaalofa gali, e mautinoa eiloa me ka sē ‵funa ne koe mai tino. Kae ka fakaasi atu tou loto fakafetai ki ei mai te fakaaoga faka‵lei ne koe te meaalofa tenā. I se auala tai ‵pau, e fakaasi atu ne tatou te loto fakafetai ki te meaalofa a Ieova ko te faipati, mai te fakaaoga ne tatou i se auala poto. E mafai o aofia i ei a te fakaasiatuga o ‵tou lagonaga, ‵tou manakoga, fakamalosiga, mo te avatuga o tavaega ki te Atua. (Sala. 51:15) E mafai pefea o filifili aka ne tatou se ‘taimi ‵lei ke fai‵pati’?

6. Ne fakaasi mai pefea ne te Tusi Tapu a te tāua ke filifili se taimi tonu ke faipati atu?

6 E fakaasi mai i pati a te Faataoto 25:11, NW, a te tāua ke filifili aka te taimi tonu ke faipati atu: “A pati kolā e fai atu i te taimi tonu, e ‵pau eiloa mo apolo aulo kolā e ufi ki mea siliva.” A apolo kolā e ‵kala aulo e ‵gali eiloa, kae ka nā mata ‵gali atu eiloa māfai e faka‵tu ne koe mai mua o se ‵pui siliva. I se auala tai ‵pau, a te filifili faka‵lei o se taimi tonu ke faipati atu, e mafai o iku atu ki se faipatiga fakafiafia kae magoi. E fai pefea ne tatou te mea tenei?

7, 8. Ne tau‵tali atu pefea a ‵tou taina i Tiapani ki te fakaakoakoga a Iesu mai te filifiliga o te taimi tonu ke fai‵pati atu ki tino e uiga ki te toe‵tuga?

7 E tāua ‵ki eiloa a pati kolā e fai atu ne tatou ki tino, kae e mafai eiloa o se aoga a ‵tou pati māfai e se filifili aka ne tatou te taimi ‵lei ke fai‵pati atu. (Faitau te Faataoto 15:23 *) E pelā me se fakaakoakoga, i a Mati 2011, ne fakamasei ne se mafuie mo te tsunami a fa‵kai katoa o te feitu ki te saegala o Tiapani. E silia atu mo te 15,000 o tino ne ‵galo atu olotou ola. E tiga eiloa ne logo‵mae a Molimau a Ieova i te koga tenā fakatasi mo olotou tuakoi, ne fakaaoga faka‵lei ne latou so se avanoaga ke fakamafanafana atu a tino fanoa‵noa e auala i te Tusi Tapu. E ui i ei, a te tokoukega o tino i konā ne tino kolā e ma‵losi ‵ki i te lotu Puta, kae seai se lotou iloa i akoakoga mai te Tusi Tapu. Ne ‵poto eiloa ‵tou taina ke mo a ma āsi fakavave atu ki a latou mai tua o te tsunami o fakaasi atu ki a latou a te fakamoemoega e uiga ki te toetuga. I lō te fai penā, ne fakaaoga ne latou te meaalofa ko te faipati ke ‵saga tonu atu o fesoasoani i feitu tau lagonaga kae fakamatala atu te pogai mai te Tusi Tapu e uiga ki mea ma‵sei kolā e ‵tupu ki tino ‵lei.

8 Ne iloa ne Iesu te taimi telā e se ‵tau mo ia o faipati atu e penā foki mo te taimi tonu telā  e ‵tau o faipati atu ei a ia. (Ioa. 18:33-37; 19:8-11) Ne fai atu a ia i se taimi ki ana soko, penei: “E uke a mea koi fia fai atu ne au ki a koutou, kae e se mafai o malama‵lama koutou i ei i te taimi nei.” (Ioa. 16:12) Ne tau‵tali eiloa a Molimau a Ieova i te kogā koga tenā o Tiapani ki te fakaakoakoga a Iesu. I se lua mo te āfa tausaga mai tua o te tsunami, ne aofia latou i te galuega telā ne fai i te lalolagi kātoa ki te tufatufaga o te Kingdom News Napa 38, telā e fakaulutala penei, “E Mata, e Mafai Eiloa o Toe Ōla Mai a Tino ‵Mate?” I te taimi tenā, e tokouke a tino ne maua ne latou a fakamafanafanaga mai te fekau fakaotia loto e uiga ki te toetuga, kae e tokouke a tino ne talia ne latou a te tamā pepa tenā. E tonu, e lasi ‵ki a te kese‵kesega i tuu mo talitonuga a tino i ‵tou koga talai, tela la, e ‵tau mo tatou o ‵poto i te filifiliga o te taimi tonu ke fai‵pati atu ki a latou.

9. I tulaga fea e mafai ei o ma‵goi a pati kolā e filifili ne tatou ke fai atu i te taimi tonu?

9 E isi eiloa ne taimi kolā e manakogina ei ke iloa ne tatou te taimi tonu ke fai‵pati atu. E pelā me se fakaakoakoga, kāti e fai mai ne se tino a pati kolā e fai ei ke kaitaua tatou. Se faiga poto ke nofo kae mafaufau faka‵lei me e mata se mea ‵lei ke fai atu ne au pati io me ikai. Kafai e ‵tau o fai‵pati atu tatou, se mea valea ke olo atu ki te tino tenā māfai tatou koi kaitaua, me e mafai loa o fai‵pati atu tatou ki a ia e aunoa mo te mafaufau. (Faitau te Faataoto 15:28.) I se auala tai ‵pau, e ‵tau foki o ‵poto tatou māfai e fai‵pati atu ki ‵tou kāiga sē tali‵tonu e uiga ki te munatonu. E ma‵nako tatou ke iloa ne latou a Ieova, kae e ‵tau mo tatou o kufaki kae ke tai fakaeteete. A te fai atu o pati ‵tau i te taimi tonu e mafai o fesoasoani atu ke fia fakalogo‵logo mai latou.

PATI KOLĀ E ‵TAU O FAI ATU

10. (a) Kaia e ‵tau ei mo tatou o filifili faka‵lei a ‵tou pati kolā e fai atu? (e) Taku mai se fakaakoakoga o pati ma‵sei kolā e ‵tau o ‵kalo keatea tatou mai i ei.

10 E isi eiloa se malosi o pati ke faka‵logomae io me faka‵lei ei tatou. (Faitau te Faataoto 12:18.) A te fakaaogaga o pati fakalogo‵mae e lauiloa i te lalolagi tenei a Satani. E fakamalosi ne fakafiafiaga a te tokoukega ke “fakamata olotou laulaufaiva e pelā mo ne pelu” kae ko olotou “muna ma‵sei foki e . . . pelā me ne matasana e sana mai.” (Sala. 64:3) E ‵tau o kalo keatea se Kelisiano mai te faifaiga masei tenei. A te fakaakoakoga e tasi o te “muna ma‵sei” ko pati fakatauemu kae fakalogo‵mae kolā e mafai o fai ke kaitaua ei a nisi tino. A pati fakatauemu e mafai o fai pelā me se mea fai fa‵kata, kae e mafai o masei atu māfai e fai atu i se auala sē āva. A pati fakalogo‵mae se vaega e tasi o pati ma‵sei kolā e ‵tau o “ave keatea” ne Kelisiano. E ‵lei eiloa te fai fa‵kata, kae e ‵tau mo tatou o ‵kalo keatea mai te malei ko te taumafai ke fai mea fa‵kata kolā e mafai o fakalogo‵mae kae fakamasiasi ei a nisi tino. E fakamalosi mai te Tusi Tapu, penei: “Ke seai ne pati ma‵sei e ‵to mai i otou gutu, kae ko pati ‵lei fua kolā e ati aka ei a tino e ‵tusa mo te mea e manakogina, ko te mea ke mafai o tuku atu a mea aoga ki tino kolā e fakalogo‵logo mai.”—Efe. 4:29, 31.

11. E aofia pefea a ‵tou loto i te filifiliga o pati kolā e ‵tau o fai atu?

11 Ne akoako mai a Iesu me e “faipati mai ne te gutu a mea kolā e ‵fonu i te loto.” (Mata. 12:34) Tela la, a te filifiliga o pati ‵tau e māfua mai i te loto. E fakaasi mai i ‵tou pati a te auala e ‵kilo atu ei tatou ki nisi tino. Kafai e ‵fonu ‵tou loto i te alofa mo te atafai, ka fai atu eiloa ne tatou a pati ‵lei kae fakamalosi loto.

12. E mafai pefea o momea aka ne tatou a te ‵lei o ‵tou atamai i te filifiliga o pati kolā e ‵tau o fai atu?

12 A te filifiliga o pati ‵tau e aofia foki i ei a mafaufauga mo faka‵tauga ‵lei. E pelā foki loa mo te tupu poto ko Solomona, “ne tauloto ne ia a muna fakatusa kae tofotofo foki eiloa ne ia” ko te mea ke maua ne ia a “muna fakamafanafana loto” io me ko pati fakafiafia mo “muna ‵tonu eiloa.” (Fai. 12:9, 10) E mata, se mea faigata ke fai atu faeloa ne koe a pati “fakamafanafana loto” io me ko pati fakafiafia?  Kafai e penā loa, se mea ‵lei ke momea aka tou malamalama i te auala e fai‵pati ei a tino. A te auala e tasi ke fai te mea tenei ko te iloa ne tatou te auala e fakaaoga ei a pati faka-te-Tusi Tapu konā i ‵tou tusi faka-Kelisiano. Ke tauloto a uiga o tugapati kolā e se masani koe ki ei. A ko te ‵toe mea tāua, ko te tauloto ki te auala e fakaaoga ei a pati i se auala telā e fesoasoani atu ei ki nisi tino. E uiga ki te fesokotakiga i te vā o Ieova mo tena Tama, e fai‵tau tatou penei: “Ko oti au [Iesu] ne akoako ne te Aliki Sili [Ieova] ki muna e ‵tau o fai ne au, ko te mea ke mafai ne au o fakamalosi a loto o tino loto vāi‵vai.” (Isa. 50:4) A te fakaaoga faka‵lei o taimi ke mafaufau ‵loto ki ‵tou pati ka fai, e mafai o fesoasoani mai ke filifili aka a pati kolā e ‵tau o fai atu. (Iako. 1:19) E mafai o ‵sili ifo tatou penei, ‘E mata, e mafai o malamalama ‵lei a te tino i aku pati konei? Ka pokotia pefea a te tino tenā i aku pati kolā e fai atu?’

13. Kaia e tāua ei a pati kolā e fai atu i se auala telā e faigofie ke malamalama i ei?

13 Ne fakaaoga eiloa a pū i Isalaelu e pelā me se fakailoga ke fakamaopoopo io me ke toe faka‵foki atu ei a tino ki olotou faleie, e pelā foki mo te fakamalosi atu o te kautau ke fai te taua. E tonu, e fakaaoga ne te Tusi Tapu a te ‵tagi o pū ke fakatusa ki te tāua ke fai atu a pati kolā e faigofie ke malama‵lama i ei. A te sē ‵tagi ‵lei o te pū e mafai o fakamataku ki se kautau. I se auala tai ‵pau, kafai e se manino ‵lei tau faipati io me se faipati ‵tonu, e mafai eiloa o faka‵numi io me takitaki ‵se ne koe a tino. E tonu, i ‵tou taumafaiga ke fai atu ‵tou pati i se auala ‵lei kae manino, e se ma‵nako eiloa tatou o pati ‵toko io me fai‵pati atu i se auala valea.—Faitau te 1 Kolinito 14:8, 9.

14. Taku mai se fakaakoakoga e uiga ki pati faigofie kolā ne fakaaoga ne Iesu i tena lāuga.

14 Ne tuku mai ne Iesu te ‵toe fakaakoakoga ‵lei e uiga ki te filifiliga o pati kolā e ‵tau o fai atu. Mafaufau la ki tena lāuga toetoe kae fakamalosi loto telā ne fakamau i te Mataio mataupu e 5 ki te 7. Ne seki fakaaoga ne Iesu a pati faka‵numi tino; ne seki fai atu foki ne ia a pati sē ‵lei io me fakalogo‵mae. I lō te fai penā, ne filifili ne ia a tugapati ma‵nino kae faigofie ke fakaoko atu ei ki loto o ana tino fakalogo‵logo. E pelā me se fakaakoakoga, ke taofi aka te manava‵se o tino ki olotou manakoga i aso takitasi, ne fakasino atu a ia ki te auala e tausi ei ne Ieova a manu eva o te lagi. Mai te fakatusaga ne ia a ana tino fakalogo‵logo ki manua eva, ne fesili atu a ia, penei: “E mata, e se tāua atu koutou i lō latou?” (Mata. 6:26) Ko oko eiloa i te fakaotia loto o pati a‵lofa kae faigofie kolā ne fai atu ne Iesu! Ke na onoono nei tatou ki te tolu o vaega tāua o te faipati.

TE AUALA KE FAIPATI ATU

15. Kaia e ‵tau o fakaasi atu ne tatou te atafai i ‵tou pati e fai?

15 E ‵pau eiloa te tāua o te auala e fai‵pati ei tatou mo ‵tou pati kolā e fai atu. I te taimi ne faipati atu ei a Iesu i te sunako i te fa‵kai ko Nasaleta, ne “ofo masei [a tino] i te ‵gali o pati kolā ne ‵to mai i tena gutu.” (Luka 4:22) A pati atafai e fakafiafia eiloa ki te loto kae e se mafai eiloa o fakavāivāi. E tonu, e mafai o magoi ‵ki ‵tou pati e fai, māfai e fai atu i se auala atafai. (Faata. 25:15) E mafai o fakaakoako tatou ki pati atafai a Iesu mai te fakaasi atu o te āva, kae mafau‵fau foki ki lagonaga o nisi tino. Mai te kilo atu ki taumafaiga a te vaitino ke lagona ne latou a ia e faipati, ne oti ei te loto o Iesu mo te alofa kae “ne kamata ei o akoako atu ne ia a mea e uke ki a latou.” (Male. 6:34) I te taimi foki eiloa ne fakasauagina a ia, ne seki fakaaoga eiloa ne Iesu a pati ma‵sei.—1 Pe. 2:23.

16, 17. (a) Kafai e fai‵pati tatou mo tino i ‵tou kāiga io me ko ‵tou taugasoa i te fakapotopotoga, e mafai pefea o fakaakoako atu tatou ki a Iesu? (Ke onoono ki te ata i te kamataga.) (e) Taku mai se fakaakoakoga e uiga ki mea aoga e maua mai i pati kolā e fai atu mo te atafai.

16 Se mea faigata ke fai‵pati atu tatou i se auala loto maulalo kae atafai ki tino kolā e masani ‵lei mo tatou. Kāti e faigofie fua ke faipati ‵tonu atu io me pati ‵toko atu latou. E mafai o fai ne tatou te mea tenā māfai e fai‵pati atu tatou ki se kāiga io me se taugasoa ‵pili o tatou i  te fakapotopotoga. E mata, ne mafaufau a Iesu me ne mafai fua o faipati ‵tonu io me pati ‵toko ne ia ana soko, ona ko te mea e ‵pili ‵ki te lotou fesokotakiga? E se penā eiloa! I te taimi ne kinau ei ana soko me ko oi te tino e sili atu i a latou, ne faka‵tonu ne Iesu latou mai te fai atu o pati atafai mo te tala fakatusa e uiga ki se tamā tamaliki. (Male. 9:33-37) E mafai o fakaakoako atu a toeaina ki a Iesu mai te tuku atu o pati fakatonutonu “i te agaga o te agamalu.”—Kala. 6:1.

17 Kafai foki loa e fai mai ne se tino se mea e fai ei ke kaitaua tatou, e mafai eiloa o maua a ikuga ‵lei māfai e fai‵pati atu i se auala atafai. (Faata. 15:1) E pelā me se fakaakoakoga, ne ola eiloa se tamaliki tagata a se mātua taka i se olaga magalua. Ne fai atu se tuagane Kelisiano telā ne alofa ‵ki ki te mātua, penei: “Ko oko eiloa i te sē ‵lei me ne seki mafai ne koe o fakaakoako tau tamaliki.” Ne mafaufau eiloa te mātua ki ana pati, kae tali atu: “Se mea tonu me e se na loa ko oloolo ‵lei a mea i te taimi nei, kae koi taumafai eiloa au o akoako tou tagata. Faipati mai ki au māfai ko oti atu a Amaketo; ke fakamautinoa aka ei ne tāua.” A te tali loto maulalo tenei, ne fesoasoani atu ke fakatumau ne tuagane konei te filemu i te vā o laua, kae ne fakamalosi aka ei te tamaliki tagata, telā ne lagona ne ia te lā sau‵talaga. Ne fatoa iloa ne ia me ne seki ‵fiu eiloa tena mātua i tou tagata. Ne fai ne te mea tenei ke tiakina ne ia ana taugasoa ma‵sei. Fakamuli loa, ne papatiso a ia, kae tavini atu fakamuli i te Peteli. Faitalia me ‵nofo atu tatou i tafa o ‵tou taina, kāiga, io me ko tino fakaa‵tea, e ‵tau eiloa o fai ‵tou pati ke “‵tagi ‵lei, ke faka‵kona ki te masima.”—Ko. 4:6.

18. E fesoasoani mai pefea te tautali atu i te fakaakoakoga a Iesu e uiga ki te faipati ke fakaaoga ne tatou a te malosi o ‵tou gutu mō mea ‵lei?

18 A te atamai ke fakaasi atu ‵tou mafaufauga mo lagonaga i ‵tou pati e fai, se meaalofa tafasili i te gali. Ke na tau‵tali atu tatou i te fakaakoakoga a Iesu mai te filifili aka te taimi tonu, pati kolā e ‵tau o fai atu, kae taumafai malosi ke fakaasi atu te atafai. Mai te faiga tenā, ka fai eiloa te malosi o ‵tou gutu e pelā me se mea fakamalosi loto ki tino kae fakafiafia atu ki a Ieova, te Tino telā ne tuku mai ne ia te meaalofa tāua ko te faipati.

Fakamatalaga mai lalo]

^ pala. 7 Faataoto 15:23, NW: “E fiafia eiloa te tagata o tuku atu te tali tonu. Kae ko pati kolā e faipati atu i te taimi tonu—ko oko eiloa i te ‵lei.”