Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Novema 2015

 MAI ‵TOU FALETUSI

‘E Seai se Mea i te Lalolagi Nei e Mafai o Taofi ne ia Koutou!’

‘E Seai se Mea i te Lalolagi Nei e Mafai o Taofi ne ia Koutou!’

I TE tausaga 1931, i te taimi o te tau mafanafana, ne ‵fonu eiloa a te mataloa ki loto i te fale fai koniseti lauiloa i Paris, ko Pleyel i tino mai fenua kese‵kese e 23. Ko taxi ‵lasi kolā e ‵sopo i ei a pasese e ‵tu mai tua o te hall, kae ko ‵fonu eiloa a te koga fai koniseti i tino. Toeitiiti ko kātoa te 3,000 tino kolā ne seki au‵mai fua o fakalogo‵logo ki se koniseti, kae ne au‵mai eiloa o fakalogo‵logo ki lāuga a Joseph F. Rutherford, telā ne takitaki ne ia te faiga o te galuega talai i te taimi tenā. Ne ‵fuli tena lāuga i te ‵gana Falani, Siamani, mo te ‵gana Polani. Ne mafai eiloa o lagona atu te leo maluga o te taina ko Rutherford ne tino katoa i te hall.

I te fono tenei i Paris, ne fai ei se fakamafuliga lasi ki te faiga o te galuega talai o te Malo i Falani. Ne fai atu a te taina ko Rutherford ki tino fakalogo‵logo mai fenua kese‵kese kae fakapitoa loa ki talavou Kelisiano ke tavini atu e pelā me ne paenia i Falani. Ne seki mafai eiloa o puli i a John Cooke, se talavou mai Egelani, a te fakamalosiga fakafiafia tenei: “E seai eiloa se mea i te lalolagi nei e mafai o taofi ne ia koutou talavou mai te tavini atu e pelā me ne paenia!” *

E se gata fua i a John Cooke, telā ne fai fakamuli e pelā me se misionale, e tokouke foki ne ‵saga atu ki te kalaga ke vau ki Maketonia. (Galu. 16:9, 10) E tonu, ne fanaka eiloa te aofaki o paenia i Falani mai te 27 i te 1930 ki te 104 i te 1931—se fanakaga fakaofoofogia i se tausaga fua e tasi. E tiga eiloa e se fai‵pati a te tokoukega o paenia konei ki te ‵gana Falani, ne mafai pefea o fakafesagai atu latou ki te faigata o te ‵gana, te sē lava o mea tau tupe, mo te ‵nofo ‵mao o latou?

FAKAFESAGAI ATU KI TE FAIGATA O TE ‵GANA

Ne fakalagolago eiloa a paenia mai nisi fenua ki testimony cards ke mafai o fakaaoga ne latou i te folafolaatuga o te fakamoemoega e uiga ki te Malo. Ne fai mai se taina Siamani telā ne talai atu mo te loto malosi i Falani, penei: “Ne iloa ne matou me i te ‵tou Atua e malosi katoatoa. Kafai e pole‵pole matou i te taimi e fai ei te galuega talai, e se ona ko te ma‵taku ki tino kae ona fua ko te ma‵taku i te mea ma puli i a matou a mū pati eiloa konei, ‘Voulez-vous lire cette carte, s’il vous plaît? [Fakamolemole, e mafai o faitau mai ne koe te pepa tenei?]’ Ne tali‵tonu eiloa matou me e tāua ‵ki eiloa te ‵tou galuega.”

Ne fakaaoga eiloa ne paenia i aso mua a pasika tā ki vae mo pasikaiti ke fakasalalau atu a te tala ‵lei i Falani

I taimi e talai atu ei a paenia i fale ‵togi, ne masani faeloa o ‵tuli latou ne tino kolā e tausi ne latou a fale ‵togi. I te aso e tasi, ne fakafesagai atu a tuagane palagi e tokolua kolā e se nā ko ‵lei a te lā ‵gana Falani ki te tagata leoleo mata kaitaua telā ne ‵sili atu me ko oi te tino e ma‵nako laua ki ei. Mai te taumafai ke faka‵noga aka te kaitaua o te tino leoleo tenā, ne lavea ne te tuagane e tokotasi se tifa mo pati i luga i ei e ‵piki i luga i te mataloa. E tusi i luga i ei a pati konei: “Tournez le bouton [Fakatagi te pēle].” Mai te mafaufau me kāti a te mea tenā ko te igoa o te tino i te fale, telā ne tali atu ei tou fafine mo te fiafia, penei: “E asi mai eiloa māua ki te fafine e igoa ki a ‘Tournez le bouton.’” Ne fesoasoani malosi atu eiloa a uiga faifa‵kata ki paenia loto finafinau konei!

 NE SEKI TAOFI NE TE SĒ LAVA O TUPE MO TE ‵NOFO MAO A LATOU

I tausaga mai te 1930 o vau ki mua, ne ‵tau eiloa mo te tokoukega o tino i Falani o kufaki i tulaga ma‵tiva i konā, kae penā foki loa a paenia mai nisi fenua kolā e ‵nofo atu i konā. E uiga ki mea kolā ne fe‵paki mo te tuagane Egelani ko Mona Brzoska mo te suā paenia, ne fai mai a ia, penei: “A te mā fale e se na loa ko ‵lei, kae e tasi o fakalavelave ko te taimi o te tau‵moko telā e manakogina i ei ke fakavelavela ei te mā potu. Ne ‵nofo atu faeloa māua i se potu ‵moko kae ne ‵tau o ‵ligi ne māua a vai ki te poloka i te tiā ko te mea ke mafai o ‵fulu ki ei a mā mata i te taeao.” E mata, ne loto vāi‵vai a paenia konei ona ko te sē ‵lei o koga e ‵nofo i ei latou? E se penā loa! Ne fakamatala faka‵lei mai ne se tokotasi o latou a olotou lagonaga, i te taimi ne fai mai ei a ia, penei: “E seai eiloa ne motou kope totino, kae e seai foki eiloa se mea ne ma‵tiva ei matou.”—Mata. 6:33.

Ko paenia Egelani kolā ne ‵kau atu ki te fono o te atufenua i Paris i te 1931

Ne ‵tau foki mo paenia loto ma‵losi konei o fakafesagai atu ki te ‵nofo ‵mao o latou. I te kamatamataga o tausaga mai te 1930 o vau ki mua, e se siliga atu mo te toko 700 o paenia i Falani, kae ko te tokoukega o latou ne salalau atu ki koga kese‵kese i te fenua kātoa. Se a te mea ne fesoasoani atu ki paenia kolā e ‵nofo ‵mao ke tumau i te fia‵fia? Ne fakamatala mai penei a Mona, telā ne fakafesagai atu ki te tulaga faigata tenei fakatasi mo tena soa paenia: “Ne ‵tau o fakafesagai atu matou ki te ‵nofo ‵mao mai te suke‵suke fakatasi i aso katoa ki tusi a te Sosaiete. E tiga eiloa i taimi konā e seai ne motou toe asiga io me ne akoga faka-te-Tusi Tapu, ne fakaavanoa ne matou a te afiafi ke tusi atu matou ki omotou kāiga kae maise ki nisi paenia, o fakamatala atu ki ei a omotou tala ‵gali kae fakatau fakamalosi atu.”—1 Tesa. 5:11.

Ne fakatumau ne paenia loto ‵toa konā se kilokiloga ‵lei faitalia a fakalavelave faiga‵ta. E mafai o lavea atu a te mea tenei mai tusi kolā ne lafo atu ne latou ki te ofisa lagolago, i se sefulu tausaga fakamuli mai tua o te taimi ne ga‵lue fakapaenia ei i Falani. Mai te mafaufau ki mea ne ‵tupu i tausaga ko ‵teka, ne tusi mai a Annie Cregen, se tuagane fakaekegina telā ne ga‵lue fakatasi mo tena avaga i koga katoa o Falani i te 1931 ki te 1935: “Ne maua eiloa ne māua se olaga gali kae fakafiafia! Ne fai eiloa matou paenia e pelā me se potukau telā ne fusi ke tasi. E pelā mo pati a te apositolo ko Paulo, ‘Ne ‵toki ne au, ne fakasiusiu ne Apolo, kae ko te Atua ne fai faeloa ne ia ke ola te lakau.’ Ne fakafiafia atu eiloa a te mea tenei ki a latou kolā ne maua ne latou te avanoaga ke fesoasoani atu ki tino e tokouke i tausaga ko ‵teka.”—1 Koli. 3:6.

Ne tuku mai ne paenia konei se fakaakoakoga gali o te loto kufaki mo te loto finafinau ke mafau‵fau faka‵lei ki ei a nisi tino kolā e ma‵nako o fakalauefa atu te lotou taviniga. I aso nei, ko nofo ki te 14,000 o paenia tumau i Falani. E tokouke nei ko tavini atu i potukau io me ko fakapotopotoga i ‵gana kese‵kese. * E pelā mo tino talai i aso mua, e seai eiloa se mea i te lalolagi nei ne mafai o taofi ne ia latou!—Mai ‵tou faletusi i Falani.

^ pala. 4 E uiga ki te galuega ne fai ne tino Polani kolā ne olo atu o ‵nofo i Falani, ke onoono ki te mataupu “Ne Aumai ne Ieova Koutou ki Falani ke Tauloto ki te Munatonu,” i te lōmiga o Te Faleleoleo Maluga i a Aokuso 15, 2015.

^ pala. 13 I te 2014, e silia atu mo te 900 o fakapotopotoga mo potukau i ‵gana kese‵kese ko ga‵lue mai lalo i te takitakiga a te ofisa lagolago i Falani, ke fesoasoani atu ki tino kolā e salasala ki te munatonu i ‵gana kese‵kese e 70.