Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Setema 2015

Ne a Auala e Fakaasi Mai ei ne Ieova Tena Alofa mō Tatou?

Ne a Auala e Fakaasi Mai ei ne Ieova Tena Alofa mō Tatou?

“Onoono la ki te vaegā alofa telā ne tuku mai ne te Tamana ki a tatou!”—1 IOA. 3:1.

PESE: 91, 13

1. Se a te mea e fakamalosi mai te apositolo ko Ioane ke mafau‵fau a Kelisiano ki ei, kae kaia?

A te fakamatalaga a te apositolo ko Ioane telā e maua i te 1 Ioane 3:1 e fakaasi mai i ei te tāua ke fakaasi atu te loto fakafetai. Mai pati konei, “onoono la ki te vaegā alofa telā ne tuku mai ne te Tamana ki a tatou,” ne fakamalosi mai eiloa a Ioane ki Kelisiano ke mafau‵fau ki te lasi o te alofa o te Atua pelā foki mo te auala ne fakaasi mai ei tena alofa mō tatou. A te mafaufau ‵loto ki te alofa o Ieova, ka fai ei ke ‵poko ‵ki te ‵tou a‵lofa mō ia kae fakamalosi aka ei ‵tou fesokotakiga mo ia.

2. Kaia e faigata ei ki nisi tino ke malamalama i te alofa o te Atua mō latou?

2 E tiga eiloa te feitu tenā, a nisi tino e se mafai o malamalama i te auala e alofa mai ei te Atua ki a latou. E iloa fua ne latou me e ‵tau o ma‵taku kae faka‵logo latou ki te Atua. Io me kāti ona ko akoakoga ‵se kolā ko ‵mautakitaki i olotou loto, e mafau‵fau latou me i te Atua e se alofa, io me e faigata o fakaasi atu te alofa ki a Ia. I te suā feitu, e tali‵tonu a nisi tino me e seai se tapula ki te alofa o te Atua kae faitalia me ne a olotou mea e fai, e alofa eiloa te Atua ki a latou. I te taimi e sukesuke ei koe ki te Tusi Tapu, ne tauloto ne koe me i te alofa ko te ‵toe uiga tāua eiloa o Ieova, kae fai ne tena alofa ke tuku mai ei ne ia tena Tama e pelā me se togiola mō tatou. (Ioa. 3:16; 1 Ioa. 4:8) Kae ona ko mea e ‵tupu i tou olaga, e mafai eiloa o faigata ke malamalama koe i te lasi o te alofa o Ieova mō koe.

3. Se a te munatonu fakavae e fesoasoani mai ke malamalama tatou i te alofa o te Atua mō tatou?

 3 Kae i te auala fea e alofa mai ei a Ieova ki a tatou? E faka‵na eiloa te tali o te fesili ki te mainaga o tatou i te fesokotakiga fakavae i te vā o Ieova te Atua mo tatou. E tonu, a Ieova ko te Mafuaga o tino ola katoa. (Faitau te Salamo 100:3-5.) Tenā te pogai e taku ei ne te Tusi Tapu a Atamu ki “te tama a te Atua,” kae ne akoako ne Iesu ana soko ke taku ne latou te Atua pelā me ko “te [lotou] Tamana telā i te lagi.” (Luka 3:38; Mata. 6:9) E pelā me ko te Mafuaga o te Ola, a Ieova ko te ‵tou Tamana; a te fesokotakiga i te vā o ia mo tatou e ‵pau eiloa mo te vā o se tamana mo ana tama‵liki. Tela la, e alofa mai a Ieova e pelā loa mo te auala e alofa ei se tamana ki ana tama‵liki.

4. (a) A Ieova se vaegā Tamana pefea? (e) Ne a mea ka suke‵suke tatou ki ei i te mataupu tenei mo te suā mataupu?

4 A tamana e se ne tino ‵lei katoatoa. Faitalia olotou taumafaiga, e se fakaata katoatoa mai ne latou te auala e fakaasi mai ei ne Ieova tena alofa fakatamana. E tonu, a nisi tino kolā ne puti aka i kāiga telā te tamana e uiga sauā, ko faigata o fakapuli ne latou i olotou mafaufau a faifaiga penā. E fakafanoanoa kae fakalogo‵mae atu ki a latou a vaegā tulaga penā. Kae e ‵kese mai i ei a Ieova, me i a ia e sē se vaegā tamana penā. (Sala. 27:10) Kafai e malama‵lama tatou i te auala e alofa kae tausi mai ei ne Ieova tatou, ka fai i ei ke fakapili‵pili atu tatou ki a ia. (Iako. 4:8) I te mataupu tenei, ka suke‵suke tatou ki auala e fa e fakaasi mai ei ne Ieova tena alofa mō tatou. I te suā mataupu, ka sau‵tala tatou ki auala e fa e mafai ei o fakaasi atu ne tatou te alofa ki a ia.

E TUKU MAI NE IEOVA A MEA KATOA ONA KO TE ALOFA

5. Ne a pati ne fai atu ne te apositolo ko Paulo ki tino Atenai e uiga ki te Atua?

5 I te taimi ne nofo ei te apositolo ko Paulo i Atenai, i Eleni, ne lavea ne ia me ne ‵fonu eiloa te fa‵kai i tupua faite kolā ne tali‵tonu ki ei a tino me ne aumai ne latou te ola mo mea e manakogina i te olaga. Ne fakamalosi ei a Paulo ke folafola atu, penei: “A te Atua telā ne faite ne ia a te lalolagi mo mea katoa i luga i ei . . . e tuku atu ne ia ki tino katoa a te ola mo te mānava e pelā foki mo mea katoa. . . . E auala i a ia ko maua ei ne tatou a te ola, e gasue‵sue, kae e iai foki tatou.” (Galu. 17:24, 25, 28) E tonu, ona ko te alofa, e tuku mai ne Ieova a “mea katoa” kolā e manakogina ne tatou ke tumau ei i te ola. Mafaufau la ki te fakamatalaga tenā.

6. E fakaata mai pefea i te faitega o te lalolagi a te alofa o te Atua mō tatou? (Ke onoono ki te ata i te kamataga.)

6 Onoono ki te lalolagi telā ne faite ne Ieova kae “ne tuku atu ne ia . . . ki tino.” (Sala. 115:15, 16) Ne fakamāumāu ne saienitisi a tupe e uke ke olo atu ki luga i te vanimonimo ke ‵sala ki nisi paneta kolā e tai ‵pau mo te paneta ko te lalolagi. E tiga eiloa e lau i se fia selau o paneta kolā ko oti ne maua aka, ne fanoa‵noa a saienitisi me e seai loa se paneta e ola i ei se mea ke mafai o fakaaoga ne tino ola, e pelā mo te lalolagi. E tu ‵kese eiloa te lalolagi mai mea katoa a te Atua ne faite. Mafaufau la, i tafa o te fia o paneta kolā e se iloa kae e aofia i fakaputugā fetu, ne faite ne Ieova te lalolagi e se mo ‵nofo fua i ei a tino, kae ke fai mo koga gali kae taulekaleka, kae e pelā foki me se fale e puipuigina i ei ana tino ola kolā ne faite! (Isa. 45:18) E fakaasi mai i te mea tenei a te lasi o te alofa o Ieova mō tatou.—Faitau te Iopu 38:4, 7; Salamo 8:3-5.

7. E lavea atu pefea te alofa tonu o te Atua i te auala ne faite ei ne ia tatou?

7 E tiga eiloa ne faite ne Ieova se koga gali mō tatou, e iloa ne ia me ko te mea ke fia‵fia kae lotoma‵lie tatou, e uke a mea e manakogina ne tatou i lō a koloa faka-te-foitino. E maua eiloa ne se tamaliki a te puipuiga tonu māfai e lavea ne ia te a‵lofa mo te ‵saga tonu atu o ana mātua. Ne faite ne Ieova a tino ki tena fakatusa, kae tuku atu ki a latou a te atamai faka-te-agaga ke mafai o mafau‵fau kae  toe fakaasi atu ne latou ki a ia te alofa mo te atafai. (Kene. 1:27) E se gata i ei, ne fai mai a Iesu: “E fia‵fia a latou kolā e iloa ‵lei ne latou olotou manakoga faka-te-agaga.” (Mata. 5:3) E pelā me se tamana alofa, e “tuku mai ne [Ieova] ki a tatou a mea katoa ke fia‵fia ei tatou,” i te feitu faka-te-foitino mo te feitu faka-te-agaga.—1 Timo. 6:17; Sala. 145:16.

E ALOFA A IEOVA O AKOAKO TATOU KI TE MUNATONU

8. Kaia e manakogina ei ne tatou te alofa o “te Atua fakamaoni” io me ko te Atua o te munatonu?

8 E a‵lofa eiloa a tamana ki olotou tama‵liki kae e ma‵nako o puipui latou ke mo a ma takitaki‵se io me fakaloiloigina. E ui i ei, a te tokoukega o mātua e se mafai o tuku atu ne latou ki olotou tama‵liki a takitakiga ‵tonu me se talia foki ne latou a fakatakitakiga i te Muna a te Atua. Tela la, e iku atu faeloa te mea tenā ki te ‵numi mo te fanoanoa. (Faata. 14:12) I te suā feitu, a Ieova ko te “Atua fakamaoni” io me ko te Atua o te munatonu. (Sala. 31:5) A ia e alofa ki ana tamaliki kae fiafia ke fakamaina atu te munatonu ke takitaki ei latou i vaega kese‵kese o te olaga, maise loa i te tapuakiga. (Faitau te Salamo 43:3.) Se a te munatonu ne fakaasi mai ne Ieova, kae i te auala fea e fakaasi mai ei i te mea tenei a tena alofa mō tatou?

E fakaakoako eiloa a tamana Kelisiano ki a Ieova mai te akoako atu a olotou tama‵liki ki te munatonu kae fesoasoani atu ki a latou ke maua se fesokotakiga ‵lei mo te lotou Tamana faka-te-lagi (Ke onoono ki te palakalafa e 8-10)

9, 10. E fakaasi mai pefea ne Ieova tena alofa mai te fakaasimaiga o te munatonu (a) e uiga ki a ia? (e) e uiga ki a tatou?

9 A te mea muamua, e fakaasi mai ne Ieova a te munatonu e uiga ki a ia eiloa. E fakaasi mai ne ia tena igoa totino, telā e sae fakafia mai i te Tusi Tapu i lō nisi igoa aka. I te auala tenei, e fakapilipili mai a Ieova ki a tatou, mai te faiga ke iloa ne tatou a ia. (Iako. 4:8) E fakaasi mai foki ne Ieova me ko ia se vaegā Atua pefea e pelā foki mo ana uiga totino. E tiga eiloa e fakamaoni mai ne mea i te lagi mo te lalolagi a tena malosi mo tena poto, e fakaasi mai foki ne Ieova e auala i te Tusi Tapu a tena fai mea tonu kae maise loa te lasi o tena alofa. (Loma 1:20) E fai a ia e pelā me se tamana telā e se gata fua i te malosi mo te poto, e alofa kae fai mea tonu, kae fai ei ke faigofie mō ana tama‵liki ke maua ne latou se fesokotakiga ‵pili mo ia.

10 Ke maua ne tatou mea aoga, e fakaasi mai foki ne Ieova te munatonu ki a tatou, telā ko ‵tou tulaga i ana fuafuaga katoa. E fakaopoopo atu loa te mea tenei ki te filemu mo te tokagamalie o tena kaukāiga i te lagi mo te lalolagi kātoa. E tauloto ne tatou mai te Tusi Tapu me ne seki faite a tino mō te saolotoga ke pule atu loa ki a latou, io me ke tu tokotasi mai te Atua, kae ka maua a ikuga fakafanoa‵noa māfai e se talia ne latou te munatonu tāua tenei. (Iele. 10:23) E tāua ‵ki eiloa te mea tenei ki te ‵tou ola ‵lei. E mafai eiloa o maua ne tatou te filemu mo te ‵kau fakatasi māfai fua e talia ne tatou te pulega a te Atua. Ko oko eiloa i te alofa o Ieova me ne manako a ia ke fakaasi mai a te munatonu tāua tenei!

11. Se a te folafolaga a Ieova e fakaasi mai ei tena alofa mo tena manavase ki a tatou?

11 A te tamana alofa e manavase malosi ki se olaga ‵lei mō ana tama‵liki i aso mai mua, mai te manako ke maua ne latou se fakamoemoega aoga kae gali i te olaga. Se mea fakafanoanoa me e se malama‵lama a te tokoukega o tino i mea e uiga ki aso mai mua, io me e fakamāumāu eiloa olotou olaga ki te kausaki atu ki fakamoemoega kolā e aoga fua mo se taimi toetoe. (Sala. 90:10) E pelā me ne tama‵liki a te Atua, e fia‵fia tonu eiloa tatou me ko oti ne folafola mai ne Ieova se olaga gali mō tatou i aso mai mua. E tuku mai ne te mea tenei se olaga aoga kae mautinoa.

E FAKATONUTONU KAE POLOPOLOKI NE IEOVA ANA TAMA‵LIKI

12. Ne fakaasi atu pefea ne Ieova tena alofa mo tena manavase e auala i ana pati fakatonutonu mo fakatakitakiga ki a Kaino mo Paluka?

12 “Ai a e ita ei koe? Ai a e mata kaitaua ei koe? Moi ne fai ne koe te mea tonu, e penei a koe e mata katakata . . . e fia pule ne ia koe,  kae ‵tau mo koe o fakatakavale.” (Kene. 4:6, 7) Ne tuku atu eiloa a pati fakatonutonu konā fakatasi mo se fakatakitakiga aoga. Ne fakailoa atu ne Ieova ki a Kaino a te mea tenā i te taimi ne lavea atu ei me ko tu atu a Kaino i se tulaga fakamataku. Se mea fakanoanoa me ne seki fakalogo a Kaino ki te faka‵pulaga tenā kae ne logo‵mae eiloa i ei. (Kene. 4:11-13) I te taimi ne fi‵ta kae sē fiafia a te failautusi a Ielemia ko Paluka, ne tuku atu ne Ieova ki a ia a pati fakatonutonu ke fesoasoani ki ei ke lavea ne ia te pogai o te fakalavelave. E se pelā mo Kaino, ne talia ne Paluka a pati fakatonutonu a Ieova, kae ne sao ei tena ola.—Iele. 45:2-5.

13. Kaia ne talia ei ne Ieova ke fakafesagai ana tavini fakamaoni mo fakalavelave?

13 Ne tusi mai a Paulo, penei: “Me e polopoloki ne Ieova a te tino telā e alofa a ia ki ei. E tonu, e fakasala ne ia a te tino telā ko oti ne fai ne ia mo fai tena tama.” (Epe. 12:6) E ui i ei, a polopolokiga e se fakauiga fua ki te faiga o fakasalaga. E uke atu a mea e aofia i ei. E uke a fakaakoakoga i te Tusi Tapu o tavini fakamaoni kolā ne fakafesagai atu ki tulaga faiga‵ta kolā ne mafai o aofia i ei a polopolokiga mo akoakoga aoga ki a latou. Mafaufau la ki a Iosefa, Mose mo Tavita. Ne aofia katoa a fakamatalaga e uiga ki olotou olaga mo mea ne fai ne latou i te Tusi Tapu. A te faitau ki te auala ne fakatasi atu ei a Ieova ki a latou i olotou fakalavelave pelā foki mo te auala ne fakaaoga malosi ei ne ia latou, e fai ei ke lavea ne tatou a te lasi o te atafai mo te alofa o Ieova mō ana tavini.—Faitau te Faataoto 3:11, 12.

14. E mafai pefea o lavea ne tatou te alofa o Ieova māfai e polopoloki tatou ne ia?

14 A polopolokiga mai i a Ieova e fesoasoani mai ei ke lavea ne tatou a te suā uiga o tena alofa. Kafai ko polopoloki ne Ieova a latou kolā e fai mea ‵se kae fakaasi atu te loto  sala‵mo, e “vave fakamagalo ne ia a agasala a tino.” (Isa. 55:7) Se a te mea e fakauiga ki ei? Ne tuku atu ne Tavita se fakamatalaga fakaotia loto e uiga ki te alofa fakamagalo o Ieova e auala i ana pati konei: “E fakamagalo ne ia aku agasala katoa, kae faka‵lei foki ne ia oku masaki katoa. E fakasao ne ia au mai te tanuga, e fakamanuia foki ne ia au ki tena alofa mo tena alofa ‵nau. E pelā mo te ‵mao o te saegala mo te togala, e penā foki te faka‵mao ne ia o‵tou agasala mai i a tatou.” (Sala. 103:3, 4, 12) Ke na ‵saga fakavave atu tatou ki pati fakatonutonu mo polopolokiga a Ieova, ke lavea ei ne tatou te lasi o te alofa o Ieova mō tatou katoa.—Sala. 30:5.

E TAUSI KAE PUIPUI NE IEOVA TATOU

15. Se a te mea e fakaasi mai me i tino o Ieova e tāua ki a ia?

15 E mautinoa eiloa me i te mea muamua e fai ne se tamana alofa, ko te tausi mo te puipuiga o tena kāiga mai so se tulaga fakamataku ‵ki. E sili atu te mea e fai ne te ‵tou Tamana faka-te-lagi ko Ieova. E uiga ki a Ieova, e fai mai te faisalamo, penei: “Kae ‵pui ne ia a ola o ana tino, e faka‵sao ne ia latou mai te malosi o tino amio ma‵sei.” (Sala. 97:10) Mafaufau la ki se fakaakoakoga. E tāua ‵ki eiloa ou mata ki a koe! E penā foki a lagonaga o Ieova e uiga ki ana tino. (Faitau te Sakalia 2:8, NW) Ko oko eiloa i te fakatāua ne te Atua ana tino!

16, 17. Fakamatala mai a auala ne tausi kae puipui ei ne Ieova ana tino, ke oko mai foki loa ki ‵tou aso nei.

16 E puipui eiloa ne Ieova ana tino e auala i ana agelu. (Sala. 91:11) Ne fakasao ne se agelu e tokotasi a Ielusalema mai te kautau Asulia, kae ne tamate ne ia te toko 185,000 sotia i te po e tasi. (2 Tupu 19:35) Ne faka‵sao eiloa a te apositolo ko Petelu mo Paulo ne se agelu mai loto i te falepuipui. (Galu. 5:18-20; 12:6-11) I ‵tou aso nei, e se mafai o toetoe te lima o Ieova. Ne lipoti mai ne se sui mai te laumua telā ne asi atu ki se ofisa lagolago i Afelika me ne fakamasei ne kinauga politiki mo mea fakalotu a te fenua. Ne ‵fonu te fenua i tino e kai‵soa, pukemālō, kae tatino. E ui i ei, ne seai loa se taina io me se tuagane ne galo atu tena ola, faitalia loa me ne ‵galo atu a kope katoa o te tokoukega o latou. I te taimi ne ‵sili atu ei me ne mafai pefea o fakafesagai atu latou ki mea konā, ne fakamisikata mai latou katoa kae tali mai: “E ‵lei a mea katoa, ke fakafetai atu ki a Ieova!” Ne lavea tonu ne latou a te alofa o te Atua mō latou.

17 Ne talia ne Ieova i nisi taimi ke tamate ne fili a tino fakamaoni e pelā mo Setefano. Kae e ui i ei, e puipui eiloa ne te Atua ana tino katoa mai te tuku atu ki a latou a faka‵pulaga i te taimi tonu e uiga ki auala ma‵sei o Satani. (Efe. 6:10-12) E auala i tena Muna mo tusi faka-te-Tusi Tapu mai te fakapotopotoga saukātoa, ne fesoasoani mai a mea konā ke mafai o lavea ne tatou akoakoga tonu e uiga ki te koloa fakaloiloi o te lalolagi, amioga ma‵sei mo fakafiafiaga fakasaua, te fakaogaga ‵se o te itaneti, mo nisi mea aka. E manino ‵lei, me e pelā me se Tamana alofa, e onoono mai eiloa a Ieova ki te ‵lei mo te saogalemu o ana tino.

SE TAULIAGA TĀUA

18. E pefea ou lagonaga e uiga ki te alofa o Ieova mō koe?

18 A te mafaufau faka‵lei ki nāi auala tāua e fakaasi mai ei ne Ieova tena alofa mō tatou, ka fai eiloa pelā mo mea ne fai ne Mose. Mai te mafaufau ‵loto ki te leva o te taimi ne tavini atu ei a ia ki a Ieova, ne fai mai a Mose: “Faka‵fonu ake matou ki tou alofa tumau i taeao takitasi, ko te mea ke usu pese matou mo te fia‵fia i aso katoa o omotou olaga.” (Sala. 90:14) Ke malama‵lama kae lavea ‵lei ne tatou te alofa o Ieova mō tatou, se tasi o tauliaga mo fakamanuiaga tāua e mafai o maua ne tatou i aso nei. E pelā mo te apositolo ko Ioane, e gasue‵sue eiloa tatou o fai atu, penei: “Onoono la ki te vaegā alofa telā ne tuku mai ne te Tamana ki a tatou!”—1 Ioa. 3:1.