Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Setema 2015

E Fakaasi Atu Pefea me e A‵lofa Tatou ki a Ieova?

E Fakaasi Atu Pefea me e A‵lofa Tatou ki a Ieova?

“E a‵lofa tatou, me ne alofa muamua mai a ia ki a tatou.”1 IOA. 4:19.

PESE: 56, 138

1, 2. E ‵tusa mo pati a te apositolo ko Ioane, ne fakaasi mai pefea ne te Atua ki a tatou a te auala ke a‵lofa ki a ia?

SE MEA masani ke talia te manatu me i te ‵toe auala ‵lei ke akoako ne se tamana a ana tama‵liki ko ana fakaakoakoga ‵lei. Ne tusi mai te apositolo ko Ioane me “e a‵lofa tatou, me ne alofa muamua mai [te Atua] ki a tatou.” (1 Ioa. 4: 19) Tela la, e manino ‵lei me ne tuku mai ne Ieova se fakaakoakoga tāua e pelā me se tamana alofa telā e mafai o fesoasoani mai ke a‵lofa tatou ki a ia.

2 I te auala fea ne “alofa muamua” mai ei te Atua ki a tatou? Ne fai mai te apositolo ko Paulo, penei: “Ne fakaasi mai ne te Atua tena alofa ki a tatou i te taimi koi agasala ei tatou, me ne mate a Keliso mō tatou.” (Loma 5:8) Mai te tukumaiga o te meaalofa sili tenā—te ofomaiga o tena Tama e tokotasi pelā me se togiola mō tino tali‵tonu katoa—ne fakaasi mai ei ne Ieova te uiga tonu o te alofa, mai te kaimalie, te se fakatāua ne ia a ia eiloa, io me ko te loto fiafia o tuku atu ana mea. Ko faifaiga alofa a te Atua e fai ei ke maua ne tatou a mea aoga mai tena alofa kae ke fakaasi atu foki i ei ne tatou a te alofa ki a ia.—1 Ioane 4:10.

3, 4. E ‵tau o fakaasi atu pefea a te ‵tou a‵lofa ki te Atua?

3 A te alofa ko te ‵toe uiga tafasili i te tāua o Ieova, telā la e mafai o malama‵lama tatou i te pogai ne fai atu ei a Iesu ki te tino telā ne fesili atu ki a ia e uiga ki te fakatonuga muamua mai te Atua, penei: “Kae e ‵tau mo koe o alofa ki a Ieova tou Atua mo tou loto kātoa, mo  tou foitino kātoa, mo tou mafaufau kātoa, mo tou malosi kātoa.” (Male. 12:30) Mai pati konei a Iesu, ko iloa i ei ne tatou me i te alofa ki te Atua e aofia i ei a ‵tou loto. Kafai e se a‵lofa tatou ki a Ieova mo ‵tou loto kātoa, ka fakafanoanoa eiloa ki a ia. Kae e ui i ei, e iloa ne tatou me i te alofa ki te Atua e aofia foki i ei a ‵tou foitino kātoa, mafaufau, mo ‵tou malosi. Ko tena uiga, a te alofa tonu ki te Atua e uke atu a mea e aofia i ei i lō a lagonaga masani fua. E se gata i ei, a te alofa ki te Atua e aofia i ei a ‵tou akoakoga i te feitu faka-te-agaga mo te feitu faka-te-foitino. E ‵tusa mo pati a te pelofeta ko Mika, tenā te mea e manako a Ieova mai i a tatou.—Faitau te Mika 6:8.

4 E mafai pefea o fakaasi atu ne tatou me e a‵lofa tonu eiloa tatou ki te ‵tou Tamana faka-te-lagi? E ‵tau o a‵lofa tatou ki a ia mo te loto kātoa. E pelā mo te mea ne fakaasi mai ne Iesu, e ‵tau o aofia katoa i ei a ‵tou akoakoga e uiga ki te feitu faka-te-foitino, mea tau lagonaga, mo te feitufaka-te-agaga. I te mataupu mai mua, ne suke‵suke tatou ki auala e fa kolā ne fakaasi mai ei ne Ieova a tena alofa sili mō ana tamaliki. Ke na suke‵suke nei tatou ki te auala e mafai ei o fakaasi kae faka‵poko a te ‵tou a‵lofa ki a Ieova i auala kolā e talia kae ‵lei ki a ia.

KE LOTO FAKAFETAI KI FAKATOKAGA A IEOVA

5. Se a te auala alofa e mafai o taui atu ne tatou a mea katoa a Ieova ne fai mō tatou?

5 Kafai ne maua ne koe se meaalofa, ne a mea ka fai ne koe? E mautinoa eiloa me ka fakaasi atu ne koe te loto fakafetai i nisi auala. E se gata i ei, ka fakaaoga faka‵lei eiloa ne koe te meaalofa, kae se manatu māmā ki ei. “A meaalofa ‵lei katoatoa e maua katoa mai luga,” ne tusi mai a Iakopo, “e aumai katoa mai te Tamana o mainaga i te lagi, telā e se mafulifuli e pelā mo te ata o se mea e gasuesue.” (Iako. 1:17) E se mafai eiloa o fakatamala a Ieova i te tukumaiga o mea e manakogina ne tatou ke mafai ei tatou o ola fia‵fia. E mata, e se fai ne te mea tenā ke gasue‵sue tatou o fakaasi atu te alofa ki a ia?

6. Ne a mea ne fai ne te kau Isalaelu ke tumau i te maua faeloa ne latou a fakamanuiaga a Ieova?

6 Ne ola eiloa a tino Isalaelu mai lalo i te tausiga alofa a Ieova mō se fia selau tausaga kae ne fakamanuia ne ia latou, i te feitu faka-te-foitino mo te feitu faka-te-agaga. (Teu. 4:7, 8) A te pogai ne maua ei ne latou a vaegā fakamanuiaga penā, ne faka‵na loa ki te faka‵logo o latou ki te Tulafono a te Atua, telā ne aofia i ei a te tuku atu faeloa ki a Ieova a ‘toe fuataga o saito ‵lei’ mai te laukele. (Eso. 23:19) Tela la, ne mafai o fakaasi atu ne tino Isalaelu me ne seki manatu mā‵ma latou ki te alofa o Ieova pelā foki a fakamanuiaga.—Faitau te Teutelonome 8:7-11.

7. E mafai pefea o fakaaoga ne tatou a ‵tou kope “tafasili i te ‵lei” ke fakaasi atu ei te ‵tou a‵lofa ki a Ieova?

7 Kae a tatou? E tiga loa ko se manakogina ke ofo atu ne tatou a taulaga i aso nei, se mea ‵tau ke fakaasi atu ne tatou a te ‵tou a‵lofa ki te Atua mai te fakaaloalo ki a ia e auala i te tuku atu o ‵tou kope “tafasili i te ‵lei.” (Faata. 3:9) Ne a nisi auala e mafai ne tatou o fai penā? E manino ‵lei, me e mafai o fakaaoga ‵tou kope faka-te-foitino ke ‵lago atu ki te galuega talai o te Malo i ‵tou fakapotopotoga pelā foki mo te lalolagi kātoa. E mautinoa eiloa me i te mea tenei se auala ‵lei ke fakaasi atu te ‵tou a‵lofa ki a Ieova, faitalia me e uke io me mu‵tana ‵tou kope faka-te-foitino. (2 Koli. 8:12) E ui i ei, e uke aka foki a nisi auala ke fakaasi atu te ‵tou a‵lofa ki a Ieova.

8, 9. E pefea te sokoga i te vā o te tali‵tonu ki folafolaga a Ieova mo te ‵tou a‵lofa ki a ia? Fakamatala mai.

8 Mafaufau la ki te fakamasauaga a Iesu ki ana soko ke mo a ma manava‵se ki mea‵kai mo gatu kae ke tumau i te ‵sala muamua te Malo. Ne fai atu a ia me e iloa ‵lei ne te Tamana a mea e ma‵nako tatou ki ei. (Mata. 6:31-33) A te lasi o te tali‵tonu o tatou ki te folafolaga tenei se fakaasiga o te ‵poko o te ‵tou a‵lofa mō Ieova me e isi eiloa se sokoga o te alofa ki te  talitonu. E se mafai o fakaasi atu ne tatou te alofa tonu ki se tino telā e se tali‵tonu tatou ki ei. (Sala. 143:8) Tela la, e mafai o ‵sili ifo tatou, penei: ‘E mata, e fakaata mai ne te fakamoemoega telā e kausaki au ki ei mo te auala e ola ei au, me e alofa tonu au ki a Ieova? E mata, e fakaasi atu ne au i aku faifaiga i aso takitasi me e talitonu au me e mafai o tausi mai ne ia au?’

9 Ne fakaasi mai ne se Kelisiano e igoa ki a Mike a te vaegā alofa mo te talitonu penā. I te taimi koi foliki ei a ia, ne kamata o ati aka ne Mike se manakoga malosi ke tavini atu ki te Atua i se fenua fakaa‵tea. Ne avaga a ia kae e tokolua ana tamaliki, kae ne seki matafitafi atu eiloa tena manakoga tenā. Ne fakaiku aka ne Mike mo tena kāiga ke fakafaigofie olotou olaga ona ko fakamalosiga ne maua mai mataupu mo lipoti e uke e uiga ki te tavini atu i koga kolā e lasi te manakoga i ei. Ne ‵togi ne latou a te lotou fale ki tua kae olo atu ki se fale ‵togi. Mai konā, ne tai fakafoliki ne ia tena pisinisi ‵teu kae ‵fulu fale kae ne maua ne ia se auala ke fakagalue aka ei tena pisinisi mai fenua i tua e auala i te itaneti. Ne olo atu eiloa tena kāiga ki te suā fenua o fakataunu te lotou manakoga, kae mai tua o se lua tausaga ne ga‵lue ei latou mo te fia‵fia i konā, ne fai mai a Mike, penei: “Ko lavea nei ne matou a te ‵tonu o pati a Iesu kolā ne fakamau i te Mataio 6:33.”

KE PUKE ‵MAU KI TE MUNATONU MAI TE ATUA

10. E pelā mo lagonaga kolā ne fakaasi mai ne te tupu ko Tavita, e aoga pefea ki a tatou a te mafaufau ‵loto ki te munatonu e uiga ki a Ieova?

10 I se 3,000 tausaga ko ‵teka, ne otia eiloa a te tupu ko Tavita i te kilo atu ki luga i mea fakaofoofogia i te lagi. Ne tusi mai a ia: “E matea i te lagi te ‵malu o te Atua! E fakaasi tonu mai foki i ei ana mea ne fai!” E se gata i ei, ne otia foki a ia i te poto o te Atua i ana Tulafono, me ne fai mai a ia, penei: “E tonu katoatoa te tulafono a te Aliki, e maua mai i ei te malosi fou. A fakatonuga foki a te Aliki e fakatuagagina, e aumai ne ia te poto ki a latou kolā e va‵lea.” Se a te ikuga o te vaegā loto fakafetai penā? Ne toe fai mai a Tavita: “Te Aliki, toku ‵lafiga mo toku fakaolataga, ke talia mai ne koe aku muna mo oku mafaufauga!” E manino ‵lei, me ne kamata o tupu aka se fesokotakiga alofa kae ‵pili i te vā o Tavita mo tena Atua.Sala. 19:1, 7, 14.

11. Ke fakaasi atu te alofa ki te Atua, e mafai pefea o fakaaoga ne tatou te iloaga e uiga ki te munatonu telā ne tuku mai ne ia ki a tatou i aso nei? (Ke onoono ki te ata i te kamataga.)

11 I aso nei, ne fakamanuiagina tatou ki iloaga e uke e uiga ki mea a Ieova ne faite mo te fakataunuga o tena fuafuaga. E fakamalosi aka ne te lalolagi a akoakoga ma‵luga. Kae e fakaasi mai i mea ne ‵tupu ki tino e tokouke me i te kausaki atu ki vaegā mea penā e iku atu faeloa ki te galo atu o te fakatuanaki mo te alofa ki te Atua. E ui i ei, e fakamalosi mai te Tusi Tapu ke se lava fua i te mauaga o te iloaga kae e ‵tau o ‵sala atu foki ki te poto mo te malamalama. E fakauiga i ei ki te tauloto o te auala e fakaaoga ei a te iloaga telā ne tuku mai ne te Atua ko te mea ke mafai o aoga ki a tatou pelā foki ki nisi tino. (Faata. 4:5-7) A te Atua e “loto ke faka‵sao a tino katoa kae ke iloa tonu ne latou a te munatonu.” (1 Timo. 2:4) E fakaasi atu ne tatou te alofa ki a Ieova māfai e tuku ‵tonu ‵tou loto ki te folafolaatuga o te tala ‵lei o te Malo kae fesoasoani atu ki tino ke malama‵lama i te fuafuaga sili a te Atua mō tino katoa.Faitau te Salamo 66:16, 17.

12. Ne fakaasi mai pefea ne se talavou a tena loto fakafetai mō mea‵kai faka-te-agaga ne maua mai i a Ieova?

12 E mafai foki ne talavou o fakaasi atu te lotou a‵lofa mō Ieova mai te loto fakafetai ki mea‵kai faka-te-agaga e maua ne latou. E fai mai a Shannon me i te taimi ko 11 ei ana tausaga, ne ‵kau atu lāua mo tena taina telā ko sefulu ana tausaga mo lā mātua ki te fono o te Atufenua ko te “Godly Devotion.” I te vaega e tasi, ne fakamolemole atu loa ki talavou ke saga‵saga fakatasi i se koga telā ko oti ne fakatoka mō latou. Ne mā tou fafine, kae ne fakamalosi loa a ia o fano. Kae ko oko loa i ana fiafia i te taimi ne tufa atu ki talavou taki  tokotasi te tusi ko te Question Young People Ask—Answers That Work. E pefea a lagonaga o Shannon e uiga ki a Ieova te Atua? E fai mai tou fafine, penei: “Ne fatoa iloa aka ei ne au me i a Ieova se tino tonu kae e alofa malosi ‵ki mai a ia ki a au.” E toe fai mai a Shannon: “Ko oko eiloa i toku fiafia me i te ‵tou Atua sili ko Ieova, e tuku mai ne ia te meaalofa gali kae ‵lei katoatoa tenei e aunoa mo se ‵togi!”

KE TALIA A PATI FAKATONUTONU MO POLOPOLOKIGA MAI TE ATUA

13, 14. E fakaasi atu pefea ‵tou a‵lofa ki a Ieova mai te auala e ‵kilo atu ei tatou ki pati fakatonutonu mai i a ia?

13 E fakamasaua mai te Tusi Tapu, penei: “A te Aliki e fakatonu ne ia a mea ‵se a latou kolā e alofa a ia ki ei, e pelā me se tamana e fakatonu ne ia tena tama tagata telā e fakamatamata a ia ki ei.” (Faata. 3:12) Kae e ‵tau o ‵saga atu pefea tatou ki ei? Ne fai ‵tonu mai eiloa te apositolo ko Paulo i te taimi ne tusi mai a ia, penei: “E seai se polopolokiga e foliga mai me e fakafiafia i te vaitaimi tenei, kae e fakalogo‵mae mai fua.” Mai i ana pati konā, ne seki manatu māmā a Paulo ki te tāua io me ko te aoga o polopolokiga, me ne toe fai mai a ia: “Kae fakamuli loa ka ‵fua mai i ei a fuataga o te filemu mo te amiotonu i a latou kolā ne akoakogina e auala i ei.” (Epe. 12:11) Kafai e a‵lofa tatou ki a Ieova, e ‵tau o fakaeteete tatou mai te manatu mā‵ma io me kaitaua ki ana pati fakatonutonu. E mafai o faigata ki nisi tino ke fai penā, kae ko te ‵tou a‵lofa ki te Atua ka fesoasoani mai ei ke fai ne tatou te mea tenā.

14 I aso o Malaki, ne seki talia ne tino Iutaia e tokouke a pati fakatonutonu a te Atua. Ne iloa ‵lei ne latou te Tulafono e uiga ki te ofoatuga o taulaga kae ne fakamasiasi ne latou a ia ko ala ei o fakatonutonu malosi latou ne Ieova. (Faitau te Malaki 1:12, 13.) E pefea te matagā o te tulaga tenā? Fakalogologo la ki pati a Ieova: “Ka fakamalaia ne au a mea kolā e maua ne koutou mō tausi otou olaga. A te tonuga, ko leva eiloa ne fakamalaia ne au a mea konā, me i a koutou seki ‵saga tonu o tausi aku fakatonuga.” (Mala. 2:1, 2) E manino ‵lei, me kafai e tumau faeloa i te se talia ne tatou a pati fakatonutonu a‵lofa a Ieova, e mafai eiloa o maua ne tatou a ikuga matagā mai i ei.

Ke tau‵tali ki pati fakatonutonu a te Atua i lō a manakoga o te lalolagi (Ke onoono ki te palakalafa 15)

15. I te lalolagi i aso nei, se a te uiga lauiloa telā e ‵tau o fakaeteete tatou i ei?

 15 I se lalolagi telā e ‵fonu i tino fakamata‵mata, e sē se mea faigofie ke fai‵pati e uiga ki pati fakatonutonu mo polopolokiga, kae se talia ne tatou. A latou foki kolā e foliga mai me talia ne latou a pati fakatonutonu io me ko polopolokiga e talia fitoi fua ne latou. E ui i ei, ne fakatonu mai ki Kelisiano “ke se toe fakaakoako ki te olaga masani tenei.” E ‵tau o lavea kae tau‵tali tatou ki te “loto o te Atua telā . . . e ‵lei katoatoa.” (Loma 12:2) E auala i tena fakapotopotoga, e tuku mai ne Ieova i te taimi tonu a pati fakatonutonu e uiga ki feitu e uke o te olaga—‵tou faifaiga ki tino, ‵tou taugasoa, e pelā foki mo fakafiafiaga. Mai te talia mo te loto kātoa kae fakagalue a vaegā takitakiga penā, e fakaasi atu ei ne tatou me e loto fakafetai kae a‵lofa tonu tatou mo te loto kātoa ki a Ieova.Ioa. 14:31; Loma 6:17.

‵SALA ATU KI TE PUIPUIGA MO TE FAKA‵SAOGA MAI I A IEOVA

16, 17. (a) Kaia e ‵tau o mafau‵fau tatou ki te loto o Ieova māfai ko fai ‵tou fakaikuga? (e)  Ne fakaasi atu pefea ne tino Isalaelu a te se lava o te alofa mo te loto tali‵tonu ki a Ieova?

16 Kafai ko lavea ne tama‵liki se mea fakamataku, se lagonaga masani eiloa ke ‵tele atu latou ki olotou mātua. Kafai ko ga‵solo aka a tama‵liki o ma‵tua, e tauloto eiloa latou ke fakalagolago malosi ki olotou iloaga kae fai a fakaikuga totino e uiga ki ei. A te mea tenā se vaega o te fai pelā me se tino matua. E ui i ei, a latou kolā e ‵pili ki olotou mātua e loto fia‵fia eiloa o ‵sala atu ki manatu o olotou mātua a koi tuai o fai olotou fakaikuga. E penā foki i te feitu faka-te-agaga. Ko oti ne tuku mai ne Ieova tena agaga, ke fakamalosi i loto i a tatou a te “fiafia mo te ‵mana ke ga‵lue.” Kae e mafai o lavea atu a te se lava o te alofa mo te talitonui māfai e fai ‵tou fakaikuga e aunoa mo temafau‵fau ki te loto o te Atua.Fili. 2:13.

17 I taimi o Samuelu, ne fakatakavale masei eiloa a Isalaelu ne te kau Filisitia. Ne manakogina malosi ne tino o te Atua a te fesoasoani mo te puipuiga. Ne a mea ne fai ne latou? Ne fai te lotou fakaikuga penei, “Tatou ka olo o aumai te Pusa o te Feagaiga a te Aliki mai Sailo, ko te mea ke vau te Aliki i a tatou o faka‵sao tatou mai o‵tou fili.” Se a te ikuga? “Ko oko eiloa te ‵tāga a te kau Filisitia i te kau Isalaelu: e tusa mo te tolusefulu afe sotia Isalaelu ne ‵mate. Ne puke ne te kau Filisitia a te Pusa o te Feagaiga.” (1 Samu. 4:2-4, 10, 11) Ne foliga mai me mai te tauave ne latou a te Pusa o te Feagaiga, ne ma‵nako te kau Isalaelu ki te fesoasoani o Ieova. Kae e ui i ei, ne seki ‵sala atu latou ki te takitakiga a Ieova; ne tau‵tali eiloa latou i olotou manatu totino, kae ne fakafanoanoa eiloa te ikuga ne maua latou.Faitau te Faataoto 14:12.

18. E ‵tau o pefea ‵tou lagonaga e uiga ki te ‵saga atu ki a Ieova mō se fesoasoani?

18 Ne fakaasi mai ne te faisalamo a te uiga loto ‵lei i te taimi ne tusi mai ei a ia penei: “Ka tuku atu toku fakamoemoega ki te Atua, kae ka toe ‵viki atu foki au ki a ia. Toku fakaola mo toku Atua. E fatifati toku loto i te koga tenei e fakapagota ei matou, telā ne fakasaga ei oku mafaufauga ki a ia.” (Sala. 42:5, 6) Ko oko eiloa i te ‵poko o ana lagoanga alofa mō Ieova! E mata, ko oti ne ati aka ne koe se vaegā alofa penā kae fakalagolago ki te ‵tou Tamana faka-te-lagi? Kafai tau tali ko te ao, ka mafai eiloa o momea aka tou fakalagolago ki a ia e pelā eiloa mo pati a te Tusi Tapu ki a tatou, penei: “Talitonu ki te Aliki [Ieova] mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki [Ieova] i au mea katoa e fai, kae ka fakaasi atu ne ia ki a koe te auala tonu.”Faata. 3:5, 6.

19. I auala fea e fakaasi atu ei tou alofa ki a Ieova?

19 Ne fakaasi mai ne Ieova te auala ke a‵lofa tatou ki a ia, mai te fakaasimaiga ne ia o te alofa i te taimi muamua. Ke masaua faeloa ne tatou a te fakaakoakoga tu ‵kese tenā. Kae ke na momea aka te fakaasi atu ne tatou te ‵tou a‵lofa ki a ia mo ‘‵tou loto kātoa, mo ‵tou foitino kātoa, mo ‵tou mafaufau kātoa, mo ‵tou malosi kātoa.’Male. 12:30.