Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2015

Mea Kolā e Mafai o Tauloto ne Tatou Mai i a Ioana

Mea Kolā e Mafai o Tauloto ne Tatou Mai i a Ioana

E ILOA ne tino e tokouke me e toko 12 a apositolo a Iesu. Kae e mafai o se iloa ne latou me ne aofia foki i ana soko a fāfine kolā ne ‵pili te lotou fesokotakiga mo ia. A Ioana se tokotasi o fafine konā.—Mata. 27:55; Luka 8:3.

Se a te tusaga ne fai ne Ioana i te galuega talai i taimi o Iesu, kae se a te mea e mafai o tauloto ne tatou mai tena fakaakoakoga?

KO OI A IOANA?

A Ioana ko te “avaga a Kusa, te tino pule a Helota.” A Kusa ko te situati o ofisa pule a Helota Anitipa. A ko Ioana se tokotasi o fafine kolā ne faka‵lei ne Iesu olotou ma‵saki. Ne olo a Ioana mo nisi fafine fakatasi mo Iesu mo ana apositolo.—Luka 8:1-3.

Ne akoako atu a faiakoga o te lotu Iutaia me e se ‵tau mo fafine o fakatasitasi mo tagata kolā e se kāiga mo latou, kae se ‵tau foki o olo fakatasi mo latou. E tonu, e ‵kilo fatauva atu a tagata Iutaia ki fafine. Mai te fakaseaoga ne ia a vaegā tuu konā, ne talia ne Iesu ke olo fakatasi latou mo Ioana mo nisi fafine tali‵tonu.

Ne seki fia saga atu a Ioana ki mea konā, kae ne olo fakatasi a ia mo Iesu mo ana apositolo. Ne ‵tau o fai katoa latou kolā e faima‵laga fakatasi mo tou tagata a fakama‵fuliga i olotou olaga. E ui i ei, ne fai mai a Iesu e uiga ki soko konā, penei: “A toku mātua mo oku taina ko latou konei e lagona ne latou te muna a te Atua kae e fai ne latou.” (Luka 8:19-21; 18:28-30) E mata, e se fakamalosi atu a te iloa ne koe me e fakapilipili atu eiloa a Iesu ki tino kolā e tiaki ne latou so se mea ke tau‵tali atu i a ia?

NE FAKAAOGA NE IA ANA KOPE KE TAVINI ATU

Ne fakaaoga ne Ioana mo nisi fafine e tokouke a “olotou kope” ke tavini atu ki a Iesu mo te toko sefulu lua. (Luka 8:3) “E seki fakamatala atu ne Luka ki ana tino fai‵tau me ne kūka ne fafine a mea‵kai, ‵fulu a tifa, io me ‵sui olotou gatu,” ko pati a se tino tusitala tokotasi. “Kāti ne fai ne latou a mea konā . . . , kae e se konā a pati ne fai mai ne Luka.” E ui i ei, ne tuku atu eiloa ne fafine konei a olotou tupe mo kope ki tino kolā ne olo fakatasi latou.

E seki ai eiloa se tino i a Iesu mo ana apositolo ne maua sena galuega ‵togi i te taimi ne fai ei olotou malaga talai. Tela la, e seai eiloa ne olotou tupe mo ‵togi olotou mea‵kai io me ko nisi mea kolā e manakogina ne se potukau e aofia i ei a tino e toko 20. E tiga eiloa ne talimālō faka‵lei latou, a ko te fakamatalaga me ne aveave ne Keliso mo ana apositolo se “pokisi tupe” e  fakaasi mai i ei me ne seki fakalagolago faeloa ke talimālō faka‵lei latou ne tino. (Ioa. 12:6; 13:28, 29) Ne mafai o fai ne Ioana mo nisi fafine a olotou meaalofa ke fesoasoani atu.

Ne ‵teke ne nisi tino a te manatu me e se ‵tau o maua ne se fafine Iutaia ne tupe. E ui i ei, e fakaasi mai i nisi fakamatalaga me i loto i te kau Iutaia, e mafai eiloa o maua ne se fafine tena vaega i auala kese‵kese: (1) tena tofi māfai ko mate tena tamana kae seai ne ana tamaliki tagata, (2) se kope telā e tuku atu ki a ia, (3) se feagaiga e uiga ki mea tau tupe māfai ko ‵tala te avaga, (4) se aofaki tupe telā e ‵kati mai te vaega o tena avaga telā ko mate, io me (5) se peofuga e maua ne ia.

E seai se fakalotolotolua me ne fakatau fesoasoani a soko o Iesu ki mea e mafai o maua ne latou. Ne mafai o aofia ne soko o Iesu a fafine mau‵mea. Ona ko Ioana ko te avaga a te situati a Helota, ne fakaiku aka ne nisi tino me i a ia e maumea. Ne mafai eiloa ne tino e pelā mo tou fafine o ‵togi ne ia se gatu ‵loa seai ne sokoga i ei telā ne pei ne Iesu. Ne fai mai se tino tusitala e tokotasi me i te gatu tenei se mea telā e “e se mafai ne avaga a tāgata faiika o ‵togi.”—Ioa. 19:23, 24.

E se fakamatala tonu mai i te Tusi Tapu me ne fai ne Ioana a meaalofa tupe. E ui i ei, ne fai eiloa ne ia te ‵toe mea ne mafai ne ia o fai, kae maua i ei ne tatou akoakoga tāua mai i ei. Faitalia me ne a mea e tuku atu ne tatou ke fakalauefa ei a manakoga o te Malo—io me filifili ne tatou so se mea ke tuku atu—e pule eiloa tatou i ei. A te mea telā e tāua ki te Atua, ko te fiafia e maua ne tatou ke fai te ‵toe mea e mafai ne tatou o fai.—Mata. 6:33; Male. 14:8; 2 Koli. 9:7.

I TE MATE O IESU MO TE TAIMI MAI TUA IFO

Tela la, ne nofo atu loa a Ioana i te taimi ne tamate ei a Iesu, fakatasi mo nisi fafine “kolā ne olo atu faeloa i a ia kae tavini atu ki a ia i tena nofoga i Kalilaia, mo nisi fafine e tokouke kolā ne olo fakatasi mo ia ki Ielusalema.” (Male. 15:41) I te taimi ne ave keatea ei te foitino o Iesu mai te tanuga, “kae ko fafine kolā ne olo atu i a ia mai Kalilaia, ne tau‵tali atu ke onoono latou i te tanuga mo te koga e takato ei tena foitino, kae ne toe ‵foki ei latou o fakatoka a mea fakama‵nogi mo sinu ma‵nogi.” A fafine konei—kolā ne taku ne Luka ko “Malia te Makatala, Ioana, mo Malia te mātua o Iakopo”—ne ‵foki atu mai tua o te sapati kae ne lavea ne latou a agelu kolā ne fai‵pati e uiga ki te toetuga o Iesu.—Luka 23:55–24:10.

Ne fai ne Ioana mo nisi fafine tali‵tonu a mea ne mafai ne latou o fai mō te lotou Aliki

Se mea tonu eiloa me ne aofia a Ioana i soko konei, e aofia ei te mātua mo taina o Iesu, kolā ne maopoopo fakatasi i Ielusalema i te Penitekoso i te 33 T.A. (Galu. 1:12-14) Ona ko tena avaga se tino galue a Helota, ne mafai eiloa o fai atu ne Ioana ki a Luka a fakamatalaga katoa e uiga ki a Helota Anitipa, ona la i a Luka ko te tino tusitala Evagelia fua telā ne fakasae ne ia te igoa o tou fafine.—Luka 8:3; 9:7-9; 23:8-12; 24:10.

E tuku mai i te tala o Ioana ne akoakoga tāua ke mafau‵fau ki ei. Ne tavini atu tou fafine ki a Ieova ki te ‵toe mea e mafai o fai ne ia. Ne ‵tau o fiafia tou fafine me ne fesoasoani atu a ia i mea tau tupe ki a Iesu, ana apositolo e toko sefulu lua, mo nisi soko kolā ne faima‵laga fakatasi mo latou o talai. Ne tavini atu a Ioana ki a Iesu kae ne fakamaoni a tou fafine ki a ia i taimi o fakalavelave. E mafai eiloa o fakaakoako atu a fafine Kelisiano ki te uiga amioatua o te fafine tenei.