Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2015

Ne Ofo Atu a Latou Eiloa mo te Fia‵fia—i Lusia

Ne Ofo Atu a Latou Eiloa mo te Fia‵fia—i Lusia

I TE 1991, ne lasi te fia‵fia o Molimau a Ieova i Lusia i te taimi ne fakasaoloto i ei te lotou galuega telā ne fakatapu mō se taimi leva kae ko talia foki ne te malo. I te taimi tenā, ne nai tino fua ne mafau‵fau me i te aofaki o Molimau ka fanaka ki luga fakasefulu taimi ki se 170,000 i aso nei! E aofia i tino talai ga‵lue malosi o te Malo konei ko Molimau kolā ne au‵mai mai nisi fenua ki Lusia ke fesoasoani ki te ‵katiga o saito faka-te-agaga. (Mata. 9:37, 38) Ka sau‵tala tatou ki nisi o latou.

TAINA LOTO FIA‵FIA KOLĀ NE FESOASOANI KE FAKAMA‵LOSI A FAKAPOTOPOTOGA

I te tausaga telā ne fakasaoloto ei te galuega i Lusia, a Matthew se tino mai i Peletania ko 28 ana tausaga. I se fono o te atufenua telā ne fai i te tausaga tenā, ne faka‵mafa mai i se lāuga a te manakoga ke fesoasoani atu ki fakapotopotoga i Eulopa ki Saegala. E pelā me se fakaakoakoga, ne fakasae aka ne se failauga a te fakapotopotoga i St. Petersburg i Lusia, telā e tokotasi fua te tavini fesoasoani kae seai ne toeaina. Kae nofo ki se selau o akoga faka-te-Tusi Tapu koi fai eiloa ne tino talai! Ne fai mai a Matthew, “I te otiga o te lāuga tenā, ne seki gata toku mafaufau ki Lusia, telā ne ‵talo atu au ki a Ieova kae tuku katoatoa atu toku manakoga ke fanatu au ki konā.” Ne fakatupu ne ia ana sene, ‵togi atu te ukega o ana kope ki tua, kae fanatu ki Lusia i te 1992. Ne a ikuga ne maua ne ia?

Matthew

Ne fai mai a Matthew, “ne fai te ‵gana e pelā me se fakalavelave ki a au kae ne fai ei ke faigata ki a au a sau‵talaga faka-te-agaga.” A te suā fakalavelave foki ko te mauaga o koga ‵nofo. “Ko seiloa ne au te aofaki o taimi ne gasue mai ei au i te suā fale ki te suā fale kae i se taimi toetoe fua ne fakailoa mai ei.” Kae tiga eiloa a fakalavelave konā, ne fai mai a Matthew: “A te fanatu o oku ki Lusia ko te toe fakaikuga ‵lei ne fai ne au.” Ne fai mai a ia: “Ne fai ne te galuega i konei ke iloa ne au o fakalagolago malosi ki a Ieova kae ne lavea foki ne au tena fesoasoani i auala e uke.” Fakamuli ifo, ne fili a Matthew e pelā me se toeaina kae ne fai foki pelā me se paenia fakapito, kae nei la ko galue a ia i te ofisa lagolago e pili atu ki St. Petersburg.

I te 1999, ne oti atu a Hiroo telā ko 25 ana tausaga mai i te Akoga Fakamasani mō Faifeau i Tiapani, kae ne fakamalosi atu se tokotasi o ana faiakoga ki a ia ke fanatu o  galue i se fenua fakaa‵tea. Ne logo a Hiroo i te lasi o te manakoga i Lusia telā ne tauloto ei ne ia te ‵gana Lusia. Ne fai foki ne ia se suā mea tāua. “Ne fanatu au ki Lusia mō se ono masina,” ko ana pati. “Ona ko te tau ‵moko i konā e ‵moko ‵ki, tenā ne fano ei au i a Novema ke onoono aka me mata e mafai ne au o fakafesagai atu ki te ‵moko.” I te taimi ko oti atu ei te tau ‵moko, ne foki a ia ki Tiapani kae ne ola a ia i se olaga faigofie ko te mea ke mafai o ‵teu aka ana sene ke lava ke foki atu a ia ki Lusia—o nofo tumau i ei.

Hiroo mo Svetlana

Ne nofo atu a Hiroo i Lusia mō se 12 tausaga kae ne tavini atu a ia i ne nai fakapotopotoga. I te taimi tenā, ko ia tokotasi fua te toeaina e tausi atu ki tino talai e toko 100. I se fakapotopotoga e tasi, e fai ne ia i vaiaso takitasi a te ukega o vaega i te Fakatasiga mō te Galuega Talai, takitaki foki ne ia te Akoga mō Tino Talai, te Sukesukega ki te Faleleoleo Maluga, penā foki mo Potukau Suke‵suke ki Tusi kolā e fai i potukau kese‵kese e lima. Ne fai sāle foki ne ia a asiga a tausi mamoe. Kafai e ‵toe kilo atu ki tausaga konā, ne fai mai a Hiroo: “Se mea fakafiafia ke mafai o fesoasoani atu ki taina mo tuagane ke gasolo o ma‵losi faka-te-agaga.” Ne pokotia pefea a ia i te tavini atu i koga kolā e lasi te manakoga i ei? Ne fai mai a ia: “Kae koi tuai au o fano ki Lusia, ne tavini atu au e pelā me se toeaina mo se paenia, kae i te taimi ne oko mai ei au ki konei ne maua ne au te lagonaga ke ati aka se fesokotakiga fou mo Ieova. Ne tauloto au ke talitonu ki a Ieova i toku olaga kātoa.” I te 2005, ne avaga a Hiroo mo Svetlana, kae ne tumau i te tavini fakatasi atu o laua e pelā me ne paenia.

Michael mo Olga fakatasi mo Marina mo Matthew

A Matthew telā ko 34 ana tausaga, mo tena taina ko Michael telā ko 28, ne tino mai Canada. Ne olo laua ki Lusia kae ne ofo i te tokouke o tino fia‵fia e ‵kau atu ki fakatasiga kae ne mu‵tana fua a taina ne tausi atu ki ei. Ne fai mai a Matthew: “E toko 200 a tino e ‵kau atu ki te fakapotopotoga telā ne asi atu au ki ei, kae ko fakatasiga katoa ne takitaki ne se toeaina telā ko matua ‵ki mo se tavini fesoasoani telā koi talavou. Ne fai ne te tulaga tenā ke manako au o fanatu o fesoasoani ki taina konā.” I te 2002, ne fanatu ei a ia ki Lusia.

E fa tausaga mai tua ifo, ne fanatu a Michael ki Lusia kae ne lavea ne ia me koi lasi ‵ki loa te manakoga mō taina i konā. E pelā me se tavini fesoasoani, ne ‵tofi a ia ke tausi atu ki mea tau tupe, tusi, mo koga talai. Ne ‵tofi aka foki a ia ke fai a galuega masani kolā e fai ne te failautusi a te fakapotopotoga, ke fai a lāuga mō tino katoa, kae ke fesoasoani foki ki fakatokaga o fono mo te faitega o Fale Tapuaki. Ke oko mai foki loa ki aso nei, koi manakogina ‵ki loa te fesoasoani i te fakapotopotoga. E ui eiloa te faigata ke tausi atu ki tofiga e uke, ne fai mai a Michael telā se toeaina: “A te fesoasoani atu ki taina ne aumai ei te lotomalie katoatoa. Ko te ‵toe auala ‵lei ke fakaaoga ki ei toku olaga!”

I te taimi tenā, ne avaga a Matthew mo Marina a ko Michael mo Olga. A tauavaga konei fakatasi mo nisi tino loto finafinau, ne tumau i te fia‵fia o fesoasoani atu ki fakapotopotoga konei ko gasolo aka ki luga.

NE FESOASOANI ATU A TUAGANE LOTO FINAFINAU KI TE ‵KATIGA O SAITO FAKA-TE-AGAGA

Tatyana

I te 1994, i te taimi ko 16 ei a tausaga o Tatyana, ne oko atu a paenia fakapito e toko ono mai i Czech Republic, Poland, mo Slovakia o ga‵lue i tena fakapotopotoga i Ukraine. Ne masaua ‵lei ne tou fafine te taimi tenā kae ne fai mai a ia: “A latou ne paenia loto finafinau kolā ne uiga faigofie, mata a‵lofa, kae ne iloa ‵lei ne latou te Tusi Tapu.” Ne lavea ne ia te auala ne fakamanuia ne Ieova a te lotou loto fia‵fia o ofo atu a latou, kae ne mafaufau a ia penei, ‘au e manako ke fai pelā mo latou.’

Ona ko fakaakoakoga ‵gali a paenia, ne fakaaoga ne Tatyana ana malologa i te akoga ke olo atu mo nisi tino o talai ki koga ‵mao o Ukraine mo Belarus kolā e seki talai eiloa i ei a Molimau. Ne fiafia malosi a ia ki malaga talai konā kae ne fai foki ana palani ke fakalauefa atu tena talaiga mai te fanatu ki Lusia. I te taimi muamua, ne fanatu a ia o nofo mō se taimi toetoe ke asi atu ki se tuagane telā ne vau mai i te sua fenua kae ke ‵sala foki ki se  galuega ke mafai o fesoasoani atu ki tena galuega paenia. Fakamuli ifo i te tausaga e 2000, ne fanatu a ia ki Lusia. E mata, ne faigata te fakamafuliga tenā?

Ne fai mai a Tatyana: “Ona ko te mea ne seki maua ne au o ‵togi se fale mō oku nofo, telā ne ‵togi fua i ei ne au se potu i se fale ‵nofo o tino. E se faigofie te ‵nofo penā. E isi ne taimi ko fia foki au ki toku fenua tonu. Kae ne fesoasoani mai faeloa a Ieova ke lavea ne au a te aoga mafai e tumau taku taviniga.” Nei la, e galue atu loa a Tatyana e pelā me se misionale i Lusia. Ne fakaoti mai ana pati penei: “I tausaga katoa konei ne galo mai ei au mai toku fenua tonu, e uke a tala ‵gali ne maua ne au penā foki loa mo taugasoa e tokouke. Kae sili i ei, a tausaga konei ne fakamalosi aka ei toku fakatuanaki.”

Masako

A Masako se tino mai Tiapani, ko 50 tupu nei ana tausaga, ko leva ne manako ke galue a ia pelā me se misionale, kae ona ko tulaga o te masaki ne fai ei ke sē maua ne ia o fakataunu te mea tenā. Kae i te taimi ne tai ‵lei ei tena masaki, ne mafaufau a ia ke fanatu o fesoasoani ki te galuega talai i Lusia. E tigā eiloa ne faigata ke maua sena koga nofo mo se galuega tumau, ne mafai eiloa ne ia o ‵lago atu ki tena galuega paenia mai i te akoakoga o tino ki te ‵gana Tiapani mo te galue pelā me se tino ‵fulu fale. Se a te mea ne fesoasoani atu ki a ia ke tumau i tena taviniga?

Kafai ko toe kilo ki se 14 tausaga ko ‵teka i tena taviniga i Lusia, ne fai mai a Masako: “A te fiafia telā ne maua ne au i taku taviniga ne ave kea‵tea ne ia so se mea faigata ne fepaki mo au. A te talai atu i koga kolā e manakogina malosi ei a tino talai o te Malo ne fai pelā me se ‵fuliga lasi kae fakafiafia ki toku olaga.” Ne toe fai mai a ia: “Ki au loa, te mea nei e pelā me se vavega ke lavea atu te taimi muamua ne fesoasoani mai ei a Ieova ki a au i meakai, gatu, mo te koga mo oku nofo i tausaga katoa.” E se gata fua i te tavini atu i kogākoga i Lusia kolā ne lasi te manakoga i ei, ne fesoasoani atu foki a ia ki te galuega talai i Kyrgyzstan. E se gata i ei, ne mafai foki ne ia o fesoeasoani atu ki potukau Palagi-, Saina-, mo te gana Uighur. Nei la, e galue atu a ia e pelā me se paenia i St. Petersburg.

NE MAUA A FAKAMANUIAGA NE KĀIGA KOLĀ NE FESOASOANI ATU

Inga mo Mikhail

Ona ko te sē toka o tulaga tau tupe, ne masani sale o olo atu a kāiga ki nisi fenua ke maua se olaga tai ‵lei atu. Kae pelā mo Apelaamo mo Sala, ne olo atu a nisi kāiga ki nisi  fenua ke kausaki atu ki olotou fakamoemoega faka-te-agaga. (Kene. 12:1-9) Mafaufau ki a Mikhail mo Inga, se tauavaga mai Ukraine, ne olo atu ki Lusia i te 2003. Ne seki leva kae ne maua ne laua a tino kolā ne mana‵ko malosi ki te munatonu mai i te Tusi Tapu.

Ne fai mai a Mikhail: “I te taimi e tasi ne ga‵lue māua i se koga telā ne seki talai aka loa i ei a Molimau. Ne ‵tala mai ne se toeaina te mataloa kae fesili mai, ‘A koulua ne tino talai?’ Ne tali atu māua, ao, tena ne fai mai tou tagata: ‘E iloa ne au me isi se aso ka ‵mai ei koutou. Me sē mafai ke sē fakataunu a pati a Iesu.’ Tenā ne siki mai ei ne ia a pati i te Mataio 24:14.” Ne toe fai mai a Mikhail: “I te kogākoga foki eiloa tenā ne maua ne māua ne fafine mai i te lotu Baptist e nofo ki se toko sefulu, ne tino kolā ne fiainu malosi ki te munatonu. E isi se olotou tusi ko te Ke Ola Koe ki te Se-Gata-Mai kae ne fakaaoga faeloa ne latou i olotou sukesukega ki te Tusi Tapu i vaiaso katoa. Ne ‵nofo atu māua i se fia itula o tali atu olotou fesili, usu a pese o te Malo kae ‵kai fakatasi foki matou. Ne fai te asiga tenā e pelā me ko te ‵toe taimi gali ki a au.” Ne lotoma‵lie a Mikhail mo Inga me i te olo atu o ga‵lue i kogā koga kolā ne lasi te manakoga mō tino talai o te Malo, ne fai ei ke pili malosi atu laua ki a Ieova, fakamalosi aka te lā a‵lofa ki tino, kae ne fakamanuia laua ki se olaga fakamalie loto. Nei la, e ga‵lue atu laua i te galuega e pelā me ne ovasia o fenua.

Oksana, Aleksey, mo Yury

I te 2007, a Yury mo Oksana, se tauavaga mai i Ukraine, ko taki 30 tupu lā tausaga, mo te lā tama tagata ko Aleksey, ko 13 nei ana tausaga, ne asi atu ki te ofisa lagolago i Lusia. Ne lavea ei ne latou i luga i te mape o Lusia a kogā koga kolā seki talai aka loa i ei. Ne fai mai a Oksana, “I te otiga ne lavea ne au te mape tenā, ne iloa aka ei ne au te lasi o te manakoga mō tino talai o te Malo. Ne fesoasoani mai te mea tenā ke fakaiku aka i omotou mafaufau ke olo atu ki Lusia.” Se a foki te mea ne tai fesoasoani atu ki a latou? Ne fai mai a Yury: “Ne lasi ‵ki te fesoasoani o mataupu kolā e tuku mai i loto i ‵tou tusi, e pelā mo te ‘Can You Serve in a Foreign Field?’ * Ne asi atu matou ki te koga i Lusia telā telā ne tuku mai ne te ofisa lagolago ke olo matou ki ei, kae ‵sala aka ki ne koga ‵nofo mo galuega ‵togi.” I te 2008, ne olo atu ei latou ki Lusia.

I te taimi muamua, ne tai faiga‵ta loa te mauaga o galuega, kae i te ukega o taimi ne ga‵sue faeloa latou mai i te olotou koga ‵nofo ki te sua koga. Ne fai mai a Yury: “Ne ‵talo faeloa matou ke mo a e loto vāi‵vai, kae ke tumau loa te i te faiga o te galuega talai, kae ne tali‵tonu matou me ka ‵lago mai eiloa a Ieova. Ne lavea ne matou te auala e fesoasoani mai a Ieova mafai ko fakamuamua ne tatou a manakoga o tena Malo. Ne fakamalosi aka ne te taviniga tenei a te motou kāiga.” (Mata. 6:22, 33) Kae ne pokotia pefea a Aleksey i te mea tenā? “Ko oko loa te ‵lei ki a ia,” ko pati a Oksana. “Ne tuku atu a ia ki a Ieova kae papatiso i te taimi ko iva ei ana tausaga. Ne lavea ne ia te lasi o te manakoga mō tino talai o te Malo telā ne fai ei a ia ke galue pelā me se paenia lagolago māfai ko malō‵lo a akoga. Ne lasi te mā fia‵fia i te laveaatuga ne maua tena alofa mo tena loto finafinau ki te taviniga.” Nei la, ko ga‵lue atu a Yury mo Oksana e pelā me ne paenia fakapito.

“E TASI LOA TE MEA NE SALAMŌ EI AU”

E manino ‵lei eiloa te fakamunāga telā e fai sale ne tino kolā e ga‵lue i te galuega talai, me i te fanatu o galue i koga kolā e fakalauefa i ei tau taviniga, e manakogina ke talitonu katoatoa koe ki a Ieova. E tonu, e fe‵paki a latou kolā e olo atu o ga‵lue i koga kolā e lasi te manakoga i ei mo fakalavelave e uke i olotou koga talai, kae ui ei, e maua ne latou te fiafia lasi ‵ki mai i tino kolā e fia‵fia ki te fekau o te Malo. E mata, e mafai ne koe o fesoasoani atu ki koga kolā e lasi te manakoga i ei mō tino talai o te Malo ke ‵sala atu ki tino fia‵fia? Kafai e mafaufau koe o fai penā, ka maua foki ne koe a lagonaga e pelā mo Yury tela ne fai mai penei: “E tasi loa a te mea ne salamō ei au me ne seki na fai ne au muamua te mea tenei.”

^ pala. 20 Onoono ki te The Watchtower, Oketopa 15, 1999, itulau 23-27.