Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iuni 2015

“E Manakogina ke Kufaki Koutou”

“E Manakogina ke Kufaki Koutou”

MAI tua o te papatisoga o Anita * e pelā me se Molimau a Ieova, ne kamata o ‵teke malosi atu tena avaga. “Ne taumafai tou tagata o taofi au mai te fanatu ki fakatasiga kae fakatapu foki ne ia au ma taku atu te igoa o te Atua,” ko muna a Anita. “A te taku atu fua o te igoa o Ieova e fakamāfua fakavave aka ei te kaitaua o taku avaga.”

A te akoako atu o ana tama‵liki e uiga ki a Ieova ne sae aka foki i ei a te suā tulaga faigata. “Ne fakatapu eiloa so se tapuakiga ki a Ieova i toku fale. Ne seki mafai ne au o sukesuke faka‵lei mo aku tama‵liki, io me e ave ne au latou ki fakatasiga.”

E pelā mo te mea e fakaasi mai i te tala o Anita, e mafai o fai a ‵tekemaiga mai kāiga mo fai se tinā tofotofoga ki te fakamaoni o se Kelisiano. E penā foki a masaki, te mate atu o se tamaliki io me se avaga, io me se kāiga pili ko fulitua atu ki a Ieova. Tela la, ne a mea e mafai o fesoasoani atu ki se Kelisiano ke tumau i te fakamaoni ki a Ieova?

Ke fakafesagai atu ki vaegā tofotofoga penā, ne a au mea e ‵tau o fai? Ne fai mai te apositolo ko Paulo: “E manakogina ke kufaki koutou.” (Epe. 10:36) Kae ne a mea e mafai o fesoasoani atu ki a koe ke kufaki?

KO TE ‵TALO MO TE FAKALAGOLAGO KI A IEOVA

A te auala tāua e tasi e mafai o maua te malosi e manakogina ke kufaki i tofotofoga ko te ‵talo atu mo te fakalagolago ki te Atua. Mafaufau ki te fakaakoakoga e tasi tenei. Ne oko atu a fakalavelave ki te kāiga o Ana i te afiafi o se Aso Gafua. Ne mate fakapoi atu tena avaga mai tua o te 30 tausaga ne avaga ei laua. “Ne seki toe foki mai tou tagata ki te fale mai te galuega,” ko muna a Ana, “kae ko 52 fua ana tausaga.”

Ne fa‵ki pefea a Ana i te tulaga tenei? Ne fesoasoani atu ki a ia tena galuega ona ko te mea ne manakogina te saga katoatoa atu ki ei, kae ne seki fakagata aka ei tena logo‵mae. Ne fai mai tou fafine: “Ne fakaasi atu a mea katoa i toku loto ki a Ieova kae fakamolemole atu ke fesoasoani mai ko te mea ke mafai ne au o fa‵ki i te galo atu o taku avaga.” E mata, ne tali mai a Ieova ki aku ‵talo? Ne talitonu eiloa tou fafine me ne tali mai a ia. Ne fai mai a ia: “A te filemu telā e mafai fua o tuku mai ne te Atua ne logotonu ‵ki ki toku foitino kae ne fakatumau ei te ‵lei o toku mafaufau. E seai soku fakalotolotolua me ka fakafoki mai ne Ieova taku avaga i te toetuga.”—Fili. 4:6, 7.

Ko oti ne tauto mai a te Tino telā e ‘tali mai ki talosaga’ me ka tuku atu ne ia ki ana tavini so se mea e manakogina ke tumau latou i te fakamaoni ki a ia. (Sala. 65:2) E mata, e se lotomalie koe me e fakamalosi aka a te fakatuanaki ne te fakatalitonuga tenei? E mata, e se fesoasoani atu ke iloa ne koe me kaia e mafai foki ne koe o kufaki?

FAKATASIGA KELISIANO—KO TE AUALA E FESOASOANI MAI

Ko oti ne fesoasoani atu a Ieova ki ana tino e auala i te fakapotopotoga Kelisiano. E pelā mo te taimi ne fe‵paki ei a te fakapotopotoga i Tesalonia mo fakasauaga ‵mafa, ne fakamalosi atu a Paulo ki Kelisiano konā ke “tumau i te fakamalosi atu te suā tino ki te suā tino, e pelā eiloa mo te mea e fai nei ne [latou].” (1 Tesa. 2:14; 5:11) Mai te fakatau a‵lofa mo te fakatau fesoasoani, ne mafai ei o manumalo a Kelisiano i Tesalonia i te tofotofoga tenā o te lotou fakatuanaki. A te lotou kufaki ne fai mo fai se fakaakoakoga tafasili i te ‵lei mō tatou i aso nei, kae e fakaasi mai i ei se mea telā e mafai o fesoasoani mai ki a tatou ke kufaki.

A te atiakaga o se va fakataugasoa ‵pili mo tino o te fakapotopotoga e mafai o fesoasoani mai ki a tatou ke “fakatau fakamalosi aka ei te suā tino ki te suā tino.” (Lo. 14:19) E tāua malosi eiloa te mea tenei i taimi e loto mafatia ei tatou. Ne fepaki eiloa a Paulo mo fakalavelave e uke, kae ne tuku atu ne Ieova a te malosi ke kufaki a ia. I nisi taimi, ne tuku atu ne te Atua a fakamalosiga e uke ki a Paulo e auala i taina tali‵tonu. E pelā mo te taimi ne avatu ei ana alofaaga ki sui o te fakapotopotoga i Kolose, ne fai atu a ia e uiga ki a latou: “Ne fai latou mo fai se fakamafanafanaga lasi ‵ki ki a au.” (Ko. 4:10, 11) Ao, a te lotou alofa ki a Paulo ne fakaosofia ei latou ke fakamafanafana kae fakamalosi atu ki a ia i taimi ne manakogina ei ne ia. Kāti ko oti  foki ne maua ne koe a fakamalosiga mo fesoasoani tai ‵pau mai i tino o tau fakapotopotoga.

FESOASOANI MAI TOEAINA

Ne tuku mai ne te Atua a te suā fesoasoani i loto i te fakapotopotoga Kelisiano—ko toeaina. Ne mafai eiloa o fai a tāgata ma‵tua konei i te feitu faka-te-agaga e pelā me ne “fale e malu ei a tino mai i te matagi, pela me ne koga e lafi ei a tino mai i se afā. Ka pelā latou me ne vaitafe foliki kolā e tafe i loto i se toafa, pelā me se malūga o se kaupapa maluga i se fenua seai ne lakau i ei.” (Isa. 32:2) Ko oko eiloa i te fakamalosi loto a te fakatalitonuga tenā! Kai fakaaoga faka‵lei aka eiloa ne koe a te fakatokaga alofa tenei? A fakamalosiga mo fesoasoani mai toeaina e mafai o fesoasoani atu ke kufaki koe.

E tonu, a toeaina e se ne tino fai vavega. A latou ne tino sē ‵lei katoatoa, “ne tino fua e pelā mo [tatou].” (Galu. 14:15) Kae koi mafai eiloa o fesoasoani mai olotou ‵talo ke fai a mea e uke. (Iako. 5:14, 15) Ne fai mai se taina i Italia, telā ne kufaki i ikuga sē ‵lei o se masaki o ga‵kano: “A te alofa mo te atafai o taina fakatasi mo olotou āsiga, ne fesoasoani mai ke kufaki.” E mata, e mafai o maua katoatoa ne koe a mea aoga mai te fakatokaga alofa a Ieova—ko toeaina?

TUMAU FAELOA I POLOKALAME FAKA-TE-AGAGA

E isi aka foki ne mea e mafai ne tatou o fai ke kufaki. E tasi mai i ei ko te tumau faeloa i polokalame faka-te-agaga. Mafaufau ki te fakaakoakoga a John, telā ko 39 ana tausaga, kae ne maua ne ia se kenisa tai ‵kese. Ne taku ‵tonu mai a ia: “Ne mafaufau au me e se ‵lei a faifaiga ki a au ona ko au koi foliki.” I te taimi tenā a te tama tagata a John ko tolu fua ana tausaga. “Ko tena uiga, ne seki tausi atu fua taku avaga ki te mā tama kae e ‵tau foki o tausi mai ki a au, e pelā foki mo te fesoasoani mai ke avatu au ki āsiga a tokita,” ko muna a John. Ne fai ne togafiti fakatokita ke fi‵ta malosi kae takamiomio te ulu o John. Kae e se tenā fua. Ne kamata o masaki malosi te tamana o John kae ne manakogina ke tausi atu te kāiga ki ei.

Ne mafai pefea ne John mo tena kāiga o fa‵ki i te tulaga faigata tenei? “Faitalia toku fi‵ta, ne fakamautinoa aka ne au me e fakatumau eiloa te motou polokalame faka-te-agaga masani,” ne lipoti mai tou tagata. “Ne ‵kau atu matou ki fakatasiga katoa, ne ‵kau atu faeloa ki te galuega talai i te vaiaso, kae fai faeloa foki te motou tapuakiga a kāiga faitalia te faigata.” A te ‵tonuga loa, ne lavea ne John me i te kī ki te kufaki i so se tulaga faigata ko te fakatumau o te malosi i te feitu faka-te-agaga. E mata, e isi ne ana pati fesoasoani ki tino kolā e fe‵paki mo tulaga faiga‵ta? Ana muna: “E tiga eiloa ne poi kae manavase au i te taimi muamua, ne iloa ne au me alofa mai a Ieova kae tuku mai foki ne ia te malosi e manakogina. E mafai o fai ne Ieova ke malosi koe, e pelā eiloa mo tena mea ne fai mai ki a au.”

E aunoa mo te fakalotolotolua, fakatasi mo te fesoasoani o te Atua, e mafai ne tatou o kufaki i tofotofoga io me ko fakanofonofoga faiga‵ta kolā e mafai o fe‵paki mo tatou—i aso nei io me ko aso mai mua. Ke na fakaasi atu ne tatou a te ‵talo mo te fakalagolago atu ki a Ieova, ati aka se va fakataugasoa ‵pili mo tino i te ‵tou fakapotopotoga, ‵sala atu ki se fesoasoani mai toeaina Kelisiano, kae ke tumau faeloa i polokalame faka-te-agaga. Mai te faiga penā, ka mafai ei o ola tatou e ‵tusa mo pati a Paulo: “E manakogina ke kufaki koutou.”

^ pala. 2 Ko oti ne ‵fuli a nisi igoa.