Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Me 2015

 TALA TONU

A te Mafaufau Faeloa ki te Tino ne Alofa Muamua Au ki ei ne Fesoasoani Mai ke Kufaki Au

A te Mafaufau Faeloa ki te Tino ne Alofa Muamua Au ki ei ne Fesoasoani Mai ke Kufaki Au

A TE taimi nei ko te kamataga o te ‵tau mafanafana i te 1970. Ne takato au i toku moega i te fakaimasaki ko te Valley Forge General, i Phoenixville, Pennsylvania, i Amelika. Ne puke faeloa ne se nēsi tagata toku toto i se āfa itula. E pelā me se sotia telā ko 20 fua oku tausaga, ne logo‵mae au mai i se masaki ‵pisi. A te nēsi telā e matua malie fua i a au, ne kilo mai mo te polepole. I te taimi e fanaifo ei toku toto ki lalo, ne fai atu au, “E a, e seki matea aka loa ne koe se tino ke mate?” Ne fakalau‵tea ana mata, kae tali mai, “Ikai, seki lavea aka loa ne au.”

I te taimi tenā, ne foliga mai me e se fano o ‵lei toku masaki. Kae se a te pogai ne ulu ei au i te fakaimasaki? Ke fakamatala atu ne au a nisi mea ne ‵tupu i toku olaga.

TOKU TAIMI MUAMUA KI TE TAUA

Ne masaki au i te taimi ne galue ei au pelā me se tino fesoasoani ki tokitā tipitipi i taimi o te taua i Vietnam. Ne fiafia eiloa au o fesoasoani ki tino ma‵saki mo tino pa‵kia kae fakamoemoe au ke fai pelā me se tokitā tipitipi. Ne oko atu au ki Vietnam i a Iulai 1969. E pelā loa mo tino ‵fou kolā ne oko atu ki konā, ne manakogina ke galue au i matagaluega kese‵kese mō se vaiaso ko te mea ke mafai o fakamasani atu ki mafuli‵fuliga o taimi mo te ‵vela o te aso.

Mai tua malie eiloa o taku fanatuga o galue i se fakaimasaki tipitipi i te Mekong Delta i Dong Tam, ne oko mai a helicopter e uke kolā e ‵fonu i tino pa‵kia i te taua. Ona ko toku fakamaoni kae fiafia o galue, ne manako eiloa au o fesoasoani atu i te taimi tenā. Ne fakatoka faka‵lei a tino pa‵kia kae ne avatu fakavave ki se pokisi lasi e faite ki fiti kolā e faka‵moko kae ko oti ne fakatoka ke fai mo potu tipitipi. Ne ‵tu atu katoa i te tamā potu tenā ko te tokitā tipitipi, te tokitā fakamoe, se nēsi telā e galue i potu tipitipi, mo se nēsi fesoasoani telā e fakatoka ne ia a te potu tipitipi mo fakamatalaga e uiga ki te tino masaki, o fai olotou taumafaiga ke fakaola a tino pa‵kia konā. Ne lavea ne au me e isi ne nisi kakō i loto i taga uli ‵lasi ne seki tuku ifo mai helicopter. Kae ne iloa aka ne au me i taga ‵lasi konā ko foitino o sotia kolā ne ‵mate i te taua. Tenā taku tala i toku taimi muamua ki te taua.

KO ‵SALA ATU AU KI TE ATUA

I te taimi koi tamataene ei au, ne isi soku iloa i te munatonu

I te taimi koi tamataene ei au, ne isi soku iloa i te munatonu telā ne akoako ne Molimau a Ieova. Ne sukesuke eiloa toku mātua pele mo Molimau ki te Tusi  Tapu, kae ne seki gasolo a ia ki mua ke papatiso a ia. Ne fiafia malosi au o kau atu ki te akoga a toku mātua. I te taimi foki tenā, ne lavea ne au se Fale Tapuaki o Molimau a Ieova i te taimi ne sa‵sale ei māua mo toku tamana fai. Telā, ne ‵sili atu au ki ei, “Se a te fale telā?” Ne tali mai a ia, “Sa taumafai loa o fakapilipili atu ki tino i loto i te fale tenā!” Ona ko toku alofa kae talitonu ki toku tamana fai, ne fakalogo au ki tena fakatonuga. Tela la, ne seki toe fesokotaki atu au ki Molimau a Ieova.

I taku fokimaiga mai Vietnam, ne manako malosi au o ‵sala atu ki te Atua i toku olaga. Ne pokotia malosi au mai te mafaufau faeloa ki logo‵maega kolā ne lavea ne au. Ne foliga mai me e seai eiloa se tino e malamalama faka‵lei i mea kolā ne ‵tupu i Vietnam. E masaua ne au me ne taku a sotia Amelika ne tino kolā ne fakaasi atu olotou manatu ‵teke e pelā me ne tino tamate pepe, ona ko te tokouke o tama‵liki fo‵liki ne ‵mate valevale i te taua e ‵tusa mo lipoti.

Ke fakamalie aka toku fiakai i te feitu faka-te-agaga, ne kamata au o kau atu ki lotu kese‵kese. Ne isi eiloa soku fiafia ki te Atua kae ne seki lotomalie loa au ki mea kolā ne lavea ne au i lotu konā. Fakamuli loa, ne fanatu au ki se Fale Tapuaki o Molimau a Ieova i Delray Beach, i Florida, i te Aso Sa i a Fepuali 1971.

I te taimi ne ulu atu au ki loto, kae ko te lāuga mō tino katoa ko pili aka loa o oti, telā ne nofo ei au ki te sukesukega o Te Faleleoleo Maluga telā ne fai mai tua. Ne seki masaua ne au a te mataupu telā ne fai‵pati ki ei, kae koi masaua eiloa ne au a tama‵liki fo‵liki kolā e ‵suke faeloa olotou Tusi Tapu o ‵sala a tusi siki i ei. Ne fakaofoofogia ki a au a te mea tenā! Ne nofo eiloa au o fakalogologo kae kilokilo faka‵lei. I te taimi ne ulu ei au ki tua mo te Fale Tapuaki, kae ne vau ki a au se taina matua telā ko nofo ki te 80 ana tausaga. A tena igoa ko Jim Gardner. Ne fakaasi mai ne ia te tusi telā e fakaulutala penei The Truth That Leads to Eternal Life kae ‵sili mai, “E fiafia koe o puke a te tusi tenei?” Ne fai ne māua se fakatokaga ke kamata te mā akoga faka-te-Tusi Tapu i te taeao o te Aso Fa.

Au ne galue i te po o te Aso Sa tenā. Ne galue au i se fakaimasaki i Boca Raton i Florida, i te potu tipitipi. Ne galue au mai te 11 i te po ki te 7 i te taeao. Ona ko te sē logoā i te valuapo tenā, ne mafai ei o faitau ne au a te tusi ko te Truth. Ne vau se nēsi fakamatuatua ki a au, puke ne ia te tusi mai oku lima, onoono atu ki te ‵kava kae fai mai, “Sa fai loa ke fai koe pelā me se vaega o tino konei, ne?” Ne toe ‵futi ne au taku tusi ko te Truth mai i ana lima kae fai atu, “Ko nofo fua i te āfa taku faitauga ki te tusi, kae e foliga mai me tenei eiloa te mea tonu!” Ne tiaki ne tou fafine a au, kae ne fakaoti loa ne au taku faitauga ki te tusi i te po tenā.

Toku faiakoga i te Tusi Tapu ko Jim Gardner, se taina fakaekegina telā ne iloa ‵lei ne ia a Charles Taze Russell

Ne kamata te mā akoga faka-te-Tusi Tapu mo te taina ko Gardner mai te fesili atu, “Tela la, ne a mea ka suke‵suke tāua ki ei?” Ne tali mai a ia, “Ko te tusi telā ne tuku atu ne au ki a koe.” Ne fai atu au, “Ko oti ne faitau ne au.” Kae ne tali mai te taina ko Gardner mo te atafai, penei: “Lei la, ke na sau‵tala la tāua ki te mataupu muamua.” Ne ofo masei au ki te uke o mea kolā ne seki iloa ne au. Ne fai mai a ia ke onoono au  ki tusi siki e uke i taku Tusi Tapu ko te King James ki muna a Iesu kolā e tusi i mataimanu ‵kula. Mai konā ne mafai eiloa o tauloto au e uiga ki te Atua tonu ko Ieova. Ne suke‵suke eiloa māua mo te taina ko Gardner ki mataupu e tolu o te tusi ko te Truth i te taeao eiloa tenā. Fakamuli ifo, i taeao katoa o Aso Fa, ne suke‵suke faeloa māua ki mataupu e tolu. Ne fiafia ‵ki eiloa au ki taku akoga. Ma‵faga o tauliaga me ne akoakogina au ne se taina fakaekegina telā ne iloa faka‵lei ne ia a Charles T. Russell!

I nai vaiaso mai tua ifo, ne taliagina ke fai au pelā me se tino talai o te tala ‵lei. Ne fesoasoani mai a Jim ki oku fakalavelave e uke, e aofia ei a te galuega talai mai fale ki fale. (Galu. 20:20) I taimi ne ga‵lue fakatasi ei māua mo Jim, ne kamata eiloa o fiafia malosi au ki te galuega talai. Ne kilo atu au ki te galuega talai e pelā me se tauliaga sili ko maua ne au. Ko oko eiloa i te fakafiafia ke fai pelā me se tino e ga‵lue fakatasi mo te Atua!—1 Koli. 3:9.

TOKU ALOFA MUAMUA MŌ IEOVA

Nei la, ke fakaasi atu ne au se mea e uiga ki a au—ko toku alofa muamua ki a Ieova. (Faka. 2:4) Ne fesoasoani mai a te alofa ki a Ieova ke fakafesagai atu au ki te mafaufau faeloa ki mea kolā ne fakalogo‵mae mai i taimi o te taua mo nisi fakalavelave aka e uke.—Isa. 65:17.

Ne fesoasoani mai toku alofa ki a Ieova ke fakafesagai atu au ki te mafaufau ki mea fakalogo‵mae ne ‵tupu i te taua mo nisi fakalavelave aka e uke

Ne papatiso au i a Iulai 1971, i te Fono o te Atufenua, ko te “Divine Name,” i te Yankee Stadium

Ne masaua ne au se aso fakapito i toku olaga i te taimi o te ‵tau mafanafana i te 1971. Ne afuli keatea au mai te tamā potu ‵togi a oku mātua telā ne talia mai ke nofo au i ei. Ne seki talia ne toku tamana fai se Molimau a Ieova ki tena fale! E se uke malosi aku tupe i te taimi tenā. Ne maua faeloa ne au a toku peofuga i te lua vaiaso i te fakaimasaki telā e galue au i ei, kae ne fakaaoga ne au a te ukega o aku tupe ki gatu ko te mea ke mafai o kau atu au ki te galuega talai kae ke mata ‵lei foki i mua o Ieova. E isi ne nai tupe a aku ne ‵teu, kae ne ‵teu loa i te pagike i Michigan, te koga telā ne tupu aka ei au. Tela la, ne nofo eiloa au i loto i taku  motoka mō ne nai aso. Ne fakaaoga ne au a fale fo‵liki i koga utu motoka ke koukou kae ‵vele au i ei.

I te aso e tasi ne fanatu ei au i taku motoka ki te Fale Tapuaki i se fia o itula mai mua o kamata te fakatasiga mō te galuega talai. Ne fatoa malōlō eiloa au mai te galuega. I te taimi ne sagasaga ei au mai tua o te Fale Tapuaki i te koga telā e se mafai o lavea ne tino, kae ne kamata o pokotia au i te mafaufau ki mea ne ‵tupu i Vietnam—ko te manogi o foitino o tino kolā ne ‵sunu mo te kilo atu ki toto mai pa‵kiaga ‵lasi. I toku mafaufau, ne mafai o lagona kae lavea ‵lei ne au a tamataene e fakamolemole mai ki a au, penei, “E mafai au o ola? E mafai au o ola?” Ne iloa ne au me ka ‵mate latou, kae ne taumafai eiloa au o fakamafanafana latou ki te mea e mafai ne au o fai e aunoa mo te fakaasi atu a te mea tonu ka tupu ki a latou. I te taimi ne sagasaga ei au i konā, ne otia malosi eiloa toku loto.

Ne fai ne au te ‵toe mea e mafai o fai, maise loa māfai e fe‵paki mo mea faiga‵ta mo fakalavelave, ke mo a ma galo i a au a te tino telā ne alofa muamua au ki ei, ko Ieova

Ne ‵talo atu au kae ‵sali ifo mo oku loimata ki oku kalafou. (Sala. 56:8) Ne kamata o mafaufau ‵mafa au e uiga ki te fakamoemoega ko te toetu. Kae ne masaua ne au: E auala i te toe‵tuga, ka fakaseai katoa ne Ieova te Atua a amioga takafia‵toa kolā ne lavea ne au mo logo‵maega katoa kolā ne fakafesagai mo au pelā foki mo nisi tino. Ka toe faka‵tu mai ne te Atua a tamataene konā ki te ola, kae ka maua ne latou te avanoaga ke tauloto ki te munatonu e uiga ki a ia. (Galu. 24:15) Ona ko te mea tenā, ne ‵fonu eiloa toku loto i te alofa ki a Ieova. Ne fai eiloa te aso tenā e pelā me se aso fakapito ki a au. Mai konā, ne fai ne au te ‵toe mea e mafai o fai, maise loa māfai e fakafesagai atu ki fakalavelave mo mea faiga‵ta, kae ke mo a ma galo i a au a te alofa telā ne maua muamua ne au mō Ieova.

NE ALOFA MAI EILOA A IEOVA KI A AU

I te taua, e fai eiloa ne tino a mea ma‵sei, kae ne aofia eiloa au i ei. Kae ne fesoasoani mai eiloa ki a au a te mafaufau ‵loto ki tusi siki e lua kolā ne ‵gali ki a au. A te tusi muamua ko te Fakaasiga 12:10, 11, telā e fai mai me ko oti ne fakatakavalegina a te Tiapolo ne te fekau telā e folafola atu ne tatou e pelā foki mo te toto o te Tamā Mamoe. Kae ko te lua ko te Kalatia 2:20. Mai te fuaiupu tenā, e iloa ne au me i a Keliso Iesu ne mate “mō au.” Ne fakaaoga ne Ieova te toto maligi o Iesu ke fakamagalo ei aku agasala. I te iloaga ne au a te manatu tonu tenā ne fai i ei ke maua ne au se loto lagona ‵ma kae ne fakamalosi mai ei ke fai ne au a mea katoa e mafai ne au o fai ke fesoasoani atu ki nisi tino ke iloa ne latou te munatonu e uiga ki te ‵tou Atua alofa fakamagalo ko Ieova!—Epe. 9:14.

Kafai e mafaufau au ki toku olaga, ne loto fakafetai eiloa au me e tausi mai faeloa a Ieova ki a au. E pelā me se fakaakoakoga, i te aso eiloa telā ne iloa aka ne Jim i a au e nofo fua i loto i taku motoka, ne fesokotaki atu a ia ki se tuagane telā e isi ne ana fale ‵togi. Ne talitonu eiloa au me ne fakaaoga ne Ieova a Jim mo te tuagane tenā ke fakatoka se koga gali mo oku nofo. Ko oko eiloa i te atafai mai o Ieova! E tausi faka‵lei ne ia a ana tavini fakamaoni.

FAKAAKOAKO KE FAKAPALENI TE LOTO FINAFINAU MO TE ATAMAI

I a Me i te 1971, ne manakogina eiloa ke fanatu au ki Michigan ke tausi atu ki nisi mea fakapisinisi. A koi tuai o tiaki ne au a te fakapotopotoga i Delray Beach, Florida, ne faka‵fonu ne au te koga i tua o taku motoka ki tusi, kae ne tele atu au ki te auala lasi ki matū. Ne fakaoti eiloa ne au aku tusi a koi tuai o fanatu taku malaga ki Georgia. Ne talai atu ne au te tala ‵lei o te Malo mo te loto finafinau i vaegā koga katoa. Ne tu au i falepuipui kae tufatufa atu foki a tamā pepa ki tino i loto i fale fo‵liki. Ke oko mai ki te aso nei, ne mafaufau au me e mata, e isi ne fuaga kolā ne ‵toki ne ola aka i koga konā.—1 Koli. 3:6, 7.

E ui i ei, e fakaasi ‵tonu atu ne au me i te taimi muamua ne tauloto ei au ki te munatonu, ne seki maua ne au te atamai, maise loa māfai e faipati atu au ki oku kāiga ‵pili. Ona ko te lasi o toku alofa ki a Ieova, ne loto toa au o talai atu ki a latou mo te sē amanaia. Ne alofa ‵ki eiloa au ki oku taina, ko John mo Ron, kae ne talai atu ne au te munatonu ki a lāua i se auala faimālō. Fakamuli ifo, ne fakatoese atu au ona ko toku sē amanaia atu ki a lāua. Kae ne seki gata eiloa au i te ‵talo atu ke mafai o talia ne lāua a te munatonu. Mai konā,  ne akoako au ne Ieova, kae ne gasolo aka toku atamai i te talai mo te akoako atu.—Ko. 4:6.

NISI TINO KOLĀ NE ALOFA AU KI EI I TOKU OLAGA

E tiga eiloa e mautinoa toku alofa ki a Ieova, kae e se mafai o puli i a au a nisi tino kolā ne alofa au ki ei. A te suā tino ne alofa au ki ei ko taku avaga, ko Susan. Ne iloa aka ne au me e ‵tau o isi soku soa telā e mafai o fesoasoani mai ki a au i te faiga o te galuega talai o te Malo. A Susan se fafine telā e matua ‵lei i te feitu faka-te-agaga. E masaua ‵lei ne au te taimi ne āsi atu au ki ei i te taimi koi fia‵fai ei māua. Ne sagasaga eiloa a Susan i te koga ki mua o te fale o ana mātua i Cranston, Rhode Island. A tou fafine e faitau i Te Faleleoleo Maluga fakatasi mo tena Tusi Tapu. A te mea telā ne ofo ei au, me ne faitau ne ia se mataupu toetoe kae onoono foki ki tusi siki. Ne mafaufau au penei, ‘A ia nei se fafine e malosi i te feitu faka-te-agaga!’ Ne avaga māua i a Tesema 1971, kae ne fiafia malosi au, me ne ‵lago malosi mai eiloa a ia ki a au. A te mea telā e fiafia malosi au ki ei me e tiga eiloa e alofa mai a ia ki a au, kae e sili atu foki tena alofa ki a Ieova.

Māua mo taku avaga ko Susan, mo mā tama‵liki tāgata, ko Paul mo Jesse

Ne fakamanuiagina māua mo Susan ki tamaliki tāgata e tokolua, ko Jesse mo Paul. I te taimi ne ‵tupu aka ei lāua, ne fakatasi atu eiloa a Ieova ki a lāua. (1 Samu. 3:19) Ona ko te lā puke ‵mau ki te munatonu, ne fakafiafia ne lāua a māua mo Susan. Ne tumau eiloa lāua o tavini atu ki a Ieova me ne masaua ne lāua a te lā a‵lofa ki a Ieova. Ne ga‵lue lāua i te taviniga tumau mō se 20 tausaga. Kae ko oko loa toku  fakamatamata, ki avaga a aku tamaliki, ko Stephanie mo Racquel, kolā e fai ne au pelā me ne tama ‵tonu a aku. Ne a‵vaga eiloa aku tama‵liki tāgata konei ki fāfine e ma‵losi i te feitu faka-te-agaga kolā e a‵lofa ki a Ieova te Atua mo lā loto mo lā foitino kātoa.—Efe. 6:6.

Ne fia‵fia eiloa matou o talai atu pelā me se kāiga i koga kolā e se lasi te galuega e fai i ei

Mai tua o taku papatisoga, ne tavini atu au mō se 16 tausaga i Rhode Island, telā ne ati aka ne au se vā fakataugasoa mo tino e tokouke. E uke ‵ki eiloa a tala ‵gali o toeaina tu ‵kese kolā ne tavini fakatasi mo au. E se gata i ei, ne loto fakafetai au ona ko fakamalosiga ‵gali ne maua ne au mai i ovasia faima‵laga kolā e se mafai o laulau atu. Se tauliaga lasi ‵ki ke ga‵lue fakatasi mo tāgata kolā ne fakatumau ne latou te lotou a‵lofa i te taimi muamua ki a Ieova! I te 1987 ne olo atu matou ki North Carolina o tavini atu i te koga telā e lasi te manakoga i ei, kae ne maua foki ne matou i konā ne taugasoa ‵gali e tokouke. *

Ne fai ne au se fakatasiga mō te galuega talai i te taimi koi galue au e pelā me se ovasia faimalaga

I a Aokuso 2002, ne talia ne māua mo Susan a te ‵kamiga ke fai pelā me se vaega o te kāiga Peteli i Patterson i Amelika. Ne galue au i te Matagaluega mō te Galuega Talai, kae ne galue a Susan i te koga ‵ta gatu. Ne fiafia eiloa tou fafine o galue i konā! Kae i a Aokuso 2005, ne maua ne au te tauliaga ke tavini atu pelā me se sui o te Potukau Pule. Ne loto maulalo au o talia te tofiga tenā. Ne manavase malosi taku avaga mai te mafaufau ki te tiute, te galuega, mo te faima‵laga ki nisi fenua. Ne seki masani eiloa a Susan i te faimalaga i vakalele, kae e uke ‵ki a taimi ne faima‵laga ei māua i vakalele! Ne fai mai a Susan me ne fesoasoani malosi atu ki a ia a manatu a‵lofa o avaga a nisi sui o te Potukau Pule, ke fakaiku aka ei ne ia ke ‵lago malosi mai a ia ki a au. Ne fai eiloa ne ia te mea tenā, kae ne fiafia eiloa au ki tou fafine.

E ‵fonu eiloa toku ofisa i ata o tino kolā e tāua malosi ki a au! Ne fakamasaua mai ne latou a te vaegā olaga gali telā ko maua nei ne au. Ko oti ne maua ne au a fakamanuiaga ‵gali e uke mai te faiga ne au te ‵toe mea e mafai o fai ke masaua ei ne au a te tino telā ne alofa muamua au ki ei, ko Ieova!

A te fakamāumāu o oku taimi fakatasi mo toku kāiga e aumai ne ia ki a au te fiafia lasi

^ pala. 31 E mafai o maua a fakamatalaga e uiga ki te taviniga tumau a te Taina ko Morris i te itulau e 18 o Te Faleleoleo Maluga i a Apelila 1, 2006.